ಓಣಂ ಹಬ್ಬವು ಕೇವಲ ಕೇರಳಕ್ಕೆ ಮಾತ್ರ ಸೀಮಿತವಾಗಿಲ್ಲ ಎಂಬುದನ್ನು ಅರುಣಾಚಲ ಪ್ರದೇಶದ ಶಾಲೆಯೊಂದರ ಪುಟಾಣಿಗಳು ಸಾಬೀತುಪಡಿಸಿದ್ದಾರೆ. ಶಾಲೆಯ ಆವರಣದಲ್ಲಿ ನಡೆದ ಓಣಂ ಆಚರಣೆಯ ಭಾಗವಾಗಿ ಅರುಣಾಚಲ ಪ್ರದೇಶದ ಮಕ್ಕಳು ಸಾಂಪ್ರದಾಯಿಕ ಕೇರಳ ಶೈಲಿಯ ಉಡುಪು ಅಂದರೆ ಶರ್ಟ್ ಹಾಗೂ ಮುಂಡು ಉಟ್ಟುಕೊಂಡು ಮಲಯಾಳಂನ ಸೂಪರ್ ಹಿಟ್ ಹಾಡುಗಳಿಗೆ ಭರ್ಜರಿ ಹೆಜ್ಜೆ ಹಾಕಿದ್ದು, ಈ ವಿಡಿಯೋ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗಿದೆ.
ಮೋಹನ್‌ಲಾಲ್, ದಿಲೀಪ್ ಹಾಗೂ ಕಲಾಭವನ್ ಮಣಿ ಅವರ ಜನಪ್ರಿಯ ಹಾಡುಗಳಿಗೆ ಮಕ್ಕಳು ತೋರಿದ ಉತ್ಸಾಹ ಮತ್ತು ಲವಲವಿಕೆಯ ನೃತ್ಯ ಪ್ರದರ್ಶನ ವೀಕ್ಷಕರ ಮನ ಗೆದ್ದಿದೆ. ಸುಂದರವಾದ ಹಸಿರು ಬೆಟ್ಟಗಳು ಮತ್ತು ಬಾಳೆ ಎಲೆಗಳಿಂದ ಅಲಂಕರಿಸಲ್ಪಟ್ಟ ನೈಸರ್ಗಿಕ ವೇದಿಕೆಯಲ್ಲಿ ಈ ಸಂಭ್ರಮ ನಡೆದಿದೆ. ಈ ಪ್ರದರ್ಶನದ ಹಿನ್ನೆಲೆಯಲ್ಲಿ ಮಲಯಾಳಿ ಶಿಕ್ಷಕರೊಬ್ಬರು ಮಕ್ಕಳ ಜೊತೆಗೆ ಹಾಡುತ್ತಾ ಪ್ರೋತ್ಸಾಹಿಸುತ್ತಿರುವ ಧ್ವನಿ ಕೇಳಿಬರುತ್ತಿದ್ದು, ಈ ನೃತ್ಯ ಸಂಯೋಜನೆ ಮಾಡಿದ ಆ ’90s ಕಿಡ್’ ಶಿಕ್ಷಕ ಯಾರೆಂದು ಹುಡುಕಲು ನೆಟ್ಟಿಗರು ಆಸಕ್ತಿ ತೋರಿಸುತ್ತಿದ್ದಾರೆ.
ಭಾರತದ ಸಾಂಸ್ಕೃತಿಕ ವೈವಿಧ್ಯತೆ ಮತ್ತು ಏಕತೆಯನ್ನು ಬಿಂಬಿಸುವ ಈ ವಿಡಿಯೋಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದ್ದು, ಓಣಂ ಈಗ ರಾಷ್ಟ್ರೀಯ ಹಬ್ಬವಾಗಿ ಹೊರಹೊಮ್ಮಿದೆ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ.
