ಆಸ್ಪತ್ರೆಯೊಂದರಲ್ಲಿ ಫಾರ್ಮಸಿಸ್ಟ್ ಹುದ್ದೆಗೆ ಸಂದರ್ಶನಕ್ಕೆ ತೆರಳಿದ್ದ ಆಶಾ ಎಂಬ ಯುವತಿ, ಉದ್ಯೋಗದ ವಾಸ್ತವ ಸ್ಥಿತಿಯನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಅದು ಈಗ ಭಾರೀ ಚರ್ಚೆಗೆ ಕಾರಣವಾಗಿದೆ. ಸಂದರ್ಶನಕ್ಕೆ ಹೋಗುವ ಮುನ್ನ ಆಸ್ಪತ್ರೆಯ ನೆಲ ಸ್ವಚ್ಛಗೊಳಿಸುತ್ತಿದ್ದ ಮಹಿಳೆಯೊಂದಿಗೆ ಮಾತನಾಡಿದ ಆಶಾ, “ನಿಮಗೆ ಎಷ್ಟು ಸಂಬಳ ಸಿಗುತ್ತದೆ?” ಎಂದು ಕೇಳಿದ್ದರು. ಅದಕ್ಕೆ ಆ ಮಹಿಳೆ ತಿಂಗಳಿಗೆ ₹16,000 ಸಂಬಳ ಪಡೆಯುತ್ತಿರುವುದಾಗಿ ತಿಳಿಸಿದರು.
ಇದನ್ನು ಕೇಳಿದ ಆಶಾ, ಫಾರ್ಮಸಿಸ್ಟ್ ಹುದ್ದೆಗೆ ಕನಿಷ್ಠ ₹18,000 ರಿಂದ ₹20,000 ಸಂಬಳ ಸಿಗಬಹುದು ಎಂದು ನಿರೀಕ್ಷಿಸಿದ್ದರು.ಆದರೆ ಸಂದರ್ಶನದ ವೇಳೆ ಮಾನವ ಸಂಪನ್ಮೂಲ (HR) ವಿಭಾಗದ ಸಿಬ್ಬಂದಿ, “ಫಾರ್ಮಸಿಸ್ಟ್ ಆಗಿ ಪೂರ್ವ ಅನುಭವ ಇದೆಯೇ?” ಎಂದು ಪ್ರಶ್ನಿಸಿದರು. ಆಶಾ ತಾವು ಫಾರ್ಮಸಿ ಕ್ಷೇತ್ರದಲ್ಲಿ ಹೊಸಬರಾಗಿದ್ದರೂ, ಆರೋಗ್ಯ ಕ್ಷೇತ್ರದಲ್ಲಿ ನಾಲ್ಕು ವರ್ಷಗಳ ಅನುಭವವಿದೆ ಎಂದು ತಿಳಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ HR, 10 ಗಂಟೆಗಳ ಕೆಲಸಕ್ಕೆ ತಿಂಗಳಿಗೆ ₹12,000 ರಿಂದ ₹14,000 ಮಾತ್ರ ಸಂಬಳ ನೀಡಲಾಗುತ್ತದೆ ಎಂದು ಹೇಳಿದರು.
“ನಿಮ್ಮ ಕೆಲಸದ ಆಧಾರದ ಮೇಲೆ ₹12,000, ₹13,000 ಅಥವಾ ₹14,000 ಸಂಬಳ ನೀಡುತ್ತೇವೆ. ಸಾಮಾನ್ಯವಾಗಿ ನಾವು ಫ್ರೆಶರ್ಗಳನ್ನು ನೇಮಕ ಮಾಡುವುದಿಲ್ಲ. ನೇಮಕ ಮಾಡಿದರೂ ಆರಂಭಿಕ ವೇತನ ₹12,000 ರಿಂದ ₹14,000 ಮಾತ್ರ,” ಎಂದು HR ತಿಳಿಸಿದ್ದಾರಂತೆ.ಈ ಅನುಭವವನ್ನು ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡ ಆಶಾ, “ಫಾರ್ಮಸಿಸ್ಟ್ ಉದ್ಯೋಗ ಹುಡುಕಾಟದ ನಿಜವಾದ ವಾಸ್ತವ ಇದು” ಎಂದು ಬರೆದುಕೊಂಡಿದ್ದಾರೆ.
ನೆಟ್ಟಿಗರ ಪ್ರತಿಕ್ರಿಯೆ
ಈ ವಿಡಿಯೋ ವೈರಲ್ ಆದ ಬಳಿಕ ಅನೇಕರು ಪ್ರತಿಕ್ರಿಯಿಸಿದ್ದಾರೆ.”ದೊಡ್ಡ ಆಸ್ಪತ್ರೆಗಳಲ್ಲೂ 10-12 ಗಂಟೆ ಕೆಲಸ ಮಾಡಿಸಿ ₹12,000-15,000 ಮಾತ್ರ ಕೊಡುತ್ತಾರೆ. ಕಡಿತಗಳ ಬಳಿಕ ಕೈಗೆ ₹10,000 ಕೂಡ ಸಿಗುವುದಿಲ್ಲ. ಇದು ಕಹಿ ಸತ್ಯ,” ಎಂದು ಒಬ್ಬರು ಬರೆದಿದ್ದಾರೆ.”ಆಸ್ಪತ್ರೆ ಮಾತ್ರವಲ್ಲ, ಬಹುತೇಕ ಎಲ್ಲಾ ಕ್ಷೇತ್ರಗಳಲ್ಲೂ ಇದೇ ಪರಿಸ್ಥಿತಿ. ಕಡಿಮೆ ಸಂಬಳಕ್ಕೆ ಹೆಚ್ಚು ಕೆಲಸ ಮಾಡಿಸಬೇಕೆಂಬ ಮನೋಭಾವ ಹೆಚ್ಚಾಗಿದೆ,” ಎಂದು ಮತ್ತೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ.ಇಂದು ಪದವಿಗೆ ಬೆಲೆ ಕಡಿಮೆಯಾಗಿದೆ. ಹಲವು ಮನೆಗಳಲ್ಲಿ ಕೆಲಸ ಮಾಡುವವರ ಆದಾಯವೇ ಕೆಲ ಪದವೀಧರರಿಗಿಂತ ಹೆಚ್ಚಿದೆ,” ಎಂದು ಇನ್ನೊಬ್ಬರು ಹೇಳಿದ್ದಾರೆ. ಭಾರತದಲ್ಲಿ ಉದ್ಯೋಗಾರ್ಥಿಗಳ ಅತಿಯಾದ ಲಭ್ಯತೆಯೇ ಇದಕ್ಕೆ ಕಾರಣ. ಕಡಿಮೆ ಸಂಬಳಕ್ಕೆ ಕೆಲಸ ಮಾಡಲು ನೂರಾರು ಜನ ಸಿದ್ಧರಿರುವಾಗ ಸಂಸ್ಥೆಗಳು ಹೆಚ್ಚು ವೇತನ ನೀಡುವುದಿಲ್ಲ,” ಎಂದು ಮತ್ತೊಬ್ಬ ನೆಟ್ಟಿಗರು ಪ್ರತಿಕ್ರಿಯಿಸಿದ್ದಾರೆ.
