ಹಿಮಾಚಲ ಪ್ರದೇಶದ ಕುಲು ಜಿಲ್ಲೆಯಲ್ಲಿ ಸಂಭವಿಸಿದ ಭೀಕರ ಬಿರುಗಾಳಿಗೆ ಮರವೊಂದು ಉರುಳಿಬಿದ್ದು ಕನಿಷ್ಠ ಆರು ಮಂದಿ ಸಾವನ್ನಪ್ಪಿದ್ದಾರೆ. ಈ ದುರ್ಘಟನೆಯು ಮಾನಿಕರಣ ಗುರುದ್ವಾರದ ಬಳಿ ಸಂಭವಿಸಿದೆ. ಬಿರುಗಾಳಿಯ ರಭಸಕ್ಕೆ ಮರವೊಂದು ಉರುಳಿ ವಾಹನಗಳು ಮತ್ತು ಆಹಾರದ ಅಂಗಡಿಗಳ ಮೇಲೆ ಬಿದ್ದಿದೆ. ಪರಿಣಾಮವಾಗಿ ಈ ದುರಂತ ಸಂಭವಿಸಿದೆ.
ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಮಾನಿಕರಣ ಗುರುದ್ವಾರದ ಎದುರಿನ ರಸ್ತೆಯ ಬಳಿಯ ಮರವೊಂದು ಬಿರುಗಾಳಿಗೆ ಉರುಳಿತು. ಈ ಘಟನೆಯು ಭೂಕುಸಿತಕ್ಕೆ ಕಾರಣವಾಯಿತು. ವೀಡಿಯೊಗಳಲ್ಲಿ, ಪರ್ವತದ ಬಳಿಯ ಆಹಾರ ಮಳಿಗೆಗಳ ಬಳಿ ನಿಲ್ಲಿಸಲಾಗಿದ್ದ ವಾಹನಗಳು ಮರದ ಕೊಂಬೆಗಳಿಂದ ಪುಡಿಪುಡಿಯಾಗಿರುವುದು ಕಂಡುಬಂದಿದೆ. ವಾಹನದ ಬಳಿ ನಿಂತು “ಅವರು ಹೋದರು, ಅವರು ಹೋದರು” ಎಂದು ಕೂಗುತ್ತಿರುವ ವ್ಯಕ್ತಿಯ ಧ್ವನಿ ವೀಡಿಯೊದಲ್ಲಿದೆ. ರಕ್ತದ ಕಲೆಗಳಿರುವ ಮಹಿಳೆಗೆ ಸಹಾಯ ಮಾಡುತ್ತಿರುವ ವ್ಯಕ್ತಿಯ ದೃಶ್ಯ ಸಹ ವೀಡಿಯೊದಲ್ಲಿದೆ.
ಕುಲುದಿಂದ ಸುಮಾರು 40 ಕಿಲೋಮೀಟರ್ ದೂರದಲ್ಲಿರುವ ಮಾನಿಕರಣವು 1,829 ಮೀಟರ್ ಎತ್ತರದಲ್ಲಿದೆ. ಈ ಪ್ರದೇಶದಲ್ಲಿ ಆಹಾರ ಮಳಿಗೆಗಳು ಮತ್ತು ನಿಲುಗಡೆ ಮಾಡಲಾದ ವಾಹನಗಳು ಹೆಚ್ಚಾಗಿವೆ.
ಗುರುವಾರ ಚಂಬಾ, ಕಾಂಗ್ರಾ, ಕುಲು ಮತ್ತು ಮಂಡಿ ಜಿಲ್ಲೆಗಳಲ್ಲಿ ಮಿಂಚು ಮತ್ತು ಬಿರುಗಾಳಿಯೊಂದಿಗೆ ಗುಡುಗು ಸಹಿತ ಮಳೆಯಾಗುವ ಬಗ್ಗೆ ಹವಾಮಾನ ಇಲಾಖೆಯು ಎಚ್ಚರಿಕೆ ನೀಡಿತ್ತು. ಆದರೂ ಈ ದುರಂತ ಸಂಭವಿಸಿದೆ. ಪ್ರಸ್ತುತ ಸ್ಥಳದಲ್ಲಿ ಪರಿಹಾರ ಮತ್ತು ರಕ್ಷಣಾ ಕಾರ್ಯಾಚರಣೆ ನಡೆಯುತ್ತಿದೆ.
