ಗುರುಗ್ರಾಮದ ರೆಸ್ಟೋರೆಂಟ್ ಸಲಾಡ್ನಲ್ಲಿ ಹುಳು, ಗ್ರೇಟರ್ ನೋಯ್ಡಾದ ಕೆಎಫ್ಸಿ ಚಿಕನ್ನಲ್ಲಿ ಹುಳು ಹಾಗೂ ಮುಂಬೈನ ಬೇಕರಿಯ ಪೇಸ್ಟ್ರಿ ಟ್ರೇ ಮೇಲೆ ಜಿರಳೆಗಳು ಓಡಾಡುತ್ತಿದ್ದ ಘಟನೆಗಳು ಮಾಸುವ ಮುನ್ನವೇ, ದೇಶದಲ್ಲಿ ಹೋಟೆಲ್ ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯದ ಗಂಭೀರ ಕೊರತೆಯನ್ನು ಎತ್ತಿ ತೋರಿಸುವ ಮತ್ತೊಂದು ಅಸಹ್ಯಕರ ಘಟನೆ ಮಹಾರಾಷ್ಟ್ರದ ಪುಣೆಯಲ್ಲಿ ಬೆಳಕಿಗೆ ಬಂದಿದೆ.
ಪುಣೆಯ ಪ್ರಸಿದ್ಧ ಹೋಟೆಲ್ ಒಂದರಲ್ಲಿ ಗ್ರಾಹಕರೊಬ್ಬರು ಆರ್ಡರ್ ಮಾಡಿದ ರೊಟ್ಟಿಯೊಳಗೆ ಹಳದಿ ಬಣ್ಣದ ರಬ್ಬರ್ ಬ್ಯಾಂಡ್ ಹಿಟ್ಟಿನ ಜೊತೆಯೇ ಸೇರಿ ಬೆಂದಿರುವುದು ಪತ್ತೆಯಾಗಿದ್ದು, ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ರೊಟ್ಟಿ ಮುರಿದಾಗ ಕೈಗೆ ಸಿಕ್ತು ರಬ್ಬರ್ ಬ್ಯಾಂಡ್
ಸಾಮಾಜಿಕ ಜಾಲತಾಣವಾದ ಎಕ್ಸ್ನಲ್ಲಿ (ಟ್ವಿಟರ್) ಪತ್ರಕರ್ತ ರವೀಂದ್ರ ಎಂಬುವವರು ಹಂಚಿಕೊಂಡಿರುವ ವಿಡಿಯೋದ ಪ್ರಕಾರ, ಪುಣೆಯ ‘ಸಂದೀಪ್ ಹೋಟೆಲ್’ನಲ್ಲಿ ಈ ಘಟನೆ ನಡೆದಿದೆ ಎನ್ನಲಾಗಿದೆ.
ಗ್ರಾಹಕ ಊಟ ಮಾಡಲು ರೊಟ್ಟಿಯನ್ನು ಮುರಿಯುತ್ತಿದ್ದಂತೆ, ಅದರೊಳಗೆ ಹಿಟ್ಟಿನೊಂದಿಗೆ ನಾದಿ, ಹಂಚಿನ ಮೇಲೆ ಬೇಯಿಸಲಾಗಿದ್ದ ಹಳದಿ ರಬ್ಬರ್ ಬ್ಯಾಂಡ್ ಸಿಕ್ಕಿಬಿದ್ದಿದೆ. ಶಾಕ್ ಮತ್ತು ಅಸಹ್ಯದಿಂದ ಗ್ರಾಹಕ ಆ ರಬ್ಬರ್ ಬ್ಯಾಂಡ್ ಅನ್ನು ಕೈಯಲ್ಲಿ ಎಳೆದು ತೋರಿಸುತ್ತಿರುವ ದೃಶ್ಯ ವಿಡಿಯೋದಲ್ಲಿದೆ.
“ಹಿಂದೆಲ್ಲಾ ಹೋಟೆಲ್ ಊಟದಲ್ಲಿ ಕೂದಲು ಅಥವಾ ನೊಣಗಳು ಸಿಗುತ್ತಿದ್ದವು, ಈಗ ರಬ್ಬರ್ ಬ್ಯಾಂಡ್ಗಳು ಟ್ರೆಂಡ್ ಆಗಿವೆ ! ಪುಣೆಯ ಸಂದೀಪ್ ಹೋಟೆಲ್ ರೊಟ್ಟಿಯೊಳಗೆ ರಬ್ಬರ್ ನೀಡುತ್ತಿದೆ. ಹೊರಗಡೆ ತಿನ್ನುವ ಮುನ್ನ ಜಾಗರೂಕರಾಗಿರಿ” ಎಂದು ಪೋಸ್ಟ್ನಲ್ಲಿ ಎಚ್ಚರಿಸಲಾಗಿದೆ.
ಆಹಾರ ಸುರಕ್ಷತಾ ಪ್ರಾಧಿಕಾರಕ್ಕೆ ದೂರು
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರಕ್ಕೆ (FSSAI) ಟ್ಯಾಗ್ ಮಾಡಿ, ಇಂತಹ ಬೇಜವಾಬ್ದಾರಿ ಹೋಟೆಲ್ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ.
ಇಂಟರ್ನೆಟ್ನಲ್ಲಿ ನೆಟ್ಟಿಗರು ವ್ಯಂಗ್ಯ ಹಾಗೂ ಆಕ್ರೋಶದಿಂದ ಪ್ರತಿಕ್ರಿಯಿಸುತ್ತಿದ್ದಾರೆ:
“ಹಿಟ್ಟನ್ನು ಬಿಡಿ ಪ್ಲಾಸ್ಟಿಕ್ ಕವರ್ನಲ್ಲಿ ತಂದಿರಬೇಕು, ಆ ಕವರ್ಗೆ ಕಟ್ಟಿದ್ದ ರಬ್ಬರ್ ಬ್ಯಾಂಡ್ ಅನ್ನು ಹಿಟ್ಟಿನ ಜೊತೆಗೆ ಕಲಸಿ ಗ್ರಾಹಕರಿಗೆ ‘ಫ್ರೀ ಆಫರ್’ ಆಗಿ ಪಾಸ್ ಮಾಡಿದ್ದಾರೆ ಅಷ್ಟೇ!” ಎಂದು ಓರ್ವ ಬಳಕೆದಾರ ವ್ಯಂಗ್ಯವಾಡಿದ್ದಾರೆ.
“ಅಷ್ಟೊಂದು ಶಾಖದಲ್ಲಿ ರೊಟ್ಟಿ ಬೇಯಿಸುವಾಗ ಈ ರಬ್ಬರ್ ಬ್ಯಾಂಡ್ ಕರಗದೆ ಹಾಗೇ ಉಳಿದುಕೊಂಡಿದ್ದು ಹೇಗೆ?” ಎಂದು ಮತ್ತೊಬ್ಬರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಹೊರಗಿನ ಹೋಟೆಲ್ಗಳು ಮತ್ತು ರೆಸ್ಟೋರೆಂಟ್ಗಳಲ್ಲಿ ಆಹಾರ ತಯಾರಿಕೆಯ ನೈರ್ಮಲ್ಯ ದಿನದಿಂದ ದಿನಕ್ಕೆ ಹದಗೆಡುತ್ತಿರುವುದಕ್ಕೆ ಈ ಘಟನೆ ಮತ್ತೊಂದು ಕನ್ನಡಿ ಹಿಡಿದಿದ್ದು, ನಾಗರಿಕರು ಹೊರಗಡೆ ಆಹಾರ ಸೇವಿಸುವ ಮುನ್ನ ಹತ್ತು ಬಾರಿ ಯೋಚಿಸುವಂತಾಗಿದೆ.
