ನಮ್ಮ ಸುತ್ತಮುತ್ತ ನಡೆಯುವ ಕೆಲವು ಅದ್ಭುತ ಹಾಗೂ ಅಸಾಧ್ಯವೆನಿಸುವ ಸಂಗತಿಗಳನ್ನು ಕಣ್ಣಾರೆ ನೋಡಿದಾಗ ಮೈ ಜುಮ್ಮೆನಿಸುತ್ತದೆ. ದೇಹದ ಎಲ್ಲ ಅಂಗಾಂಗಗಳು ಸರಿಯಾಗಿದ್ದರೂ ಜೀವನದಲ್ಲಿ ಸಿಗುವ ಅವಕಾಶಗಳನ್ನು ಸದುಪಯೋಗಪಡಿಸಿಕೊಳ್ಳದವರಿಗೆ 13 ವರ್ಷದ ಲಕ್ಷ್ಮಿಯ ಆತ್ಮಸ್ಥೈರ್ಯ ಮತ್ತು ದೃಢಸಂಕಲ್ಪ ಉತ್ತಮ ಜೀವನ ಪಾಠವಾಗುತ್ತದೆ.
ಅಂಗವೈಕಲ್ಯ ಹೊಂದಿರುವವರನ್ನು ಕಂಡು ಅನುಕಂಪ ತೋರುವ ಈ ಸಮಾಜ, ಅವರಲ್ಲಿರುವ ಬಲವಾದ ಸಂಕಲ್ಪ ಹಾಗೂ ಗುರಿ ಸಾಧಿಸುವ ಛಲವನ್ನು ಕೆಲವೊಮ್ಮೆ ಗಮನಿಸುವುದಿಲ್ಲ. ಆದರೆ ಬಿಹಾರದ ಕಟಿಹಾರ್‌ನ 13 ವರ್ಷದ ಲಕ್ಷ್ಮಿ ತನ್ನ ಜೀವನದ ಸವಾಲುಗಳನ್ನು ಎದುರಿಸಿ ಎಲ್ಲರಿಗೂ ಸ್ಫೂರ್ತಿಯಾಗಿದ್ದಾಳೆ. ಸುದ್ದಿ ಸಂಸ್ಥೆ ANI ಈ ಬಾಲಕಿಯ ಕಥೆಯನ್ನು ಬೆಳಕಿಗೆ ತಂದಿದೆ.
ಹೆಸರು ಲಕ್ಷ್ಮಿ, ಆದರೆ ಸಾಕ್ಷಾತ್ ಸರಸ್ವತಿ ದೇವಿಯ ಮಗಳು!
ಮಕ್ಕಳ ಉಜ್ವಲ ಭವಿಷ್ಯಕ್ಕಾಗಿ ತಮ್ಮ ಜೀವನವನ್ನೇ ಮುಡಿಪಾಗಿಡುವ ಪೋಷಕರು ನಮ್ಮಲ್ಲಿದ್ದಾರೆ. ತಾವು ಅನುಭವಿಸುವ ಕಷ್ಟವನ್ನು ತಮ್ಮ ಮಕ್ಕಳು ಅನುಭವಿಸಬಾರದು ಎಂದು ತಮ್ಮ ಸಾಮರ್ಥ್ಯಕ್ಕೂ ಮೀರಿ ದುಡಿದು, ಮಕ್ಕಳ ಶಿಕ್ಷಣಕ್ಕಾಗಿ ಹಣ ಖರ್ಚು ಮಾಡುವವರೂ ಇದ್ದಾರೆ.
ಇಂತಹ ಕಾಲದಲ್ಲಿ ಶಿಕ್ಷಣಕ್ಕೆ ಹೆಚ್ಚಿನ ಮಹತ್ವವಿರುವಾಗ, ಎರಡು ಕೈಗಳಿಲ್ಲದಿದ್ದರೂ ತಾನು ಸರಸ್ವತಿ ದೇವಿಯ ಮಗಳು ಎಂಬಂತೆ ಶಿಕ್ಷಣದತ್ತ ಅಪಾರ ಆಸಕ್ತಿ ಹೊಂದಿರುವ ಬಾಲಕಿ ಲಕ್ಷ್ಮಿ ಎಲ್ಲರ ಗಮನ ಸೆಳೆಯುತ್ತಿದ್ದಾಳೆ. ಬಿಹಾರದ ಕಟಿಹಾರ್‌ನ ಈ 13 ವರ್ಷದ ಬಾಲಕಿ ಎರಡು ಕೈಗಳಿಲ್ಲದ ದಿವ್ಯಾಂಗೆಯಾಗಿದ್ದರೂ, ತನ್ನ ದೈಹಿಕ ಮಿತಿಯನ್ನು ಮೆಟ್ಟಿ ನಿಂತಿದ್ದಾಳೆ.
ಎರಡು ಕೈಗಳಿಲ್ಲದಿದ್ದರೇನಂತೆ..!
ಲಕ್ಷ್ಮಿಗೆ ಎರಡು ಕೈಗಳಿಲ್ಲ. ಆದರೂ ಇತರ ವಿದ್ಯಾರ್ಥಿಗಳಂತೆ ಶಾಲಾ ಬ್ಯಾಗ್ ಹೊತ್ತು ಪ್ರತಿದಿನ ಶಾಲೆಗೆ ಹೋಗುತ್ತಾಳೆ. ಬ್ಯಾಗ್‌ನಲ್ಲಿರುವ ಪುಸ್ತಕಗಳು ಮತ್ತು ಪೆನ್ನುಗಳನ್ನು ತನ್ನ ಕಾಲಿನ ಬೆರಳುಗಳ ಸಹಾಯದಿಂದ ಹೊರತೆಗೆದು, ಬೆಂಚ್ ಮೇಲೆ ಇಟ್ಟುಕೊಂಡು ಕಾಲುಗಳಲ್ಲೇ ಹೋಮ್‌ವರ್ಕ್ ಮತ್ತು ಕ್ಲಾಸ್‌ವರ್ಕ್ ಮಾಡುತ್ತಾಳೆ.
ಕೈಗಳಿಲ್ಲದಿದ್ದರೂ ಆಕೆಯ ಸಂಕಲ್ಪ ಮಾತ್ರ ಗಟ್ಟಿಯಾಗಿದೆ. ತನ್ನ ದೈಹಿಕ ಮಿತಿಗಳನ್ನು ಮೀರಿ ಶಿಕ್ಷಣ ಮುಂದುವರಿಸುತ್ತಿದ್ದಾಳೆ. ಕಾಲುಗಳಿಂದ ಬರೆಯುವುದು ಅತ್ಯಂತ ಕಷ್ಟಕರವಾಗಿದ್ದರೂ, ಆ ನೋವು ಮತ್ತು ಸವಾಲುಗಳನ್ನು ಸಹಿಸಿಕೊಂಡು ಇತರ ವಿದ್ಯಾರ್ಥಿಗಳಂತೆ ಓದುತ್ತಿದ್ದಾಳೆ.
ಅವಕಾಶ ಸಿಕ್ಕರೂ ಅದನ್ನು ಸದುಪಯೋಗಪಡಿಸಿಕೊಳ್ಳಲಾಗದವರಿಗೆ ಲಕ್ಷ್ಮಿಯ ಈ ಪಯಣ ದೊಡ್ಡ ಸ್ಫೂರ್ತಿಯಾಗಿದೆ. ದೃಢನಿಶ್ಚಯ, ಧೈರ್ಯ ಮತ್ತು ಜೀವನದಲ್ಲಿ ಏನಾದರೂ ಸಾಧಿಸಬೇಕೆಂಬ ಛಲದಿಂದ ತನ್ನ ವಿದ್ಯಾಭ್ಯಾಸವನ್ನು ಮುಂದುವರಿಸುತ್ತಿರುವ ಲಕ್ಷ್ಮಿ, ಬಾಲ್ಯದಲ್ಲೇ ತನ್ನ ಭವಿಷ್ಯಕ್ಕೆ ಭದ್ರ ಬುನಾದಿ ಹಾಕಿಕೊಳ್ಳುತ್ತಿದ್ದಾಳೆ. ತನ್ನ ತಲೆಯ ಬರಹವನ್ನೇ ತನ್ನ ಕಾಲಿನ ಬೆರಳುಗಳಿಂದ ಬದಲಿಸಿಕೊಳ್ಳುತ್ತಿದ್ದಾಳೆ. ಆಕೆಯ ಪೆನ್ನು ಕಾಲಿನ ಬೆರಳುಗಳ ನಡುವೆ ಸಿಲುಕಿಕೊಳ್ಳಬಹುದು; ಆದರೆ ಲಕ್ಷ್ಮಿ ಕಾಣುತ್ತಿರುವ ಕನಸುಗಳಿಗೆ ಮಾತ್ರ ಯಾವುದೇ ಮಿತಿಯಿಲ್ಲ.
ಕಾಲುಗಳಿಂದಲೇ ಬರೆಯುವ ಬಾಲಕಿ
ಶಾಲೆಯಲ್ಲಿ ಲಕ್ಷ್ಮಿ ತನ್ನ ಸಹಪಾಠಿಗಳೊಂದಿಗೆ ಸಂತೋಷದಿಂದ ಆಟವಾಡುತ್ತಾಳೆ. ಶಾಲೆಯ ಬೆಲ್ ಮೊಳಗುತ್ತಿದ್ದಂತೆ ಓಡುತ್ತಾ ತರಗತಿ ಕೊಠಡಿಗೆ ತೆರಳಿ, ತನ್ನ ಕಾಲುಗಳ ಸಹಾಯದಿಂದಲೇ ಬ್ಯಾಗ್ ತೆರೆದು ನೋಟ್‌ಬುಕ್‌ಗಳನ್ನು ಹೊರತೆಗೆದುಕೊಳ್ಳುತ್ತಾಳೆ. ನಂತರ ಕಾಲುಗಳಲ್ಲೇ ನೋಟ್‌ಬುಕ್‌ನಲ್ಲಿ ಬರೆಯುತ್ತಾಳೆ. ಶಿಕ್ಷಕರು ಕೇಳುವ ಪ್ರಶ್ನೆಗಳಿಗೆ ಉತ್ತರಗಳನ್ನೂ ನೀಡುತ್ತಾಳೆ. ತರಗತಿಯಲ್ಲಿ ಕಾಲುಗಳಿಂದ ಬರೆಯುವ ಲಕ್ಷ್ಮಿಯನ್ನು ಹಾಗೂ ಮೈದಾನದಲ್ಲಿ ಇತರ ಮಕ್ಕಳೊಂದಿಗೆ ಆಟವಾಡುವುದನ್ನು ಕಂಡು ಸಹಪಾಠಿಗಳೂ ಆಕೆಯ ಧೈರ್ಯ ಮತ್ತು ಪರಿಶ್ರಮವನ್ನು ಮಾದರಿಯಾಗಿಸಿಕೊಂಡಿದ್ದಾರೆ.
ಬಾಲಕಿಯ ದೃಢಸಂಕಲ್ಪಕ್ಕೆ ಮೆಚ್ಚುಗೆ
ಲಕ್ಷ್ಮಿಗೆ ಅಂಗವೈಕಲ್ಯವಿರುವ ಬಗ್ಗೆ ಮಾಹಿತಿ ತಿಳಿದ ಜಿಲ್ಲಾ ಆರೋಗ್ಯ ಇಲಾಖೆ ತಂಡವು ಶಾಲೆಗೆ ಭೇಟಿ ನೀಡಿತು. ಅಧಿಕಾರಿಗಳು ಲಕ್ಷ್ಮಿಯೊಂದಿಗೆ ಮಾತನಾಡಿ, ಆಕೆಗೆ ಕಳೆದ ವರ್ಷವೇ UDID ಕಾರ್ಡ್ ನೀಡಲಾಗಿದೆ ಎಂಬುದನ್ನು ಖಚಿತಪಡಿಸಿಕೊಂಡರು. ಇದಲ್ಲದೆ, ಆಕೆಯ ಬಳಿ ಈಗಾಗಲೇ UDID ಕಾರ್ಡ್ ಇರುವುದರಿಂದ ಸಂಬಂಧಿತ ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿಗಳನ್ನು ಸಂಪರ್ಕಿಸಿ, ಸರ್ಕಾರದಿಂದ ದೊರೆಯಬೇಕಾದ ಹೆಚ್ಚಿನ ನೆರವು ಮತ್ತು ಸೌಲಭ್ಯಗಳನ್ನು ಒದಗಿಸಲು ಪ್ರಕ್ರಿಯೆಯನ್ನು ವೇಗಗೊಳಿಸಲಾಗುವುದು ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ತಿಳಿಸಿದ್ದಾರೆ.
“ಕಷ್ಟಪಟ್ಟು ದುಡಿದರೆ ಮನುಷ್ಯರು ಋಷಿಗಳಾಗುತ್ತಾರೋ ಇಲ್ಲವೋ ಗೊತ್ತಿಲ್ಲ; ಆದರೆ ಛಲವಿದ್ದರೆ ಅಂಗವೈಕಲ್ಯವನ್ನೂ ಮೆಟ್ಟಿ ನಿಂತು ಜೀವನದಲ್ಲಿ ದೊಡ್ಡ ಸಾಧನೆ ಮಾಡಬಹುದು” ಎಂಬುದಕ್ಕೆ ಲಕ್ಷ್ಮಿಯ ಜೀವನವೇ ಅತ್ಯುತ್ತಮ ಉದಾಹರಣೆ ಎಂದು ನೆಟ್ಟಿಗರು ಹಾಗೂ ವಿವಿಧ ಜನಪರ ಸಂಘಟನೆಗಳು ಬಾಲಕಿಯನ್ನು ಶ್ಲಾಘಿಸುತ್ತಿವೆ.
