ಮಹಿಳೆಯರ ಮೇಲಿನ ಲೈಂಗಿಕ ದೌರ್ಜನ್ಯದ ಪ್ರಕರಣಗಳ ಸಂಖ್ಯೆಯಲ್ಲಿ ದಿನೇ ದಿನೇ ಹೆಚ್ಚಳವಾಗುತ್ತಿದೆ. ಇದರ ಮಧ್ಯೆ ಯುನಿಸೆಫ್‌ ನೀಡಿರುವ ವರದಿಯೊಂದು ಮತ್ತಷ್ಟು ಆತಂಕ ಹುಟ್ಟಿಸುವಂತಿದೆ. ವರದಿಯ ಪ್ರಕಾರ ವಿಶ್ವದಾದ್ಯಂತ 370 ಮಿಲಿಯನ್ ಹುಡುಗಿಯರು ಮತ್ತು ಮಹಿಳೆಯರು 1 – 18 ವರ್ಷ ತುಂಬುವ ಮೊದಲು ಅತ್ಯಾಚಾರ ಅಥವಾ ಲೈಂಗಿಕ ದೌರ್ಜನ್ಯವನ್ನು ಅನುಭವಿಸಿದ್ದಾರೆ.
ಹೆಣ್ಣು ಮಕ್ಕಳ ಅಂತರಾಷ್ಟ್ರೀಯ ದಿನದಂದು (ಅಕ್ಟೋಬರ್ 11 ರಂದು ಆಚರಿಸಲಾಗುತ್ತದೆ) ಮುಂಚಿತವಾಗಿ ಪ್ರಕಟವಾದ ಈ ವರದಿಯು ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಕುರಿತು ಜಾಗತಿಕ ಮತ್ತು ಪ್ರಾದೇಶಿಕ ಡೇಟಾವನ್ನು ಒದಗಿಸಿದೆ. 2010 ಮತ್ತು 2022 ರ ನಡುವೆ 120 ದೇಶಗಳು ಮತ್ತು ಪ್ರದೇಶಗಳಲ್ಲಿ ನಡೆಸಿದ ಸಮೀಕ್ಷೆಗಳ ನಂತರ ಈ ಆಘಾತಕಾರಿ ಅಂಕಿಅಂಶಗಳನ್ನು ಸ್ವೀಕರಿಸಲಾಗಿದೆ.
ಆನ್‌ಲೈನ್ ಕಿರುಕುಳ ಮತ್ತು ಮೌಖಿಕ ನಿಂದನೆಗಳಂತಹ ಲೈಂಗಿಕ ಹಿಂಸೆಯ ಸಂಪರ್ಕ-ರಹಿತ ರೂಪಗಳು ಸಹ ಇದರಲ್ಲಿ ಸೇರಿದ್ದು, ಅಂದಾಜು 650 ಮಿಲಿಯನ್ ಅಥವಾ ಜಾಗತಿಕವಾಗಿ 5 ರಲ್ಲಿ 1 ಪ್ರಕರಣ ವರದಿಯಾಗಿದೆ. ಎಲ್ಲಾ ರೀತಿಯ ಹಿಂಸಾಚಾರ ಮತ್ತು ದುರುಪಯೋಗವನ್ನು ಪರಿಣಾಮಕಾರಿಯಾಗಿ ಪರಿಹರಿಸುವ ತುರ್ತು ಅಗತ್ಯವನ್ನು ಈ ವರದಿ ಒತ್ತಿಹೇಳಿದೆ.
ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯವು ಭೌಗೋಳಿಕ, ಸಾಂಸ್ಕೃತಿಕ ಮತ್ತು ಆರ್ಥಿಕ ಗಡಿಗಳಲ್ಲಿ ವ್ಯಾಪಕವಾಗಿದೆ ಎಂದು ಡೇಟಾ ಬಹಿರಂಗಪಡಿಸಿದ್ದು, ಆಫ್ರಿಕಾವು ಅತಿ ಹೆಚ್ಚು ಬಲಿಪಶುಗಳನ್ನು ಹೊಂದಿದೆ, 79 ಮಿಲಿಯನ್ ಹುಡುಗಿಯರು ಮತ್ತು ಮಹಿಳೆಯರು (ಶೇ. 22) ಬಾಧಿತರಾಗಿದ್ದಾರೆ. ಇತರ ಪೀಡಿತ ಪ್ರದೇಶಗಳು ವಿವರ ಇಂತಿದೆ:
ಪೂರ್ವ ಮತ್ತು ಆಗ್ನೇಯ ಏಷ್ಯಾ: 75 ಮಿಲಿಯನ್ (8 ಪ್ರತಿಶತ)
ಮಧ್ಯ ಮತ್ತು ದಕ್ಷಿಣ ಏಷ್ಯಾ: 73 ಮಿಲಿಯನ್ (9 ಪ್ರತಿಶತ)
ಯುರೋಪ್ ಮತ್ತು ಉತ್ತರ ಅಮೆರಿಕಾ: 68 ಮಿಲಿಯನ್ (14 ಪ್ರತಿಶತ)
ಲ್ಯಾಟಿನ್ ಅಮೇರಿಕಾ ಮತ್ತು ಕೆರಿಬಿಯನ್: 45 ಮಿಲಿಯನ್ (18 ಪ್ರತಿಶತ)
ಉತ್ತರ ಆಫ್ರಿಕಾ ಮತ್ತು ಪಶ್ಚಿಮ ಏಷ್ಯಾ: 29 ಮಿಲಿಯನ್ (15 ಪ್ರತಿಶತ)
ಓಷಿಯಾನಿಯಾ: 6 ಮಿಲಿಯನ್ (ಶೇ 34)
