ಎಷ್ಟೇ ದುಬಾರಿ ಕ್ರೀಮ್ ಹಚ್ಚಿದರೂ, ಸ್ಕಿನ್ ಕೇರ್ ಮಾಡಿದರೂ ಮುಖದ ಮೇಲಿನ ಮೊಡವೆಗಳು ಮತ್ತೆ ಮತ್ತೆ ಬರುತ್ತಿದ್ದರೆ, ಸಮಸ್ಯೆ ಕೇವಲ ಚರ್ಮಕ್ಕೆ ಸಂಬಂಧಿಸಿದ್ದಲ್ಲ ಎಂದು ತಿಳಿಯಬೇಕು. ದೇಹದ ಒಳಗಿನ ಉಷ್ಣತೆ ಹೆಚ್ಚಾದಾಗ ಮತ್ತು ರಕ್ತದಲ್ಲಿ ಅಶುದ್ಧತೆ ಉಂಟಾದಾಗ ಅದು ಮೊಡವೆಯ ರೂಪದಲ್ಲಿ ಮುಖದ ಮೇಲೆ ಗೋಚರಿಸುತ್ತದೆ. ಪೌಷ್ಟಿಕತಜ್ಞೆ ಶ್ವೇತಾ ಶಾ ಅವರ ಪ್ರಕಾರ, ದೇಹದಲ್ಲಿನ ‘ಪಿತ್ತ’ ದೋಷ ಅಥವಾ ಉಷ್ಣಾಂಶ ಹೆಚ್ಚಾಗುವುದು ಪುನರಾವರ್ತಿತ ಮೊಡವೆಗಳಿಗೆ ಪ್ರಮುಖ ಕಾರಣ.
ಮೊಡವೆಗಳನ್ನು ಬುಡದಿಂದಲೇ ಹೋಗಲಾಡಿಸಲು ಕೇವಲ ಬಾಹ್ಯ ಚಿಕಿತ್ಸೆ ಸಾಲದು, ದೇಹದ ಒಳಗಿನ ವ್ಯವಸ್ಥೆಯನ್ನು ಶುದ್ಧೀಕರಿಸುವುದು ಅಗತ್ಯ. ಇದಕ್ಕಾಗಿ ಪೌಷ್ಟಿಕತಜ್ಞರು ಸತತ 7 ದಿನಗಳ ಕಾಲ ಸೇವಿಸಬಹುದಾದ ಒಂದು ವಿಶೇಷ ನೈಸರ್ಗಿಕ ಪಾನೀಯವನ್ನು ಸೂಚಿಸಿದ್ದಾರೆ.
ಬೇಕಾಗುವ ಪದಾರ್ಥಗಳು:
- 3-4 ಲವಂಗ (ರಾತ್ರಿ ನೆನೆಸಿಟ್ಟದ್ದು)
- ಸ್ವಲ್ಪ ಜೇನುತುಪ್ಪ
- ಕೆಲವು ಹನಿ ಲಿಂಬೆ ರಸ
- ಸ್ವಲ್ಪ ತಾಜಾ ಬೇವಿನ ಎಲೆಗಳ ಪೇಸ್ಟ್
ಮಾಡುವ ವಿಧಾನ: ರಾತ್ರಿ 3-4 ಲವಂಗಗಳನ್ನು ನೀರಿನಲ್ಲಿ ನೆನೆಸಿಡಿ. ಮರುದಿನ ಬೆಳಿಗ್ಗೆ ಆ ಲವಂಗಗಳನ್ನು ಚೆನ್ನಾಗಿ ಜಜ್ಜಿ ಪೇಸ್ಟ್ ಮಾಡಿಕೊಳ್ಳಿ. ಇದಕ್ಕೆ ಸ್ವಲ್ಪ ಜೇನುತುಪ್ಪ, ಲಿಂಬೆ ರಸ ಮತ್ತು ಬೇವಿನ ಪೇಸ್ಟ್ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಮಿಶ್ರಣವನ್ನು ಪ್ರತಿದಿನ ಬೆಳಿಗ್ಗೆ ಎದ್ದ ತಕ್ಷಣ ಬರಿ ಹೊಟ್ಟೆಯಲ್ಲಿ ಸೇವಿಸಬೇಕು.
ಇದು ಹೇಗೆ ಕೆಲಸ ಮಾಡುತ್ತದೆ? ಲವಂಗದಲ್ಲಿ ಬ್ಯಾಕ್ಟೀರಿಯಾ ವಿರೋಧಿ ಮತ್ತು ಉರಿಯೂತ ಶಮನಕಾರಿ ಗುಣಗಳಿವೆ. ಬೇವಿನ ಎಲೆಗಳು ರಕ್ತವನ್ನು ಶುದ್ಧೀಕರಿಸಲು ದಶಕಗಳಿಂದ ಬಳಕೆಯಾಗುತ್ತಿವೆ. ಜೇನುತುಪ್ಪ ಮತ್ತು ಲಿಂಬೆ ರಸವು ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸಿ ದೇಹದ ಕಲ್ಮಶಗಳನ್ನು ಹೊರಹಾಕಲು ಸಹಾಯ ಮಾಡುತ್ತದೆ. ಈ ಮಿಶ್ರಣವು ದೇಹದ ಒಳಗಿನ ಉಷ್ಣತೆಯನ್ನು (ಪಿತ್ತ) ತಗ್ಗಿಸಿ, ಮೊಡವೆಗಳು ಬರುವುದನ್ನು ತಡೆಯುತ್ತದೆ.
ಈ ಮನೆಮದ್ದನ್ನು ಅನುಸರಿಸುವಾಗ ದಿನವಿಡೀ ಹೆಚ್ಚು ನೀರು ಕುಡಿಯುವುದು, ಮಸಾಲೆ ಪದಾರ್ಥ ಮತ್ತು ಎಣ್ಣೆಯುಕ್ತ ಆಹಾರಗಳಿಂದ ದೂರವಿರುವುದು ಉತ್ತಮ ಫಲಿತಾಂಶ ನೀಡುತ್ತದೆ. ಗರ್ಭಿಣಿಯರು ಅಥವಾ ದೀರ್ಘಕಾಲದ ಕಾಯಿಲೆ ಇರುವವರು ವೈದ್ಯರ ಸಲಹೆ ಪಡೆದ ನಂತರವಷ್ಟೇ ಇದನ್ನು ಪ್ರಯತ್ನಿಸಬೇಕು.
