ಇಡೀ ದಿನ ಆಫೀಸ್ನಲ್ಲಿ ಒಂದೇ ಕಡೆ ಕುಳಿತು ಕೆಲಸ ಮಾಡುವುದು, ಗಂಟೆಗಟ್ಟಲೆ ನಿಂತುಕೊಳ್ಳುವುದು ಅಥವಾ ಅತಿಯಾದ ಪ್ರಯಾಣದಿಂದಾಗಿ ದಿನದ ಕೊನೆಯಲ್ಲಿ ಕಾಲುಗಳು ಭಾರವಾಗುವುದು, ಪಾದಗಳು ಉಬ್ಬಿಕೊಳ್ಳುವುದು ಇತ್ತೀಚಿನ ದಿನಗಳಲ್ಲಿ ಸಾಮಾನ್ಯವಾಗಿದೆ. ಇದರೊಂದಿಗೆ ದೈನಂದಿನ ಮಾನಸಿಕ ಒತ್ತಡವೂ ಸೇರಿ ದೇಹ ಮತ್ತು ಮನಸ್ಸು ಎರಡೂ ಜರ್ಜರಿತವಾಗುತ್ತವೆ. ಇಂತಹ ಸಂದರ್ಭದಲ್ಲಿ ಯಾವುದೇ ಹಣ ಖರ್ಚು ಮಾಡದೆ, ಕೇವಲ 10 ನಿಮಿಷಗಳಲ್ಲಿ ಕಾಲುಗಳ ರಕ್ತಪರಿಚಲನೆ ಹೆಚ್ಚಿಸಿ, ಮನಸ್ಸನ್ನು ಶಾಂತಗೊಳಿಸುವ ಸರಳ ಯೋಗಾಸನವೊಂದು ಇಲ್ಲಿದೆ. ಯೋಗ ಶಾಸ್ತ್ರದಲ್ಲಿ ಇದನ್ನು ‘ವಿಪರೀತ ಕರಣಿ’ (ಕಾಲುಗಳನ್ನು ಗೋಡೆಗೆ ಒರಗಿಸುವ ಭಂಗಿ) ಎಂದು ಕರೆಯಲಾಗುತ್ತದೆ.
ವಿಪರೀತ ಕರಣಿ ಅಂದರೇನು?
ಇದು ಶತಮಾನಗಳ ಇತಿಹಾಸವಿರುವ ಅತ್ಯಂತ ಹಳೆಯ ಮತ್ತು ಸರಳವಾದ ಯೋಗಾಸನವಾಗಿದೆ. ಕಠಿಣವಾದ ಯೋಗಾಸನಗಳಂತೆ ಇದಕ್ಕೆ ಯಾವುದೇ ದೈಹಿಕ ನಮ್ಯತೆ (ಫ್ಲೆಕ್ಸಿಬಿಲಿಟಿ) ಅಥವಾ ಕಠಿಣ ಶ್ರಮದ ಅಗತ್ಯವಿಲ್ಲ. ಕೇವಲ ಒಂದು ಗೋಡೆ ಹಾಗೂ ಯೋಗ ಮ್ಯಾಟ್ ಇದ್ದರೆ ಇದನ್ನು ಮನೆಯಲ್ಲೇ ಸುಲಭವಾಗಿ ಮಾಡಬಹುದು. ಗುರುತ್ವಾಕರ್ಷಣೆಯ ಸಹಾಯದಿಂದ ಕಾಲುಗಳಲ್ಲಿ ನಿಂತಿರುವ ರಕ್ತ ಮತ್ತು ದ್ರವವನ್ನು ಮತ್ತೆ ಹೃದಯದ ಕಡೆಗೆ ಸರಾಗವಾಗಿ ಹರಿಯುವಂತೆ ಮಾಡಲು ಈ ಆಸನ ಸಹಕಾರಿಯಾಗಿದೆ ಎಂದು ತಜ್ಞರು ಹೇಳುತ್ತಾರೆ.
ಆಸನ ಮಾಡುವ ವಿಧಾನ:
-
ಮೊದಲಿಗೆ ಗೋಡೆಯ ಪಕ್ಕದಲ್ಲಿ ಒಂದು ಮ್ಯಾಟ್ ಅಥವಾ ಜಮಖಾನ ಹಾಸಿ ಅದರ ಮೇಲೆ ಕುಳಿತುಕೊಳ್ಳಿ.
-
ನಂತರ ನಿಧಾನವಾಗಿ ಬೆನ್ನನ್ನು ನೆಲದ ಮೇಲೆ ಮಲಗಿಸುತ್ತಾ, ಎರಡೂ ಕಾಲುಗಳನ್ನು ನೇರವಾಗಿ ಗೋಡೆಯ ಮೇಲೆ ಚಾಚಿ. ನಿಮ್ಮ ಪೃಷ್ಠ ಭಾಗ (ಹಿಪ್ಸ್) ಗೋಡೆಗೆ ಹತ್ತಿರವಾಗಿರಬೇಕು.
-
ಎರಡೂ ಕೈಗಳನ್ನು ದೇಹದ ಪಕ್ಕದಲ್ಲಿ ಆರಾಮವಾಗಿ ಇರಿಸಿ, ಕೈ ಅಂಗೈಗಳು ಮೇಲ್ಮುಖವಾಗಿರಲಿ.
-
ಇದೇ ಸ್ಥಿತಿಯಲ್ಲಿ ಕಣ್ಣುಗಳನ್ನು ಮುಚ್ಚಿ, ದೀರ್ಘವಾಗಿ ಉಸಿರಾಡುತ್ತಾ 5 ರಿಂದ 10 ನಿಮಿಷಗಳ ಕಾಲ ವಿಶ್ರಾಂತಿ ಪಡೆಯಿರಿ.
ಪಾದಗಳ ಉಬ್ಬರ ಮತ್ತು ದಣಿವು ಕಡಿಮೆಯಾಗುವುದು ಹೇಗೆ?
ನಾವು ದಿನವಿಡೀ ನಿಂತಾಗ ಅಥವಾ ಕುಳಿತಾಗ, ನಮ್ಮ ದೇಹದ ದ್ರವಗಳು ಮತ್ತು ರಕ್ತವು ಗುರುತ್ವಾಕರ್ಷಣೆಯ ಕಾರಣದಿಂದಾಗಿ ಕೆಳಭಾಗದಲ್ಲಿ ಅಂದರೆ ಪಾದಗಳಲ್ಲಿ ಶೇಖರಣೆಯಾಗಲು ಪ್ರಾರಂಭವಾಗುತ್ತದೆ. ಬಿಸಿ ವಾತಾವರಣ, ಅತಿಯಾದ ಉಪ್ಪಿನ ಸೇವನೆ ಮತ್ತು ದೀರ್ಘ ಪ್ರಯಾಣದಿಂದಾಗಿ ಪಾದಗಳ ಊತ ಮತ್ತಷ್ಟು ಹೆಚ್ಚುತ್ತದೆ. ಆದರೆ, ಕಾಲುಗಳನ್ನು ಮೇಲಕ್ಕೆತ್ತಿ ಗೋಡೆಗೆ ಒರಗಿಸಿದಾಗ, ಪಾದಗಳಲ್ಲಿ ಜಮೆಯಾಗಿದ್ದ ದ್ರವವು ಸುಲಭವಾಗಿ ಹಿಂದಕ್ಕೆ ಚಲಿಸುತ್ತದೆ. ಇದರಿಂದ ಪಾದಗಳ ಊತ ತಕ್ಷಣವೇ ಕಡಿಮೆಯಾಗಿ, ಕಾಲುಗಳ ದಣಿವು ದೂರವಾಗುತ್ತದೆ.
ನರಮಂಡಲ ಮತ್ತು ಮನಸ್ಸು ಶಾಂತವಾಗುತ್ತದೆ
ಈ ಆಸನದಲ್ಲಿ ಮಲಗಿದಾಗ ನಮ್ಮ ಮೆದುಳಿಗೆ ದೇಹವು ಸಂಪೂರ್ಣ ಸುರಕ್ಷಿತವಾಗಿದೆ ಮತ್ತು ವಿಶ್ರಾಂತಿ ಸ್ಥಿತಿಯಲ್ಲಿದೆ ಎಂಬ ಸಂದೇಶ ತಲುಪುತ್ತದೆ. ಇದು ನಮ್ಮ ದೇಹದ ನರಮಂಡಲವನ್ನು ಶಾಂತಗೊಳಿಸಿ, ದಿನವಿಡೀ ಇದ್ದ ಮಾನಸಿಕ ಒತ್ತಡ, ಆತಂಕ ಮತ್ತು ಆಯಾಸವನ್ನು ಕ್ಷಣಾರ್ಧದಲ್ಲಿ ದೂರ ಮಾಡುತ್ತದೆ. ಮಲಗುವ ಮುನ್ನ ಇದನ್ನು ಮಾಡುವುದರಿಂದ ರಾತ್ರಿ ಅತ್ಯುತ್ತಮ ಮತ್ತು ಗಾಢವಾದ ನಿದ್ರೆ ಬರುತ್ತದೆ.
ಯಾರೆಲ್ಲಾ ಜಾಗರೂಕರಾಗಿರಬೇಕು?
ಈ ಆಸನವು ಎಲ್ಲರಿಗೂ ಸುರಕ್ಷಿತವಾಗಿದ್ದರೂ, ತೀವ್ರ ರಕ್ತದೊತ್ತಡ (ಹೈ ಬಿಪಿ) ಇರುವವರು, ಗ್ಲುಕೋಮಾದಂತಹ ಕಣ್ಣಿನ ಸಮಸ್ಯೆ ಇರುವವರು ಹಾಗೂ ಇತ್ತೀಚೆಗೆ ಬೆನ್ನು ಅಥವಾ ಸೊಂಟದ ಶಸ್ತ್ರಚಿಕಿತ್ಸೆಗೆ ಒಳಗಾದವರು ವೈದ್ಯರ ಸಲಹೆ ಪಡೆಯದೆ ಈ ಆಸನವನ್ನು ಮಾಡಬಾರದು. ಸಾಮಾನ್ಯ ದಣಿವಿನ ಊತಕ್ಕೆ ಇದು ರಾಮಬಾಣವಾದರೂ, ದಿನಗಟ್ಟಲೆ ಪಾದಗಳ ಊತ ಕಡಿಮೆ ಆಗದಿದ್ದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
