ಭಾರತೀಯ ಚಿತ್ರರಂಗದಲ್ಲಿ ಸಣ್ಣ ವಯಸ್ಸಿನಲ್ಲೇ ದೊಡ್ಡ ಹೆಸರು ಮಾಡಿದ ನಟಿಯರ ಪಟ್ಟಿಯಲ್ಲಿ ಶೋಭನಾ ಚಂದ್ರಕುಮಾರ್ ಪಿಳ್ಳೈ ಅವರ ಹೆಸರು ಪ್ರಮುಖವಾಗಿ ಕೇಳಿಬರುತ್ತದೆ. ಕೇವಲ 14ನೇ ವಯಸ್ಸಿಗೆ ಮಲಯಾಳಂ ಚಿತ್ರರಂಗದ ಮೂಲಕ ನಾಯಕಿಯಾಗಿ ಪಾದಾರ್ಪಣೆ ಮಾಡಿದ ಶೋಭನಾ, ಇಂದು ದಕ್ಷಿಣ ಭಾರತದ ಹೆಮ್ಮೆಯ ನಟಿ ಹಾಗೂ ಅಪ್ರತಿಮ ಭರತನಾಟ್ಯ ಕಲಾವಿದೆಯಾಗಿ ಗುರುತಿಸಿಕೊಂಡಿದ್ದಾರೆ. ಮಲಯಾಳಂ ಮಾತ್ರವಲ್ಲದೆ ಕನ್ನಡ, ತೆಲುಗು, ತಮಿಳು ಮತ್ತು ಹಿಂದಿ ಭಾಷೆಗಳಲ್ಲಿ ಇವರು ನಟಿಸಿದ್ದಾರೆ.
ಶೋಭನಾ ಅವರ ಸಿನಿಮಾ ಪಯಣ ಆರಂಭವಾಗಲು ನಟಿ ಹೇಮಾ ಮಾಲಿನಿ ಅವರ ತಾಯಿ ಜಯಾ ಚಕ್ರವರ್ತಿ ಅವರು ಪ್ರಮುಖ ಕಾರಣ ಎಂಬುದು ವಿಶೇಷ. ಖ್ಯಾತ ನಟಿ ಪದ್ಮಿನಿ ಅವರ ಜೊತೆಯಿದ್ದ ಶೋಭನಾ ಅವರಲ್ಲಿದ್ದ ಪ್ರತಿಭೆಯನ್ನು ಜಯಾ ಅವರು ಮೊದಲ ಬಾರಿ ಗುರುತಿಸಿದ್ದರು. ಅವರ ಶಿಫಾರಸಿನ ಮೇರೆಗೆ ಶೋಭನಾ ಅವರಿಗೆ ಮಿನುಗುವ ಅವಕಾಶ ದೊರೆಯಿತು. 1984ರಲ್ಲಿ ‘ಏಪ್ರಿಲ್ 18’ ಚಿತ್ರದ ಮೂಲಕ ನಾಯಕಿಯಾಗಿ ತೆರೆಗೆ ಬಂದ ಇವರು, ವೃತ್ತಿಜೀವನದ ಉತ್ತುಂಗದಲ್ಲಿದ್ದಾಗ ವರ್ಷವೊಂದರಲ್ಲೇ ಬರೋಬ್ಬರಿ 16 ಸಿನಿಮಾಗಳಲ್ಲಿ ನಟಿಸಿ ದಾಖಲೆ ಬರೆದಿದ್ದರು.
ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿರುವ ಶೋಭನಾ, ಈವರೆಗೆ 230ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಮಣಚಿತ್ರತ್ತಾಳು ಮತ್ತು ಮಿತ್ರ್ ಮೈ ಫ್ರೆಂಡ್ ಚಿತ್ರಗಳ ಅಭಿನಯಕ್ಕಾಗಿ ಇವರು ಎರಡು ಬಾರಿ ರಾಷ್ಟ್ರಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದ್ದಾರೆ. ಈಗ ಶೋಭನಾ ಅವರು ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಬಾಲಿವುಡ್‌ನ ಬೃಹತ್ ವೆಚ್ಚದ ಸಿನಿಮಾ ಎನ್ನಲಾದ ನಿತೇಶ್ ತಿವಾರಿ ನಿರ್ದೇಶನದ ‘ರಾಮಾಯಣ’ದಲ್ಲಿ ಶೋಭನಾ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ದಕ್ಷಿಣದ ಈ ನಟಿ ದಶಕಗಳ ನಂತರ ಬಾಲಿವುಡ್‌ನ ದೊಡ್ಡ ವೇದಿಕೆಯಲ್ಲಿ ಮಿಂಚಲು ಸಜ್ಜಾಗಿದ್ದಾರೆ.
