ಲಾಸ್ ಏಂಜಲೀಸ್ನಲ್ಲಿ ನಡೆದ ‘ದಿ ಬ್ಲಫ್’ ಚಿತ್ರದ ವರ್ಲ್ಡ್ ಪ್ರೀಮಿಯರ್ ಸಂಭ್ರಮದಲ್ಲಿ ಬಾಲಿವುಡ್ ಮತ್ತು ಹಾಲಿವುಡ್ ಖ್ಯಾತಿಯ ಪ್ರಿಯಾಂಕಾ ಚೋಪ್ರಾ ಎಲ್ಲರ ಗಮನ ಸೆಳೆದಿದ್ದಾರೆ. ಫೆಬ್ರವರಿ 17 ರಂದು ನಡೆದ ಈ ಕಾರ್ಯಕ್ರಮದ ರೆಡ್ ಕಾರ್ಪೆಟ್ ಮೇಲೆ ಪ್ರಿಯಾಂಕಾ ತಮ್ಮ ವಿಭಿನ್ನ ಶೈಲಿಯ ಉಡುಪಿನ ಮೂಲಕ ಹೊಸ ಸಂಚಲನ ಮೂಡಿಸಿದರು.
ತಮ್ಮ ಪಾತ್ರಕ್ಕೆ ಪೂರಕವಾಗಿ ವಿನ್ಯಾಸಗೊಳಿಸಲಾದ ವಿಶೇಷ ಬ್ರೌನ್ ಬಣ್ಣದ ಲೇದರ್ ಗೌನ್ ಧರಿಸಿದ್ದ ಪ್ರಿಯಾಂಕಾ ಅತ್ಯಂತ ಗತ್ತಿನಿಂದ ಕಾಣಿಸಿಕೊಂಡರು. ಈ ಉಡುಪಿನ ಮೇಲ್ಭಾಗವು ಲೇದರ್ ಕವಚದಂತೆ (ಬ್ರೆಸ್ಟ್ಪ್ಲೇಟ್) ಇದ್ದು ಇದು ಅವರ ಚಿತ್ರದ ‘ಬ್ಲಡಿ ಮೇರಿ’ ಎಂಬ ಪಾತ್ರದ ಶೌರ್ಯವನ್ನು ಪ್ರತಿಬಿಂಬಿಸುವಂತಿತ್ತು. ಇದಕ್ಕೆ ಪೂರಕವಾಗಿ ಸೈಡ್ ಬಕಲ್ ಮತ್ತು ಆಕರ್ಷಕ ಹೊಲಿಗೆಗಳ ವಿನ್ಯಾಸವು ಉಡುಪಿಗೆ ಮತ್ತಷ್ಟು ಮೆರುಗು ನೀಡಿತ್ತು.
ಈ ಉಡುಪಿನ ಕೆಳಭಾಗವು ಮೃದುವಾದ ಬ್ರೌನ್ ಬಣ್ಣದ ಬಟ್ಟೆಯಿಂದ ಕೂಡಿದ್ದು ಕಾಲಿನ ಬಳಿ ಹೈ ಸ್ಲಿಟ್ ವಿನ್ಯಾಸವನ್ನು ಹೊಂದಿತ್ತು. ಇದು ಕೇವಲ ಸ್ಟೈಲ್ ಮಾತ್ರವಲ್ಲದೆ ಅವರ ವ್ಯಕ್ತಿತ್ವಕ್ಕೆ ತಕ್ಕ ಶಿಸ್ತನ್ನು ನೀಡುವಂತಿತ್ತು. ಸರಳವಾದ ಬ್ರೌನ್ ಹೈ ಹೀಲ್ಸ್ ಧರಿಸಿದ್ದ ಅವರು ತಮ್ಮ ನೋಟವನ್ನು ಕೇವಲ ಒಂದು ಸಿಲ್ವರ್ ಚೋಕರ್ ನೆಕ್ಲೇಸ್ ಮೂಲಕ ಪೂರ್ಣಗೊಳಿಸಿದ್ದರು. ಅವರ ಕುತ್ತಿಗೆಯಲ್ಲಿದ್ದ ದೊಡ್ಡ ಕಲ್ಲಿನ ಹಾರವು ಅವರ ಒಟ್ಟಾರೆ ಸೌಂದರ್ಯವನ್ನು ಮತ್ತಷ್ಟು ಎತ್ತಿ ತೋರಿಸುತ್ತಿತ್ತು.
ಮೇಕಪ್ ವಿಚಾರಕ್ಕೆ ಬಂದರೆ ಪ್ರಿಯಾಂಕಾ ನ್ಯಾಚುರಲ್ ಲುಕ್ಗೆ ಆದ್ಯತೆ ನೀಡಿದ್ದರು. ರೋಸ್ ಬ್ರೌನ್ ಲಿಪ್ಸ್ಟಿಕ್ ಮತ್ತು ಕಣ್ಣುಗಳಿಗೆ ನೀಡಿದ್ದ ಲೈನರ್ ಟಚ್ ಅವರ ಮುಖದ ಕಾಂತಿಯನ್ನು ಹೆಚ್ಚಿಸಿತ್ತು. ಕೂದಲಿಗೆ ಕೆಂಪು ಬಣ್ಣದ ಹೈಲೈಟ್ಸ್ ಮಾಡಿಸಿಕೊಂಡಿದ್ದ ಅವರು ಹದವಾದ ಅಲೆಗಳಂತೆ ಹರಡಿಕೊಂಡಿದ್ದ ಕೇಶವಿನ್ಯಾಸದಲ್ಲಿ ಮಿಂಚುತ್ತಿದ್ದರು. ಒಟ್ಟಾರೆಯಾಗಿ ‘ದಿ ಬ್ಲಫ್’ ಚಿತ್ರದ ಪ್ರೀಮಿಯರ್ನಲ್ಲಿ ಪ್ರಿಯಾಂಕಾ ಕೇವಲ ನಟಿಯಾಗಿ ಮಾತ್ರವಲ್ಲದೆ ಫ್ಯಾಷನ್ ಐಕಾನ್ ಆಗಿಯೂ ಎಲ್ಲರ ಮನಗೆದ್ದರು.
