ಜಗತ್ತೇ ತಲೆತಗ್ಗಿಸುವಂತಹ ಅತ್ಯಂತ ಅಮಾನವೀಯ ಘಟನೆಯೊಂದು ಝಾರ್ಖಂಡ್ನ ಗುಮ್ಲಾ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಕೇವಲ ಮೂರು ವರ್ಷದ ಹೆಣ್ಣು ಮಗುವಿನ ಮೇಲೆ ನಡೆದ ಘೋರ ಅತ್ಯಾಚಾರ ಪ್ರಕರಣವನ್ನು ಕಾನೂನಿನ ಕೈಗೆ ಒಪ್ಪಿಸುವ ಬದಲು, ಗ್ರಾಮ ಪಂಚಾಯತ್ ಸಭೆ ನಡೆಸಿ ಪ್ರಕರಣವನ್ನು ಹಳ್ಳಿಯಲ್ಲೇ ಮುಚ್ಚಿಹಾಕಲು ಯತ್ನಿಸಿದೆ. ಅಷ್ಟೇ ಅಲ್ಲದೆ, ಆರೋಪಿಗೆ ದಂಡ ವಿಧಿಸಿ ಆ ಹಣದಲ್ಲಿ ಇಡೀ ಗ್ರಾಮಸ್ಥರು ಮಾಂಸ ಹಾಗೂ ಮದ್ಯದ ಔತಣಕೂಟ ನಡೆಸಿ ಸಂಭ್ರಮಿಸುತ್ತಿದ್ದ ಆಘಾತಕಾರಿ ನಗ್ನ ಸತ್ಯ ಬಯಲಾಗಿದೆ.
ನಡೆದಿದ್ದೇನು?: ಗುಮ್ಲಾ ಜಿಲ್ಲೆಯ ಘಾಘ್ರಾ ಪೊಲೀಸ್ ಠಾಣಾ ವ್ಯಾಪ್ತಿಯ ಹಳ್ಳಿಯೊಂದರಲ್ಲಿ ಶನಿವಾರ ಸಂಜೆ ಈ ದುಷ್ಕೃತ್ಯ ನಡೆದಿದೆ. ಆರೋಪಿ ಸುನಿಲ್ ಲೋಹಾರ ಎಂಬಾತ ಸಂತ್ರಸ್ತ ಮಗುವಿನ ಮನೆಗೆ ಬಂದಿದ್ದನು. ಆ ಸಮಯದಲ್ಲಿ ಮಗುವಿನ ತಾಯಿ ಗೃಹಕೃತ್ಯದಲ್ಲಿ ನಿರತರಾಗಿದ್ದರು. ಮಗುವನ್ನು ತಾನು ಆಡಿಸುವುದಾಗಿ ಹೇಳಿ ನಂಬಿಸಿದ ಆರೋಪಿ, ತಾಯಿಯ ಕಣ್ಣು ತಪ್ಪಿಸಿ ಮಗುವನ್ನು ಪಕ್ಕದ ಕೋಣೆಗೆ ಕರೆದೊಯ್ದು ಅತ್ಯಾಚಾರ ಎಸಗಿದ್ದಾನೆ.
ಮಗು ನೋವಿನಿಂದ ಕಿರುಚಾಡುತ್ತಾ ತೀವ್ರವಾಗಿ ಅಳಲಾರಂಭಿಸಿದಾಗ ತಾಯಿ ಧಾವಿಸಿ ಬಂದಿದ್ದಾರೆ. ತಕ್ಷಣವೇ ಮಗುವನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ.
ಪೊಲೀಸ್ ಠಾಣೆ ಮೆಟ್ಟಿಲೇರಲು ಬಿಡದ ಪಂಚಾಯತ್! ಮಗುವಿಗೆ ಆದ ಅನ್ಯಾಯದ ವಿರುದ್ಧ ತಾಯಿ ಪೊಲೀಸ್ ದೂರು ನೀಡಲು ಮುಂದಾಗಿದ್ದರು. ಆದರೆ, ವಿಷಯ ತಿಳಿದ ಗ್ರಾಮದ ಕೆಲ ಮುಖಂಡರು ಪ್ರಕರಣವನ್ನು ಪೊಲೀಸ್ ಠಾಣೆಗೆ ಕೊಂಡೊಯ್ಯದಂತೆ ತಡೆಯೊಡ್ಡಿದ್ದಾರೆ. ಹಳ್ಳಿಯಲ್ಲೇ ವಿಷಯ ಇತ್ಯರ್ಥಪಡಿಸಬೇಕೆಂದು ಒತ್ತಡ ಹೇರಿ ಭಾನುವಾರ ತುರ್ತು ಪಂಚಾಯತ್ ಸಭೆ ಕರೆದಿದ್ದಾರೆ. ಸಭೆಯಲ್ಲಿ ಆರೋಪಿ ಸುನಿಲ್ ಲೋಹಾರನಿಗೆ 1 ಲಕ್ಷ ರೂಪಾಯಿ ದಂಡ ವಿಧಿಸಿ, ಕಾನೂನು ಕ್ರಮದಿಂದ ಆತನನ್ನು ರಕ್ಷಿಸಲು ಸಂಚು ರೂಪಿಸಲಾಗಿದೆ.
ದಂಡದ ಹಣದಲ್ಲಿ ಪಾರ್ಟಿ ಸಂಭ್ರಮ! ಪಂಚಾಯತ್ ತೀರ್ಪಿನ ಬೆನ್ನಲ್ಲೇ ಆರೋಪಿ ಸುನಿಲ್ 1 ಲಕ್ಷ ರೂ. ದಂಡದ ಪೈಕಿ ತಕ್ಷಣವೇ 20,000 ರೂಪಾಯಿ ನಗದನ್ನು ಪಂಚಾಯತ್ಗೆ ಪಾವತಿಸಿದ್ದಾನೆ. ಉಳಿದ 80,000 ರೂಪಾಯಿಗಳನ್ನು ಒಂದು ವಾರದೊಳಗೆ ನೀಡುವಂತೆ ಸೂಚಿಸಲಾಗಿದೆ. ಹೀಗೆ ಬಂದ 20 ಸಾವಿರ ರೂಪಾಯಿ ಹಣವನ್ನು ಮಗುವಿನ ಚಿಕಿತ್ಸೆಗೋ ಅಥವಾ ಆಕೆಯ ಕುಟುಂಬಕ್ಕೋ ನೀಡುವ ಬದಲಿಗೆ, ಪಂಚಾಯತ್ ಸದಸ್ಯರು ಇಡೀ ಹಳ್ಳಿಗೆ ಮಾಂಸದ ಊಟ ಹಾಗೂ ಮದ್ಯದ ಪಾರ್ಟಿ ಆಯೋಜಿಸಿದ್ದರು!
ಪಾರ್ಟಿ ನಡೆಯುತ್ತಿದ್ದಾಗಲೇ ಪೊಲೀಸರ ಎಂಟ್ರಿ! ಗ್ರಾಮದಲ್ಲಿ ಪ್ರಕರಣವನ್ನು ಹತ್ತಿಕ್ಕಲು ತೀವ್ರ ಒತ್ತಡ ಹೇರಲಾಗುತ್ತಿದೆ ಮತ್ತು ದಂಡದ ಹಣದಲ್ಲಿ ಮದ್ಯದ ಪಾರ್ಟಿ ನಡೆಯುತ್ತಿದೆ ಎಂಬ ರಹಸ್ಯ ಮಾಹಿತಿ ಘಾಘ್ರಾ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಮೋಹನ್ ಕುಮಾರ್ ಅವರಿಗೆ ತಲುಪಿದೆ. ತಕ್ಷಣವೇ ಅಲರ್ಟ್ ಆದ ಪೊಲೀಸರು ಭಾನುವಾರ ಹಳ್ಳಿಗೆ ದಾಳಿ ನಡೆಸಿದ್ದಾರೆ.
ಪೊಲೀಸರು ಸ್ಥಳಕ್ಕೆ ತಲುಪಿದಾಗ ಹಳ್ಳಿಯಲ್ಲಿ ಔತಣಕೂಟ ಜೋರಾಗಿ ನಡೆಯುತ್ತಿತ್ತು. ಪೊಲೀಸರು ದಾಳಿ ನಡೆಸಿ ಸಂಭ್ರಮಾಚರಣೆಯಲ್ಲಿದ್ದ ಆರೋಪಿ ಸುನಿಲ್ ಲೋಹಾರನನ್ನು ವಶಕ್ಕೆ ಪಡೆದಿದ್ದಾರೆ. ತಕ್ಷಣವೇ ಸಂತ್ರಸ್ತ ಮಗುವಿನ ತಾಯಿಯಿಂದ ಅಧಿಕೃತ ಹೇಳಿಕೆ ದಾಖಲಿಸಿಕೊಂಡು ಪೋಕ್ಸೋ (POCSO) ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಅರಂಗಿ ಪಂಚಾಯತ್ ಮುಖ್ಯಸ್ಥ ಲೋಡೋ ಎಕ್ಕಾ, “ಪಾಲ್ಮಾ ಗ್ರಾಮದಲ್ಲಿ ಈ ಸಭೆ ನಡೆದಿರುವುದು ನಿಜ. ಆದರೆ ಈ ಸಭೆಯ ಕುರಿತು ನನಗೆ ಯಾವುದೇ ಪೂರ್ವ ಮಾಹಿತಿ ಇರಲಿಲ್ಲ. ಪೊಲೀಸರು ಬಂದು ದಾಳಿ ನಡೆಸಿದ ಮೇಲಷ್ಟೇ ನನಗೆ ವಿಷಯ ತಿಳಿಯಿತು” ಎಂದು ಸ್ಪಷ್ಟನೆ ನೀಡಿದ್ದಾರೆ. ಸದ್ಯ ಆರೋಪಿಯನ್ನು ಜೈಲಿಗಟ್ಟಲಾಗಿದ್ದು, ಮಗುವಿನ ಮೇಲಿನ ಅತ್ಯಾಚಾರವನ್ನು ಮುಚ್ಚಿಹಾಕಲು ಯತ್ನಿಸಿದ ಪಂಚಾಯತ್ ಸದಸ್ಯರ ವಿರುದ್ಧವೂ ಕಾನೂನು ಕ್ರಮ ಜರುಗಿಸಲು ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.
