ಬೆಂಗಳೂರು: “ಎಳ್ಳು ಬೆಲ್ಲ ತಿಂದು ಒಳ್ಳೆಯ ಮಾತನಾಡೋಣ” ಎನ್ನುತ್ತಾ ರಾಜ್ಯಾದ್ಯಂತ ಮಕರ ಸಂಕ್ರಾಂತಿಯ ಸಂಭ್ರಮ ಮನೆಮಾಡಿದೆ. ಸೂರ್ಯನು ದಕ್ಷಿಣಾಯನದಿಂದ ಉತ್ತರಾಯಣಕ್ಕೆ ಪಥ ಬದಲಿಸುವ ಈ ಸುಗ್ಗಿಯ ಹಬ್ಬ, ಕೇವಲ ಎಳ್ಳು-ಬೆಲ್ಲಕ್ಕೆ ಸೀಮಿತವಾಗಿಲ್ಲ. ಈ ದಿನ ಮುಗಿಲಲ್ಲಿ ಬಣ್ಣ ಬಣ್ಣದ ಗಾಳಿಪಟಗಳು ಹಾರುವುದು ಸಾಮಾನ್ಯ ದೃಶ್ಯ. ಆದರೆ, ಸಂಕ್ರಾಂತಿ ಮತ್ತು ಗಾಳಿಪಟದ ನಡುವಿನ ನಂಟೇನು? ಇದರ ಹಿಂದೆ ಧಾರ್ಮಿಕ ನಂಬಿಕೆ ಮಾತ್ರವಿದೆಯೇ ಅಥವಾ ವೈಜ್ಞಾನಿಕ ಸತ್ಯವಿದೆಯೇ? ಇಲ್ಲಿದೆ ಇಂಟರೆಸ್ಟಿಂಗ್ ಮಾಹಿತಿ.
ಧಾರ್ಮಿಕ ಹಿನ್ನೆಲೆ: ಶ್ರೀರಾಮನೇ ಶುರುಮಾಡಿದ ಸಂಪ್ರದಾಯ
ಪುರಾಣಗಳ ಪ್ರಕಾರ, ಮಕರ ಸಂಕ್ರಾಂತಿಯಂದು ಗಾಳಿಪಟ ಹಾರಿಸುವ ಸಂಪ್ರದಾಯ ತ್ರೇತಾಯುಗದಿಂದಲೇ ಆರಂಭವಾಗಿದೆ ಎನ್ನಲಾಗುತ್ತದೆ. ಭಗವಾನ್ ಶ್ರೀರಾಮನು ಸಂಕ್ರಾಂತಿಯ ಶುಭ ದಿನದಂದು ತನ್ನ ಸಹೋದರರು ಮತ್ತು ಹನುಮಂತನೊಂದಿಗೆ ಗಾಳಿಪಟ ಹಾರಿಸಿ ಸಂಭ್ರಮಿಸುತ್ತಿದ್ದನಂತೆ. ಅಂದಿನಿಂದ ಈ ಪದ್ಧತಿ ಇಂದಿಗೂ ಮುಂದುವರಿದಿದೆ ಎಂಬ ಬಲವಾದ ನಂಬಿಕೆಯಿದೆ.
ಅಷ್ಟೇ ಅಲ್ಲ, ಉತ್ತರಾಯಣ ಪುಣ್ಯಕಾಲದಲ್ಲಿ ಸ್ವರ್ಗದ ಬಾಗಿಲು ತೆರೆದಿರುತ್ತದೆ ಎಂಬ ನಂಬಿಕೆಯೂ ಇದೆ. ಈ ಸಮಯದಲ್ಲಿ ಹಾರುವ ಗಾಳಿಪಟಗಳು ನಮ್ಮ ಕೃತಜ್ಞತೆಯನ್ನು ದೇವರಿಗೆ ತಲುಪಿಸುತ್ತವೆ ಎಂದು ಜನರು ನಂಬುತ್ತಾರೆ.
ವೈಜ್ಞಾನಿಕ ರಹಸ್ಯ: ಇದು ವಿಟಮಿನ್ ಡಿ ಪಡೆಯುವ ಉಪಾಯ
ಸಂಕ್ರಾಂತಿಯ ದಿನ ಪಟ ಹಾರಿಸುವುದರ ಹಿಂದೆ ಅದ್ಭುತ ವೈಜ್ಞಾನಿಕ ಕಾರಣವೂ ಅಡಗಿದೆ. ಚಳಿಗಾಲದ ಕೊನೆಯಲ್ಲಿ ದೇಹದಲ್ಲಿ ಸಾಕಷ್ಟು ಬ್ಯಾಕ್ಟೀರಿಯಾಗಳು ಇರುತ್ತವೆ ಮತ್ತು ರೋಗನಿರೋಧಕ ಶಕ್ತಿ ಕಡಿಮೆಯಾಗಿರುತ್ತದೆ.
ನೈಸರ್ಗಿಕ ಚಿಕಿತ್ಸೆ: ಗಾಳಿಪಟ ಹಾರಿಸುವ ನೆಪದಲ್ಲಿ ನಾವು ಗಂಟೆಗಟ್ಟಲೆ ಬಿಸಿಲಿನಲ್ಲಿ ಕಾಲ ಕಳೆಯುತ್ತೇವೆ.
ಆರೋಗ್ಯ ಲಾಭ: ಮುಂಜಾನೆಯ ಸೂರ್ಯನ ಕಿರಣಗಳು ನೇರವಾಗಿ ದೇಹದ ಮೇಲೆ ಬಿದ್ದಾಗ ಬ್ಯಾಕ್ಟೀರಿಯಾಗಳು ನಾಶವಾಗುತ್ತವೆ ಮತ್ತು ದೇಹಕ್ಕೆ ಹೇರಳವಾಗಿ ವಿಟಮಿನ್ ಡಿ ದೊರೆಯುತ್ತದೆ. ಇದು ಚರ್ಮದ ಸಮಸ್ಯೆಗಳನ್ನು ನಿವಾರಿಸಿ ಮೂಳೆಗಳನ್ನು ಬಲಪಡಿಸುತ್ತದೆ.
ಹಬ್ಬದ ವಿಶೇಷತೆಗಳು:
ಖಗೋಳ ವಿದ್ಯಮಾನ: ಬೆಂಗಳೂರಿನ ಗವಿಗಂಗಾಧರೇಶ್ವರ ದೇವಸ್ಥಾನದಲ್ಲಿ ಸೂರ್ಯರಶ್ಮಿ ಶಿವಲಿಂಗಕ್ಕೆ ಸ್ಪರ್ಶವಾಗುವ ಅಪರೂಪದ ವಿದ್ಯಮಾನಕ್ಕೆ ಈ ದಿನ ಸಾಕ್ಷಿಯಾಗಬಹುದು.
ಮಕರ ಜ್ಯೋತಿ: ಶಬರಿಮಲೆಯಲ್ಲಿ ಮಕರ ಜ್ಯೋತಿಯ ದರ್ಶನ ಪಡೆದು ಭಕ್ತರು ಪುನೀತರಾಗುತ್ತಾರೆ.
ಸಾಮೂಹಿಕ ಸಂಭ್ರಮ: ಮನೆಗಳ ಮಹಡಿ ಮೇಲೆ, ಮೈದಾನಗಳಲ್ಲಿ ನಡೆಯುವ ಗಾಳಿಪಟ ಸ್ಪರ್ಧೆಗಳು ಬಾಂಧವ್ಯದ ಬೆಸುಗೆಯನ್ನು ಗಟ್ಟಿಗೊಳಿಸುತ್ತವೆ.
