ಸದಾ ಒಂದೇ ರೀತಿಯ ಉಪಾಹಾರ ಸೇವಿಸಿ ಬೇಸರವಾಗಿದ್ದರೆ ಅಥವಾ ಸಂಜೆ ಹೊತ್ತು ಬಿಸಿಬಿಸಿಯಾಗಿ ಏನಾದರೂ ಚಟಪಟ ಅಂತ ತಿನ್ನಬೇಕು ಅನ್ನಿಸಿದರೆ ಪಾವ್ ಭಾಜಿ ಸ್ಯಾಂಡ್‌ವಿಚ್ ಅತ್ಯುತ್ತಮ ಆಯ್ಕೆ. ಪಾವ್ ಭಾಜಿ ಮಾಡುವ ಅಷ್ಟೇ ರುಚಿಯನ್ನು ಅತಿ ಕಡಿಮೆ ಶ್ರಮದಲ್ಲಿ ಈ ಸ್ಯಾಂಡ್‌ವಿಚ್ ನೀಡುತ್ತದೆ. ಮಸಾಲೆ ಭರಿತ ಆಲೂಗಡ್ಡೆ ಮಿಶ್ರಣ ಮತ್ತು ಚೀಸ್ ಸೇರಿಸಿ ಮಾಡುವ ಈ ಸ್ಯಾಂಡ್‌ವಿಚ್ ಮಕ್ಕಳಿಗೆ ಹಾಗೂ ದೊಡ್ಡವರಿಗೆ ಇಬ್ಬರಿಗೂ ಇಷ್ಟವಾಗುತ್ತದೆ.
ಬೇಕಾಗುವ ಸಾಮಗ್ರಿಗಳು:
- ಬೇಯಿಸಿದ ಆಲೂಗಡ್ಡೆ – 4
- ಈರುಳ್ಳಿ – 1 (ಸಣ್ಣದಾಗಿ ಹೆಚ್ಚಿದ್ದು)
- ಟೊಮೆಟೊ – 2 (ತುರಿದದ್ದು)
- ದಪ್ಪ ಮೆಣಸಿನಕಾಯಿ (ಕ್ಯಾಪ್ಸಿಕಂ) – 1
- ಹಸಿಮೆಣಸಿನಕಾಯಿ – 4
- ಶುಂಠಿ ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ
- ಕೊತ್ತಂಬರಿ ಸೊಪ್ಪು – ಅರ್ಧ ಕಪ್
- ಅಚ್ಚ ಖಾರದ ಪುಡಿ – 1 ಚಮಚ
- ಚಾಟ್ ಮಸಾಲ – 1 ಚಮಚ
- ಪಾವ್ ಭಾಜಿ ಮಸಾಲ – 1 ಚಮಚ
- ಬೆಣ್ಣೆ – ಅಗತ್ಯಕ್ಕೆ ತಕ್ಕಷ್ಟು
- ಚೀಸ್ ಕ್ಯೂಬ್ಸ್ – 4
- ಬ್ರೆಡ್ ಸ್ಲೈಸ್ – 10
- ರುಚಿಗೆ ತಕ್ಕಷ್ಟು ಉಪ್ಪು
- ಅಲಂಕಾರಕ್ಕಾಗಿ ಓಂ ಪುಡಿ ಅಥವಾ ಶೇವ್ (ಸೇವ್)
ಮಾಡುವ ವಿಧಾನ:
- ಮೊದಲು ಬೇಯಿಸಿದ ಆಲೂಗಡ್ಡೆಯನ್ನು ಚೆನ್ನಾಗಿ ಮ್ಯಾಶ್ ಮಾಡಿ ಅಥವಾ ತುರಿದು ಪಕ್ಕಕ್ಕೆ ಇಟ್ಟುಕೊಳ್ಳಿ.
- ಒಂದು ಬಾಣಲೆಯಲ್ಲಿ ಒಂದು ಚಮಚ ಬೆಣ್ಣೆ ಹಾಕಿ ಬಿಸಿ ಮಾಡಿ. ಅದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಹಸಿಮೆಣಸಿನಕಾಯಿ ಮತ್ತು ಈರುಳ್ಳಿ ಹಾಕಿ ಎರಡು ನಿಮಿಷ ಹುರಿಯಿರಿ.
- ನಂತರ ಹೆಚ್ಚಿದ ಕ್ಯಾಪ್ಸಿಕಂ, ಟೊಮೆಟೊ ಪೇಸ್ಟ್, ಖಾರದ ಪುಡಿ ಮತ್ತು ಪಾವ್ ಭಾಜಿ ಮಸಾಲ ಸೇರಿಸಿ ಸ್ವಲ್ಪ ಹೊತ್ತು ಬಾಡಿಸಿ.
- ಈಗ ತುರಿದ ಆಲೂಗಡ್ಡೆ, ಕೊತ್ತಂಬರಿ ಸೊಪ್ಪು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈಗ ಪಾವ್ ಭಾಜಿ ಸ್ಯಾಂಡ್‌ವಿಚ್‌ಗೆ ಬೇಕಾದ ಮಸಾಲೆ ಸಿದ್ಧವಾಯಿತು.
- ಈ ಮಿಶ್ರಣ ಸ್ವಲ್ಪ ತಣ್ಣಗಾದ ಮೇಲೆ ಬ್ರೆಡ್ ಸ್ಲೈಸ್‌ಗಳಿಗೆ ಬೆಣ್ಣೆ ಹಚ್ಚಿ ಅದರ ಮೇಲೆ ತಯಾರಿಸಿದ ಮಸಾಲೆಯನ್ನು ಹರಡಿ. ಅದರ ಮೇಲೆ ಸ್ವಲ್ಪ ಚೀಸ್ ತುರಿ ಮತ್ತು ಚಾಟ್ ಮಸಾಲ ಉದುರಿಸಿ ಮತ್ತೊಂದು ಬ್ರೆಡ್ ಸ್ಲೈಸ್‌ನಿಂದ ಮುಚ್ಚಿ.
- ಸಿದ್ಧಪಡಿಸಿದ ಈ ಬ್ರೆಡ್ ಅನ್ನು ಗ್ರಿಲ್ ಅಥವಾ ತವಾ ಮೇಲೆ ಹಾಕಿ ಎರಡೂ ಬದಿ ಕೆಂಪಾಗುವವರೆಗೆ ಸ್ವಲ್ಪ ಬೆಣ್ಣೆ ಹಚ್ಚಿ ಬೇಯಿಸಿ.
- ಸ್ಯಾಂಡ್‌ವಿಚ್ ಗರಿಗರಿಯಾದ ಮೇಲೆ ಮೇಲೆ ಸ್ವಲ್ಪ ಓಂ ಪುಡಿ (ಶೇವ್) ಉದುರಿಸಿ ಸರ್ವ್ ಮಾಡಿ.
