ಬಾಕ್ಸ್ ಆಫೀಸ್‌ನಲ್ಲಿ ದಾಖಲೆ ಬರೆದಿದ್ದ ರಣವೀರ್ ಸಿಂಗ್ ಅಭಿನಯದ ಸೂಪರ್ ಹಿಟ್ ಆಕ್ಷನ್ ಥ್ರಿಲ್ಲರ್ ಸಿನಿಮಾ ‘ಧುರಂಧರ್: ದಿ ರಿವೆಂಜ್’ (ಧುರಂಧರ್ 2) ಈಗ ಓಟಿಟಿ ಪ್ರಿಯರಿಗೆ ಮತ್ತೊಂದು ಸರ್ಪ್ರೈಸ್ ನೀಡಿದೆ. ಚಿತ್ರದ ಅನ್‌ಮ್ಯೂಟೆಡ್ (ಯಾವುದೇ ಕಟ್ಸ್ ಇಲ್ಲದ ರಾ ಆಡಿಯೋ) ವರ್ಷನ್ ಈಗ ನೆಟ್‌ಫ್ಲಿಕ್ಸ್ ಇಂಡಿಯಾದಲ್ಲಿ ಸ್ಟ್ರೀಮಿಂಗ್ ಆರಂಭಿಸಿದೆ. ಈ ಕತ್ತರಿ ಇಲ್ಲದ ಅಂತರರಾಷ್ಟ್ರೀಯ ಆವೃತ್ತಿಗಾಗಿ ಕಾಯುತ್ತಿದ್ದ ಭಾರತೀಯ ಸಿನಿಪ್ರಿಯರಿಗೆ ಇದು ನಿಜಕ್ಕೂ ಸಿಹಿ ಸುದ್ದಿಯಾಗಿದೆ.
ಇಲ್ಲಿಯವರೆಗೆ ಈ ಚಿತ್ರ ಭಾರತದಲ್ಲಿ ಜಿಯೋಹಾಟ್‌ಸ್ಟಾರ್‌ನಲ್ಲಿ ಮಾತ್ರ ಲಭ್ಯವಿತ್ತು. ಆದರೆ ನೆಟ್‌ಫ್ಲಿಕ್ಸ್‌ನ ವಿದೇಶಿ ಆವೃತ್ತಿಗಳಲ್ಲಿ ಮಾತ್ರ ಲಭ್ಯವಿದ್ದ ಈ ಅನ್‌ಕಟ್ ಮತ್ತು ಅನ್‌ಮ್ಯೂಟೆಡ್ ವರ್ಷನ್ ಅನ್ನು ಈಗ ಭಾರತದ ನೆಟ್‌ಫ್ಲಿಕ್ಸ್ ಚಂದಾದಾರರಿಗೂ ಮುಕ್ತಗೊಳಿಸಲಾಗಿದೆ. ಥಿಯೇಟರ್‌ನಲ್ಲಿ ಮ್ಯೂಟ್ ಆಗಿದ್ದ ಸಂಭಾಷಣೆಗಳು, ಕತ್ತರಿಸಲಾಗಿದ್ದ ಪ್ರಮುಖ ಆಕ್ಷನ್ ಸನ್ನಿವೇಶಗಳು ಮತ್ತು ಅಸಲಿ ಆಡಿಯೋ ಟ್ರ್ಯಾಕ್ ಅನ್ನು ಯಾವುದೇ ಸೆನ್ಸಾರ್ ಇಲ್ಲದೆ ವೀಕ್ಷಕರು ಈ ಆವೃತ್ತಿಯಲ್ಲಿ ಆನಂದಿಸಬಹುದಾಗಿದೆ.
ಕನ್ನಡ ಸೇರಿದಂತೆ ಹಿಂದಿ, ತೆಲುಗು, ತಮಿಳು ಮತ್ತು ಮಲಯಾಳಂ ಭಾಷೆಗಳಲ್ಲಿ ಈ ಚಿತ್ರ ನೆಟ್‌ಫ್ಲಿಕ್ಸ್‌ನಲ್ಲಿ ಲಭ್ಯವಿದೆ. ಜಿಯೋಹಾಟ್‌ಸ್ಟಾರ್‌ನಲ್ಲಿ ಕೇವಲ ಲೈವ್-ಸ್ಟ್ರೀಮ್ ಮಾದರಿಯಲ್ಲಿ ಬಿಡುಗಡೆಯಾಗಿದ್ದರಿಂದ ಬೇಸರಗೊಂಡಿದ್ದ ಅಭಿಮಾನಿಗಳಿಗೆ ನೆಟ್‌ಫ್ಲಿಕ್ಸ್‌ನ ಈ ‘ಆನ್ ಡಿಮಾಂಡ್’ ಅನ್‌ಕಟ್ ವರ್ಷನ್ ಹೊಸ ಅನುಭವ ನೀಡಲಿದೆ. ಇದು ಓಟಿಟಿ ಜಗತ್ತಿನಲ್ಲಿ ಚಿತ್ರದ ವೀಕ್ಷಕರ ಸಂಖ್ಯೆಯನ್ನು ಮತ್ತಷ್ಟು ಹೆಚ್ಚಿಸುವ ನಿರೀಕ್ಷೆಯಿದೆ.
ಆದಿತ್ಯ ಧರ್ ನಿರ್ದೇಶನದ ಈ ಹೈ-ವೋಲ್ಟೇಜ್ ಸ್ಪೈ ಆಕ್ಷನ್ ಥ್ರಿಲ್ಲರ್‌ನಲ್ಲಿ ರಣವೀರ್ ಸಿಂಗ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಅವರ ಜೊತೆಗೆ ಸಂಜಯ್ ದತ್, ಅರ್ಜುನ್ ರಾಂಪಾಲ್, ಆರ್. ಮಾಧವನ್ ಮತ್ತು ಸಾರಾ ಅರ್ಜುನ್ ಸೇರಿದಂತೆ ದೊಡ್ಡ ತಾರಾಬಳಗವೇ ಇದೆ. ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸಿದ್ದ ಈ ಸಿನಿಮಾ ವಿಶ್ವಾದ್ಯಂತ ಬರೋಬ್ಬರಿ 1,800 ಕೋಟಿ ರೂಪಾಯಿಗೂ ಅಧಿಕ ಕಲೆಕ್ಷನ್ ಮಾಡಿ ಭಾರತೀಯ ಚಿತ್ರರಂಗದ ಸಾರ್ವಕಾಲಿಕ ಬ್ಲಾಕ್‌ಬಸ್ಟರ್‌ಗಳ ಪಟ್ಟಿಗೆ ಸೇರಿದೆ.
