ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನು ಬಳಸುವಾಗ ಪ್ರತಿಯೊಬ್ಬರಿಗೂ ಕನಿಷ್ಠ ನಾಗರಿಕ ಪ್ರಜ್ಞೆ ಇರಬೇಕಾದುದು ಅತ್ಯಗತ್ಯ. ಆದರೆ ಕೆಲವರ ಬೇಜವಾಬ್ದಾರಿ ವರ್ತನೆ ಇಡೀ ವ್ಯವಸ್ಥೆಗೆ ಮುಜುಗರ ತರುತ್ತದೆ. ಇದಕ್ಕೆ ಸಾಕ್ಷಿ ಎಂಬಂತೆ, ಹೈದರಾಬಾದ್ ಮೆಟ್ರೋ ರೈಲಿನಲ್ಲಿ ವ್ಯಕ್ತಿಯೊಬ್ಬ ಸಹಪ್ರಯಾಣಿಕರಿಗೆ ತೊಂದರೆಯಾಗುವಂತೆ ಸೀಟಿನ ಮೇಲೆ ಕಾಲು ಚಾಚಿ ಕುಳಿತು ಉದ್ಧಟತನ ಪ್ರದರ್ಶಿಸಿದ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ನೆಟ್ಟಿಗರು ಈತನ ವರ್ತನೆಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಸೀಟು ಬ್ಲಾಕ್ ಮಾಡಿ ಉದ್ಧಟತನದ ವಾದ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೋದಲ್ಲಿ, ಮೆಟ್ರೋ ರೈಲಿನ ಒಳಗಿರುವ ಸೀಟಿನಲ್ಲಿ ಕುಳಿತ ವ್ಯಕ್ತಿಯೊಬ್ಬ ತನ್ನ ಒಂದು ಕಾಲನ್ನು ಪಕ್ಕದ ಸೀಟಿನ ಮೇಲೆ ಚಾಚಿಟ್ಟುಕೊಂಡಿರುವುದನ್ನು ಕಾಣಬಹುದು. ರೈಲಿನಲ್ಲಿ ಇತರ ಪ್ರಯಾಣಿಕರು ನಿಲ್ಲಲು ಜಾಗವಿಲ್ಲದೆ ತೊಂದರೆ ಅನುಭವಿಸುತ್ತಿದ್ದರೂ, ಈತ ಎರಡು ಸೀಟುಗಳನ್ನು ಆಕ್ರಮಿಸಿಕೊಂಡಿದ್ದನು. ಇದನ್ನು ಗಮನಿಸಿದ ಪಕ್ಕದಲ್ಲೇ ಕುಳಿತಿದ್ದ ಯುವಕನೊಬ್ಬ, ಸೀಟಿನ ಮೇಲಿಂದ ಕಾಲು ಕೆಳಗೆ ಇಳಿಸುವಂತೆ ಆತನಿಗೆ ತಿಳಿಸಿದ್ದಾನೆ. ಆದರೆ ಅದಕ್ಕೆ ಸಕಾರಾತ್ಮಕವಾಗಿ ಸ್ಪಂದಿಸದ ಆ ವ್ಯಕ್ತಿ, ಅತ್ಯಂತ ಅಹಂಕಾರದಿಂದ ಉತ್ತರಿಸಿ ಜಗಳಕ್ಕೆ ನಿಂತಿದ್ದಾನೆ.
ಬುದ್ಧಿ ಕಲಿಸಿದ ಸಹಪ್ರಯಾಣಿಕರು ಆ ವ್ಯಕ್ತಿಯ ಸೊಕ್ಕಿನ ವರ್ತನೆಯಿಂದ ಕೋಪಗೊಂಡ ಇತರ ಪ್ರಯಾಣಿಕರು ತಕ್ಷಣವೇ ಆತನನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇದು ನೀವು ಮಾಡುತ್ತಿರುವುದು ಸರಿಯಲ್ಲ, ಮೆಟ್ರೋ ಎಲ್ಲರಿಗೂ ಸೇರಿದ್ದು ಎಂದು ಪ್ರಯಾಣಿಕರೊಬ್ಬರು ಗದರಿಸಿದ್ದಾರೆ. ಆದರೂ ಆ ವ್ಯಕ್ತಿ ತನ್ನ ತಪ್ಪನ್ನು ಒಪ್ಪಿಕೊಳ್ಳದೆ, ನಾನು ಸುಮ್ಮನೆ ಕುಳಿತಿದ್ದೇನೆ, ನಿಮಗೇನು ತೊಂದರೆ ಎಂದು ಮರುಪ್ರಶ್ನೆ ಹಾಕಿ ವಾದ ಮುಂದುವರಿಸಿದ್ದಾನೆ. ಇಷ್ಟೆಲ್ಲಾ ಆದರೂ ಆತನಿಗೆ ಜಾಗದ ಮೌಲ್ಯವಾಗಲಿ ಅಥವಾ ನಿಯಮಗಳ ಅರಿವಾಗಲಿ ಇದ್ದಂತೆ ಕಾಣಲಿಲ್ಲ. ಸದ್ಯ ಈ ವಿಡಿಯೋ ಅಂತರ್ಜಾಲದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಸಾರ್ವಜನಿಕ ಆಸ್ತಿಯನ್ನು ದುರ್ಬಳಕೆ ಮಾಡಿಕೊಳ್ಳುವ ಇಂತಹ ವ್ಯಕ್ತಿಗಳ ವಿರುದ್ಧ ಮೆಟ್ರೋ ಅಧಿಕಾರಿಗಳು ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಸಾರ್ವಜನಿಕರು ಒತ್ತಾಯಿಸುತ್ತಿದ್ದಾರೆ.
ವಿದೇಶಿ ವ್ಲಾಗರ್ ಮೆಚ್ಚಿದ್ದ ಹೈದರಾಬಾದ್ ಮೆಟ್ರೋ ವಿಶೇಷವೆಂದರೆ, ಹೈದರಾಬಾದ್ ಮೆಟ್ರೋ ಇತ್ತೀಚಿಗಷ್ಟೇ ವಿದೇಶಿ ಪ್ರವಾಸಿಯೊಬ್ಬರಿಂದ ಭಾರಿ ಪ್ರಶಂಸೆಗೆ ಪಾತ್ರವಾಗಿತ್ತು. ಬ್ರಿಟನ್ ಮೂಲದ ಪ್ರಸಿದ್ಧ ವ್ಲಾಗರ್ ಇಶಾಕ್ ಪ್ಯಾಟರ್ಸನ್ ಅವರು ಹೈದರಾಬಾದ್ ಮೆಟ್ರೋದಲ್ಲಿ ಪ್ರಯಾಣಿಸಿ, ಇದು ಜಗತ್ತಿನಲ್ಲೇ ತಮಗೆ ಅತ್ಯಂತ ಇಷ್ಟವಾದ ಅತ್ಯುತ್ತಮ ಮೆಟ್ರೋ ವ್ಯವಸ್ಥೆ ಎಂದು ಹೊಗಳಿದ್ದರು. ಮೆಟ್ರೋದ ಸ್ವಚ್ಛತೆ, ರೈಲಿನ ಒಳಗಿನ ಉತ್ತಮ ವಾತಾವರಣ ಮತ್ತು ಜನದಟ್ಟಣೆ ಇದ್ದರೂ ಕಸ ಇಲ್ಲದೆ ಸುಸ್ಥಿತಿಯಲ್ಲಿ ನಿರ್ವಹಿಸುತ್ತಿರುವ ರೀತಿಯನ್ನು ಅವರು ಮುಕ್ತಕಂಠದಿಂದ ಶ್ಲಾಘಿಸಿದ್ದರು. ಆದರೆ ಇಂತಹ ಅತ್ಯುತ್ತಮ ಮೆಟ್ರೋ ವ್ಯವಸ್ಥೆಯಲ್ಲಿ ಕೆಲವು ಸ್ಥಳೀಯ ಪ್ರಯಾಣಿಕರು ಇಂತಹ ಬೇಜವಾಬ್ದಾರಿ ವರ್ತನೆ ತೋರಿ ಕಳಂಕ ತರುತ್ತಿರುವುದು ದುರದೃಷ್ಟಕರ ಎಂದು ಜನ ಬೇಸರ ವ್ಯಕ್ತಪಡಿಸಿದ್ದಾರೆ.
