ಹೆಣ್ಣುಮಕ್ಕಳ ಶಿಕ್ಷಣ ಮತ್ತು ವಿವಾಹದಂತಹ ಭವಿಷ್ಯದ ಅಗತ್ಯಗಳಿಗಾಗಿ ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ‘ಸುಕನ್ಯಾ ಸಮೃದ್ಧಿ ಯೋಜನೆ’ಯು ಪೋಷಕರಿಗೆ ಅತ್ಯುತ್ತಮ ಉಳಿತಾಯ ಮಾರ್ಗವಾಗಿದೆ. ಹೆಚ್ಚಿನ ಬಡ್ಡಿ ದರ ಮತ್ತು ತೆರಿಗೆ ವಿನಾಯಿತಿಗಳೊಂದಿಗೆ ದೀರ್ಘಾವಧಿಯಲ್ಲಿ ದೊಡ್ಡ ಮೊತ್ತವನ್ನು ಗಳಿಸಲು ಇದೊಂದು ಉತ್ತಮ ಅವಕಾಶ.
ಪ್ರತಿಯೊಬ್ಬ ಪೋಷಕರೂ ತಮ್ಮ ಮಕ್ಕಳ ಭವಿಷ್ಯವು ಸುರಕ್ಷಿತವಾಗಿರಬೇಕೆಂದು ಬಯಸುತ್ತಾರೆ. ಅದರಲ್ಲೂ ಹೆಣ್ಣುಮಕ್ಕಳ ಉನ್ನತ ಶಿಕ್ಷಣ ಮತ್ತು ಮದುವೆಯಂತಹ ಸಂದರ್ಭಗಳಲ್ಲಿ ಆರ್ಥಿಕ ಸಂಕಷ್ಟ ಎದುರಾಗಬಾರದೆಂದು ಮೊದಲೇ ಯೋಜನೆಗಳನ್ನು ರೂಪಿಸಿಕೊಳ್ಳುತ್ತಾರೆ. ಅಂತಹ ಕುಟುಂಬಗಳಿಗಾಗಿ ಕೇಂದ್ರ ಸರ್ಕಾರವು ಜಾರಿಗೆ ತಂದಿರುವ ಅತ್ಯಂತ ಜನಪ್ರಿಯ ಉಳಿತಾಯ ಯೋಜನೆಗಳಲ್ಲಿ ಸುಕನ್ಯಾ ಸಮೃದ್ಧಿ ಯೋಜನೆಯೂ ಒಂದು.2015 ರಲ್ಲಿ ಪ್ರಾರಂಭವಾದ ಈ ಯೋಜನೆಯು ಬಾಲಕಿಯರ ಆರ್ಥಿಕ ಭವಿಷ್ಯವನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ. ಬಾಲಕಿ ಜನಿಸಿದ ದಿನದಿಂದ 10 ವರ್ಷ ವಯಸ್ಸಿನೊಳಗೆ ಪೋಷಕರು ಅಥವಾ ಕಾನೂನುಬದ್ಧ ಪಾಲಕರು ಈ ಖಾತೆಯನ್ನು ತೆರೆಯಬಹುದು.
ಬಡ್ಡಿ ದರ: ಪ್ರಸ್ತುತ ಸರ್ಕಾರವು ಈ ಯೋಜನೆಗೆ ವಾರ್ಷಿಕ 8.2% ಬಡ್ಡಿ ನೀಡುತ್ತಿದೆ. ಮಾರುಕಟ್ಟೆಯಲ್ಲಿರುವ ಅನೇಕ ಫಿಕ್ಸೆಡ್ ಡೆಪಾಸಿಟ್ ಯೋಜನೆಗಳಿಗಿಂತ ಇದು ಹೆಚ್ಚಿನ ಬಡ್ಡಿ ದರವಾಗಿದೆ. ಜೊತೆಗೆ, ಹೂಡಿಕೆ, ಬಡ್ಡಿ ಮತ್ತು ಮೆಚ್ಯೂರಿಟಿ ಮೊತ್ತವು ಆದಾಯ ತೆರಿಗೆ ಕಾಯಿದೆಯಡಿ ವಿನಾಯಿತಿಗೆ ಒಳಪಡುತ್ತದೆ.
ಹೂಡಿಕೆಯ ಮಿತಿ: ಈ ಯೋಜನೆಯಡಿ ಕನಿಷ್ಠ ರೂ. 250 ರಿಂದ ಖಾತೆ ತೆರೆಯಬಹುದು. ಗರಿಷ್ಠವಾಗಿ ವರ್ಷಕ್ಕೆ ರೂ. 1.5 ಲಕ್ಷದವರೆಗೆ ಜಮಾ ಮಾಡಬಹುದು. ಖಾತೆ ತೆರೆದ ದಿನದಿಂದ 15 ವರ್ಷಗಳ ಕಾಲ ಮಾತ್ರ ಹಣವನ್ನು ಪಾವತಿಸಬೇಕಾಗುತ್ತದೆ. ಆದರೆ, ಖಾತೆಯು 21 ವರ್ಷಗಳ ನಂತರ ಮೆಚ್ಯೂರ್ ಆಗುತ್ತದೆ. ಈ ಮಧ್ಯಂತರ ಅವಧಿಯಲ್ಲೂ ಹಣದ ಮೇಲೆ ಬಡ್ಡಿ ಮುಂದುವರಿಯುವುದು ಈ ಯೋಜನೆಯ ವಿಶೇಷತೆ.
ಉದಾಹರಣೆಗೆ: ನಿಮ್ಮ ಮಗಳು ಜನಿಸಿದಾಗಿನಿಂದ ಪ್ರತಿ ವರ್ಷ ರೂ. 1.5 ಲಕ್ಷದಂತೆ 15 ವರ್ಷಗಳ ಕಾಲ ಹೂಡಿಕೆ ಮಾಡಿದರೆ, ನಿಮ್ಮ ಒಟ್ಟು ಹೂಡಿಕೆ ರೂ. 22.5 ಲಕ್ಷ ಆಗುತ್ತದೆ. 21 ವರ್ಷಗಳ ಮೆಚ್ಯೂರಿಟಿ ಅವಧಿಯ ಅಂತ್ಯಕ್ಕೆ ಬಡ್ಡಿಯೊಂದಿಗೆ ಒಟ್ಟು ಸುಮಾರು ರೂ. 71.82 ಲಕ್ಷ ಪಡೆಯುವ ಅವಕಾಶವಿರುತ್ತದೆ. ಹೆಣ್ಣುಮಕ್ಕಳ ಭವಿಷ್ಯದ ಆರ್ಥಿಕ ಭದ್ರತೆಗೆ ಇದು ಅತ್ಯುತ್ತಮ ಉಳಿತಾಯ ಆಯ್ಕೆಯಾಗಿದೆ.
