ಭಾರತೀಯ ರೈಲ್ವೆ ಜಗತ್ತಿನ ಅತಿದೊಡ್ಡ ರೈಲ್ವೆ ಜಾಲಗಳಲ್ಲಿ ಒಂದಾಗಿದೆ. ವಂದೇ ಭಾರತ್ನಂತಹ ಆಧುನಿಕ ರೈಲುಗಳ ಪರಿಚಯದೊಂದಿಗೆ ರೈಲ್ವೆ ವ್ಯವಸ್ಥೆ ವೇಗವಾಗಿ ಬದಲಾಗುತ್ತಿದೆ. ನಮ್ಮ ದೇಶದಲ್ಲಿ ಸಾವಿರಾರು ರೈಲ್ವೆ ನಿಲ್ದಾಣಗಳಿವೆ, ಆದರೆ ಉತ್ತರ ಪ್ರದೇಶದ ಒಂದು ನಿಲ್ದಾಣ ಮಾತ್ರ ಅತ್ಯಂತ ವಿಶಿಷ್ಟವಾಗಿದೆ. ಅದುವೇ ಮಥುರಾ ಜಂಕ್ಷನ್. ಭಾರತದ ಬಹುತೇಕ ಎಲ್ಲಾ ಭಾಗಗಳಿಗೆ ಇಲ್ಲಿಂದ ರೈಲುಗಳು ಲಭ್ಯವಿವೆ ಎಂಬುದು ಇದರ ವಿಶೇಷತೆ.
ಮಥುರಾ ಜಂಕ್ಷನ್ ಏಕೆ ಇಷ್ಟು ಪ್ರಮುಖ? ಮಥುರಾ ಜಂಕ್ಷನ್ ದೆಹಲಿ-ಮುಂಬೈ ಮತ್ತು ದೆಹಲಿ-ಚೆನ್ನೈ ನಂತಹ ಪ್ರಮುಖ ರೈಲ್ವೆ ಮಾರ್ಗಗಳ ನಡುವೆ ಆಯಕಟ್ಟಿನ ಸ್ಥಳದಲ್ಲಿದೆ. ಈ ಕಾರಣದಿಂದಾಗಿ ಉತ್ತರ, ದಕ್ಷಿಣ, ಪೂರ್ವ ಮತ್ತು ಪಶ್ಚಿಮ ದಿಕ್ಕಿನತ್ತ ಸಾಗುವ ಬಹುತೇಕ ಎಲ್ಲಾ ದೂರದ ಪ್ರಯಾಣದ ರೈಲುಗಳು ಇಲ್ಲಿ ನಿಲ್ಲುತ್ತವೆ. ಇಲ್ಲಿಂದ ಪ್ರಯಾಣಿಕರು ಮುಂಬೈ, ದೆಹಲಿ, ಚೆನ್ನೈ, ಬೆಂಗಳೂರು, ಕೋಲ್ಕತ್ತಾ, ಕೇರಳ, ತಮಿಳುನಾಡು, ರಾಜಸ್ಥಾನ ಮತ್ತು ಬಿಹಾರ ಸೇರಿದಂತೆ ದೇಶದ ಯಾವುದೇ ರಾಜ್ಯಕ್ಕೆ ನೇರ ರೈಲು ಸಂಪರ್ಕ ಪಡೆಯಬಹುದು.
ಭಾರತದ ಇತರೆ ವಿಶಿಷ್ಟ ರೈಲ್ವೆ ನಿಲ್ದಾಣಗಳು ನಮ್ಮ ದೇಶದಲ್ಲಿ ಇನ್ನು ಕೆಲವು ಅಚ್ಚರಿಯ ರೈಲ್ವೆ ನಿಲ್ದಾಣಗಳಿವೆ:
- ನವಾಪುರ ರೈಲ್ವೆ ನಿಲ್ದಾಣ: ಈ ನಿಲ್ದಾಣದ ಅರ್ಧ ಭಾಗ ಮಹಾರಾಷ್ಟ್ರದಲ್ಲಿದ್ದರೆ, ಇನ್ನರ್ಧ ಭಾಗ ಗುಜರಾತ್ನಲ್ಲಿದೆ. ಈ ನಿಲ್ದಾಣದ ಮಧ್ಯಭಾಗದಲ್ಲಿ ರಾಜ್ಯದ ಗಡಿ ರೇಖೆ ಹಾದುಹೋಗುತ್ತದೆ.
- ಅಟ್ಟಾರಿ ರೈಲ್ವೆ ನಿಲ್ದಾಣ: ಪಾಕಿಸ್ತಾನದ ಗಡಿಗೆ ಹತ್ತಿರವಿರುವ ಈ ನಿಲ್ದಾಣಕ್ಕೆ ಹೋಗಲು ವೀಸಾ ಅಥವಾ ವಿಶೇಷ ಅನುಮತಿ ಅಗತ್ಯವಿದೆ.
- ಹುಬ್ಬಳ್ಳಿ ರೈಲ್ವೆ ನಿಲ್ದಾಣ: ಕರ್ನಾಟಕದ ಹುಬ್ಬಳ್ಳಿಯ ಶ್ರೀ ಸಿದ್ಧಾರೂಢ ಸ್ವಾಮೀಜಿ ರೈಲ್ವೆ ನಿಲ್ದಾಣವು ವಿಶ್ವದ ಅತಿ ಉದ್ದದ ರೈಲ್ವೆ ಪ್ಲಾಟ್ಫಾರ್ಮ್ (1,505 ಮೀಟರ್) ಎಂಬ ವಿಶ್ವ ದಾಖಲೆ ಹೊಂದಿದೆ.
- ಹೌರಾ ಜಂಕ್ಷನ್: ಪಶ್ಚಿಮ ಬಂಗಾಳದ ಈ ನಿಲ್ದಾಣವು ಭಾರತದಲ್ಲೇ ಅತಿ ಹೆಚ್ಚು ಅಂದರೆ 23 ಪ್ಲಾಟ್ಫಾರ್ಮ್ಗಳನ್ನು ಹೊಂದಿದೆ.
ಇನ್ನು ಹೆಸರಿನ ವಿಚಾರಕ್ಕೆ ಬಂದರೆ, ಆಂಧ್ರಪ್ರದೇಶದ ‘ವೆಂಕಟನರಸಿಂಹರಾಜು ವಾರಿಪೇಟ’ ಎಂಬುದು 28 ಅಕ್ಷರಗಳನ್ನು ಹೊಂದಿರುವ ದೇಶದ ಅತಿ ಉದ್ದದ ಹೆಸರಿನ ರೈಲ್ವೆ ನಿಲ್ದಾಣವಾಗಿದೆ. ಲಕ್ನೋ ಸಿಟಿ ರೈಲ್ವೆ ನಿಲ್ದಾಣವು ಸಂಪೂರ್ಣವಾಗಿ ಮಹಿಳೆಯರಿಂದಲೇ ನಿರ್ವಹಿಸಲ್ಪಡುವ ಮೂಲಕ ಗಮನ ಸೆಳೆದಿದೆ.
ಒಟ್ಟಾರೆಯಾಗಿ ಭಾರತೀಯ ರೈಲ್ವೆಯು ಇಂತಹ ಹಲವಾರು ವಿಸ್ಮಯಗಳನ್ನು ತನ್ನೊಳಗೆ ಅಡಗಿಸಿಕೊಂಡಿದೆ.
