ಕಾಶ್ಮೀರದ ಪಹಲ್ಗಾಮ್‌ನಲ್ಲಿ 26 ಪ್ರವಾಸಿಗರು ಮತ್ತು ಸ್ಥಳೀಯ ಕುದುರೆ ಸವಾರನ ಹತ್ಯೆಗೆ ಕಾರಣವಾದ ಭಯಾನಕ ದಾಳಿಗೆ ಭಾರತವು ನಡೆಸಿದ ಸೇನಾ ಕಾರ್ಯಾಚರಣೆ ‘ಸಿಂಧೂರ್’ ನಂತರ, ಗಣ್ಯ ನಾಯಕರು, ವಿಷಯ ರಚನೆಕಾರರು ಮತ್ತು ಸಾಮಾನ್ಯ ನಾಗರಿಕರು ಸೇರಿದಂತೆ ವಿಶ್ವದಾದ್ಯಂತ ಅನೇಕ ದನಿಗಳು ಕೇಳಿಬಂದವು. ಈ ನಡುವೆ, ಪಾಕಿಸ್ತಾನಿ ಹಿಂದೂ ವ್ಯಕ್ತಿಯೊಬ್ಬರು ಮತ್ತು ಇನ್‌ಸ್ಟಾಗ್ರಾಮ್ ಪ್ರಭಾವಿ ಹಂಚಿಕೊಂಡಿರುವ ಇತ್ತೀಚಿನ ವಿಡಿಯೋ ವೈರಲ್ ಆಗಿದೆ. ಬಹುಶಃ ತಮ್ಮ ದೇಶದಿಂದ ದೂರ ವಾಸಿಸುತ್ತಿರುವ ಅವರು, ಭಾರತದ ಈ ದಿಟ್ಟ ಕ್ರಮವನ್ನು ಬೆಂಬಲಿಸಿ ಮಾತನಾಡಿದ್ದಾರೆ.
“ಭಾರತದ ದಾಳಿಯ ಕುರಿತು ಪಾಕಿಸ್ತಾನದ ಅಭಿಪ್ರಾಯ” ಎಂಬ ಶೀರ್ಷಿಕೆಯ ರೀಲ್‌ನಲ್ಲಿ, ಅಭಯ್ ಎಸ್ ಅವರು ಪಹಲ್ಗಾಮ್‌ನಲ್ಲಿ ನಡೆದ ದಾಳಿಗೆ ಭಾರತದ ಪ್ರತೀಕಾರದ ಬಗ್ಗೆ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಭಾರತವು ಈ ದಾಳಿಗೆ ದಿಟ್ಟ ಉತ್ತರ ನೀಡಲು ಸಂಪೂರ್ಣ ಹಕ್ಕನ್ನು ಹೊಂದಿತ್ತು ಎಂದು ಅವರು ಹೇಳಿದ್ದಾರೆ.
“ನಾನು ಪಾಕಿಸ್ತಾನಿ ಮತ್ತು ನಾನು ನೇರವಾಗಿ ಹೇಳುತ್ತೇನೆ. ಭಾರತಕ್ಕೆ ತಿರುಗೇಟು ನೀಡಲು ಸಂಪೂರ್ಣ ಹಕ್ಕಿತ್ತು” ಎಂದು ಅಭಯ್ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ ವಿಡಿಯೊದಲ್ಲಿ ಹೇಳಿದ್ದಾರೆ. “ಮೊದಲು, ನೀವು ಅವರ ಜನರನ್ನು ಹಿಂಸಿಸುತ್ತೀರಿ, ಮತ್ತು ಅವರು ಪ್ರತಿಕ್ರಿಯಿಸಿದಾಗ, ಇದ್ದಕ್ಕಿದ್ದಂತೆ ಅದು ಶಾಂತಿ ಮತ್ತು ಮಾನವ ಹಕ್ಕುಗಳ ಬಗ್ಗೆ ಆಗುತ್ತದೆ. ಆದರೆ 26 ಅಮಾಯಕ ಜೀವಗಳು ಹೋದಾಗ ಆ ಶಕ್ತಿ ಎಲ್ಲಿತ್ತು?”. “ಹೌದು, ಯಾರಿಗೂ ಯುದ್ಧ ಬೇಡ. ಭಾರತಕ್ಕಾಗಲಿ ಅಥವಾ ಪಾಕಿಸ್ತಾನಕ್ಕಾಗಲಿ. ಆದರೆ ನೀವು ಭಯೋತ್ಪಾದನೆಯನ್ನು ಬೆಳೆಸಲು ಪ್ರಾರಂಭಿಸಿದಾಗ, ಅದು ನಿಮ್ಮ ಕಡೆಗೆ ತಿರುಗಿದಾಗ ಆಶ್ಚರ್ಯಪಡಬೇಡಿ” ಎಂದಿದ್ದಾರೆ.
ಭಾರತದ ದಾಳಿಯನ್ನು ಅಭಯ್ ಅವರು ಅಗತ್ಯ ಪ್ರತಿಕ್ರಿಯೆ ಎಂದು ಸ್ಪಷ್ಟಪಡಿಸಿದ್ದಾರೆ. ಇತ್ತೀಚಿನ ಭಯೋತ್ಪಾದಕ ದಾಳಿಯಲ್ಲಿ ಕಳೆದುಹೋದ ಜೀವಗಳಿಗೆ ಭಾರತ ನಡೆಸಿದ ಕಾರ್ಯಾಚರಣೆಯನ್ನು ಅವರು “ನ್ಯಾಯ” ಎಂದು ಉಲ್ಲೇಖಿಸಿದ್ದಾರೆ. “ಭಾರತ ಎಂದಿಗೂ ಇದನ್ನು ಪ್ರಾರಂಭಿಸಲಿಲ್ಲ. ಅವರು ಕೇವಲ ಪ್ರತಿಕ್ರಿಯಿಸಿದರು. ಮತ್ತು ನನಗೆ, ಅದು ಯುದ್ಧದ ಕೃತ್ಯವಲ್ಲ. ಅದು ಕೇವಲ ನ್ಯಾಯ” ಎಂದು ಅವರು ಈಗ ವೈರಲ್ ಆಗಿರುವ ಕ್ಲಿಪ್‌ನಲ್ಲಿ ಹೇಳಿದ್ದಾರೆ. “ನಿಮ್ಮ ಜನರು ಸಾಯದಿದ್ದಾಗ ಶಾಂತಿಯ ಬಗ್ಗೆ ಬೋಧಿಸುವುದು ಸುಲಭ” ಎಂಬ ತೀವ್ರವಾದ ಹೇಳಿಕೆಯೊಂದಿಗೆ ಅವರು ಮಾತು ಮುಗಿಸಿದ್ದು, ಇದು ವ್ಯಾಪಕವಾಗಿ ಪ್ರತಿಧ್ವನಿಸಿತು. ಈ ವಿಡಿಯೊವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡ ಪಾಕಿಸ್ತಾನಿ ವ್ಯಕ್ತಿ “ಜೈ ಹಿಂದ್” ಎಂದು ಬರೆದಿದ್ದಾರೆ.
ಮೇ 7 ರಂದು ಪ್ರಾರಂಭವಾದ ಭಾರತದ ‘ಆಪರೇಷನ್ ಸಿಂಧೂರ್’, ಪಾಕಿಸ್ತಾನ ಮತ್ತು ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಜೈಶ್-ಎ-ಮೊಹಮ್ಮದ್ ಮತ್ತು ಲಷ್ಕರ್-ಎ-ತೊಯ್ಬಾಗೆ ಸೇರಿದ ಒಂಬತ್ತು ಭಯೋತ್ಪಾದಕ ಶಿಬಿರಗಳನ್ನು ಗುರಿಯಾಗಿಸಿತ್ತು. ಈ ನಡುವೆ, ಕಾರ್ಯಾಚರಣೆಯಲ್ಲಿ ಹತರಾದ ಭಯೋತ್ಪಾದಕರ ಅಂತ್ಯಕ್ರಿಯೆಯಲ್ಲಿ ಹಲವಾರು ಪಾಕಿಸ್ತಾನಿ ಅಧಿಕಾರಿಗಳು ಭಾಗವಹಿಸಿರುವುದು ವರದಿಯಾಗಿದೆ.
