ನವದೆಹಲಿ: ದೇಶದ ಪ್ರಮುಖ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗಳಲ್ಲಿ ಒಂದಾದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ತನ್ನ ಗ್ರಾಹಕರಿಗೆ ಮಹತ್ವದ ಬದಲಾವಣೆ ಘೋಷಿಸಿದೆ. ನಗದು ವಿತ್‌ಡ್ರಾ ನಿಯಮಗಳಲ್ಲಿ ಬದಲಾವಣೆ ಮಾಡಲಾಗಿದ್ದು, ಅಕ್ಟೋಬರ್ 1ರಿಂದ ಹೊಸ ನಿಯಮಗಳು ಜಾರಿಗೆ ಬರಲಿವೆ.
ಈವರೆಗೆ SBIಯ ಬೇಸಿಕ್ ಸೇವಿಂಗ್ಸ್ ಬ್ಯಾಂಕ್ ಡೆಪಾಸಿಟ್ (BSBD) ಖಾತೆ ಹೊಂದಿರುವವರು ಎಷ್ಟು ಬಾರಿ ಬೇಕಾದರೂ ಉಚಿತವಾಗಿ ನಗದು ವಿತ್‌ಡ್ರಾ ಮಾಡಬಹುದಾಗಿತ್ತು. ಆದರೆ ಇದೀಗ ಬ್ಯಾಂಕ್ ನಗದು ವಹಿವಾಟಿಗೆ ಮಿತಿ ವಿಧಿಸಿದೆ.
1ರಿಂದ ಬೇಸಿಕ್ ಸೇವಿಂಗ್ಸ್ ಖಾತೆಯ ನಗದು ವಿತ್‌ಡ್ರಾ ನಿಯಮದಲ್ಲಿ ಬದಲಾವಣೆಯಾಗಲಿದ್ದು, ತಿಂಗಳಿಗೆ ನಾಲ್ಕು ಬಾರಿ ಮಾತ್ರ ಉಚಿತವಾಗಿ ಹಣ ಹಿಂಪಡೆಯಲು ಅವಕಾಶವಿರಲಿದೆ. ಈ ಮಿತಿಯನ್ನು ಮೀರಿದ ಪ್ರತಿ ವಿತ್‌ಡ್ರಾ ವಹಿವಾಟಿಗೆ ₹15 ಶುಲ್ಕದ ಜತೆಗೆ GST ಪಾವತಿಸಬೇಕಾಗುತ್ತದೆ.
ತಿಂಗಳಿಗೆ 4 ಬಾರಿ ಮಾತ್ರ ಉಚಿತ ವಿತ್‌ಡ್ರಾ
ಅಕ್ಟೋಬರ್ 1ರಿಂದ ಬೇಸಿಕ್ ಸೇವಿಂಗ್ಸ್ ಖಾತೆದಾರರು ತಿಂಗಳಿಗೆ ಗರಿಷ್ಠ 4 ಬಾರಿ ಮಾತ್ರ ಉಚಿತವಾಗಿ ನಗದು ವಿತ್‌ಡ್ರಾ ಮಾಡಬಹುದು.ನಾಲ್ಕು ವಹಿವಾಟುಗಳ ಮಿತಿ ಮೀರಿದ ಬಳಿಕ ಪ್ರತಿಯೊಂದು ಹೆಚ್ಚುವರಿ ನಗದು ವಿತ್‌ಡ್ರಾ ವಹಿವಾಟಿಗೆ ₹15 ಶುಲ್ಕ + GST ಪಾವತಿಸಬೇಕಾಗುತ್ತದೆ.ಅಂದರೆ, ತಿಂಗಳಲ್ಲಿ ನಾಲ್ಕಕ್ಕಿಂತ ಹೆಚ್ಚು ಬಾರಿ ನಗದು ವಿತ್‌ಡ್ರಾ ಮಾಡುವ ಗ್ರಾಹಕರಿಗೆ ಹೆಚ್ಚುವರಿ ಬ್ಯಾಂಕಿಂಗ್ ವೆಚ್ಚ ಎದುರಾಗಲಿದೆ.
ಡಿಜಿಟಲ್ ವಹಿವಾಟುಗಳಿಗೆ ಶುಲ್ಕವಿಲ್ಲ
ನಗದು ವಿತ್‌ಡ್ರಾಗೆ ಮಿತಿ ವಿಧಿಸಿದ್ದರೂ ಡಿಜಿಟಲ್ ವಹಿವಾಟುಗಳು ಉಚಿತವಾಗಿ ಮುಂದುವರಿಯಲಿವೆ ಎಂದು SBI ತಿಳಿಸಿದೆ. ಗ್ರಾಹಕರು UPI, NEFT, RTGS ಮತ್ತು IMPS ಮೂಲಕ ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ಡಿಜಿಟಲ್ ವಹಿವಾಟು ನಡೆಸಬಹುದು. ಡಿಜಿಟಲ್ ವಹಿವಾಟುಗಳಿಗೆ ಯಾವುದೇ ಮಿತಿ ವಿಧಿಸಲಾಗಿಲ್ಲ ಎಂದು ಬ್ಯಾಂಕ್ ಸ್ಪಷ್ಟಪಡಿಸಿದೆ.
ಯಾರಿಗೆ ಈ ಶುಲ್ಕ ಅನ್ವಯ?
ಬ್ರಾಂಚ್ ಚಾನೆಲ್ ಮೂಲಕ ಬೇಸಿಕ್ ಸೇವಿಂಗ್ಸ್ ಖಾತೆ ತೆರೆದಿರುವ ಗ್ರಾಹಕರಿಗೆ ನಗದು ವಿತ್‌ಡ್ರಾಗೆ ಸಂಬಂಧಿಸಿದಂತೆ ಈ ಶುಲ್ಕ ಅನ್ವಯವಾಗಲಿದೆ. ಆದರೆ ತಿಂಗಳಿಗೆ ನಾಲ್ಕು ನಗದು ವಿತ್‌ಡ್ರಾಗಳು ಉಚಿತವಾಗಿರುವುದರಿಂದ ನಿಯಮಿತವಾಗಿ ನಗದು ಬಳಸುವ ಬಹುತೇಕ ಗ್ರಾಹಕರ ಮೇಲೆ ಇದರ ಪರಿಣಾಮ ಸೀಮಿತವಾಗಿರಬಹುದು.
ಆದರೆ ನಾಲ್ಕು ವಹಿವಾಟುಗಳ ಮಿತಿಯನ್ನು ಮೀರಿದರೆ ಬ್ಯಾಂಕಿಂಗ್ ವೆಚ್ಚ ಹೆಚ್ಚಾಗುವ ಸಾಧ್ಯತೆಯಿದೆ. ಹೆಚ್ಚುವರಿ ಶುಲ್ಕ ತಪ್ಪಿಸಿಕೊಳ್ಳಲು ಸಾಧ್ಯವಾದಷ್ಟು ಡಿಜಿಟಲ್ ಪಾವತಿ ವಿಧಾನಗಳನ್ನು ಬಳಸುವುದು ಉತ್ತಮ.
ಬೇಸಿಕ್ ಸೇವಿಂಗ್ಸ್ ಖಾತೆ ಎಂದರೇನು?
ಬೇಸಿಕ್ ಸೇವಿಂಗ್ಸ್ ಖಾತೆಯನ್ನು ಸಾಮಾನ್ಯವಾಗಿ ಜೀರೋ ಬ್ಯಾಲೆನ್ಸ್ ಖಾತೆ ಎಂದು ಕರೆಯಲಾಗುತ್ತದೆ. ಈ ಖಾತೆಯಲ್ಲಿ ಕನಿಷ್ಠ ಬ್ಯಾಲೆನ್ಸ್ ಕಾಯ್ದುಕೊಳ್ಳುವ ಅಗತ್ಯವಿರುವುದಿಲ್ಲ.
ಅಲ್ಲದೆ, ಗ್ರಾಹಕರಿಗೆ ಉಚಿತ ATM/ಡೆಬಿಟ್ ಕಾರ್ಡ್ ಸೌಲಭ್ಯ ನೀಡಲಾಗುತ್ತದೆ ಮತ್ತು ಡೆಬಿಟ್ ಕಾರ್ಡ್‌ಗೆ ವಾರ್ಷಿಕ ಶುಲ್ಕವೂ ಇರುವುದಿಲ್ಲ. ಕನಿಷ್ಠ ಬ್ಯಾಲೆನ್ಸ್ ನಿರ್ವಹಿಸದೆ ಬ್ಯಾಂಕ್ ಖಾತೆ ಹೊಂದಲು ಬಯಸುವವರಿಗೆ ಈ ಖಾತೆ ಉಪಯುಕ್ತವಾಗಿದೆ.
