ಬೆಂಗಳೂರು: ಮದುವೆ ಗೃಹಪ್ರವೇಶ ಅಥವಾ ನಾಮಕರಣ ಯಾವುದೇ ಸಮಾರಂಭವಿರಲಿ, ನೆಂಟರಿಷ್ಟರಿಗೆ ಅಥವಾ ಸ್ನೇಹಿತರಿಗೆ ಒಂದು ಸುಂದರವಾದ ಉಡುಗೊರೆ ನೀಡುವುದು ನಮ್ಮ ಸಂಪ್ರದಾಯ. ಆದರೆ ನೀವು ನೀಡುವ ಆ ಒಂದು ಗಿಫ್ಟ್ ಅವರ ಜೀವನದ ಮೇಲೆ ಎಂತಹ ಪ್ರಭಾವ ಬೀರುತ್ತದೆ ಎಂದು ಎಂದಾದರೂ ಯೋಚಿಸಿದ್ದೀರಾ?
ವಾಸ್ತು ಶಾಸ್ತ್ರದ ಪ್ರಕಾರ ನಾವು ನೀಡುವ ಪ್ರತಿಯೊಂದು ಉಡುಗೊರೆಯೂ ಆ ಮನೆಯ ಎನರ್ಜಿ (Energy Flow) ಮೇಲೆ ನೇರ ಪರಿಣಾಮ ಬೀರುತ್ತದೆ. ಕೆಲವೊಮ್ಮೆ ಬಳಕೆಗೆ ಬರುವ ವಸ್ತುಗಳನ್ನು ನೀಡಬೇಕು ಎಂಬ ಆತುರದಲ್ಲಿ ನಾವು ಮಾಡುವ ತಪ್ಪು ಆ ಮನೆಯಲ್ಲಿ ನಕಾರಾತ್ಮಕ ಶಕ್ತಿ ನೆಲೆಸಲು ಕಾರಣವಾಗಬಹುದು.
ಪ್ರಗತಿಗೆ ಅಡ್ಡಿಯಾಗಬಹುದು ನಿಮ್ಮ ಉಡುಗೊರೆ
ನಿಮ್ಮ ಪ್ರೀತಿಪಾತ್ರರ ಜೀವನದಲ್ಲಿ ಧನಾತ್ಮಕ ಬದಲಾವಣೆ ಬರಬೇಕು, ಅವರು ಸುಖ-ಸಂತೋಷದಿಂದ ಇರಬೇಕು ಎಂಬುದು ನಿಮ್ಮ ಆಶಯವಾಗಿದ್ದರೆ, ಕೆಲವು ವಸ್ತುಗಳನ್ನು ಗಿಫ್ಟ್ ಮಾಡುವುದು ಅಶುಭ ಎನ್ನುತ್ತದೆ ವಾಸ್ತು. ನಮಗೆ ಗಡಿಯಾರ ಬಟ್ಟೆ ಅಥವಾ ದೇವರ ಫೋಟೋ ನೀಡುವುದು ಸಾಮಾನ್ಯ ಎನಿಸಿದರೂ, ವಾಸ್ತು ಶಾಸ್ತ್ರದ ನಿಯಮಗಳು ಬೇರೆಯದೇ ಕಥೆ ಹೇಳುತ್ತವೆ.
ದಿನನಿತ್ಯದ ಗೊಂದಲದಲ್ಲಿ ನಾವು ಯಾವುದೋ ವಸ್ತುವನ್ನು ಪ್ಯಾಕ್ ಮಾಡಿ ಕೊಟ್ಟುಬಿಡುತ್ತೇವೆ. ಆದರೆ, ಶಾಸ್ತ್ರದ ಪ್ರಕಾರ ಈ ಎಂಟು ವಸ್ತುಗಳು ಸಂಬಂಧಗಳಲ್ಲಿ ಬಿರುಕು ಮೂಡಿಸಬಹುದು ಅಥವಾ ಆ ಮನೆಯ ಆರ್ಥಿಕ ಪರಿಸ್ಥಿತಿಯ ಮೇಲೆ ಏರುಪೇರು ಉಂಟುಮಾಡಬಹುದು. ಹಾಗಾದರೆ, ಆ 8 ಅಪಾಯಕಾರಿ ಉಡುಗೊರೆಗಳು ಯಾವುವು? ನಿಮ್ಮ ನೆಚ್ಚಿನವರಿಗೆ ನೀವು ನೀಡಬಾರದ ಆ ವಸ್ತುಗಳ ಪಟ್ಟಿ ಇಲ್ಲಿದೆ ನೋಡಿ
1 ಮುಳ್ಳಿನ ಗಿಡಗಳು (ಕ್ಯಾಕ್ಟಸ್): ಸಂಬಂಧಗಳಲ್ಲಿ ಬಿರುಕು ಮೂಡಿಸುವ ನೆಗೆಟಿವಿಟಿ
ಇತ್ತೀಚಿನ ದಿನಗಳಲ್ಲಿ ಇಂದೋರ್ ಸಸ್ಯಗಳನ್ನು ಗಿಫ್ಟ್ ಮಾಡುವುದು ಒಂದು ಫ್ಯಾಷನ್ ಆಗಿದೆ. ಆದರೆ, ನೆನಪಿರಲಿ.. ಸುಂದರವಾಗಿ ಕಾಣುವ ಕ್ಯಾಕ್ಟಸ್ (Cactus) ಅಥವಾ ಯಾವುದೇ ಮುಳ್ಳಿನ ಗಿಡಗಳನ್ನು ಎಂದಿಗೂ ಉಡುಗೊರೆಯಾಗಿ ನೀಡಬೇಡಿ. ವಾಸ್ತು ಶಾಸ್ತ್ರದ ಪ್ರಕಾರ, ಮುಳ್ಳುಗಳು ನಕಾರಾತ್ಮಕ ಶಕ್ತಿಯ ಸಂಕೇತ. ಇವುಗಳನ್ನು ಉಡುಗೊರೆಯಾಗಿ ನೀಡುವುದರಿಂದ ಆ ಮನೆಯ ನೆಮ್ಮದಿಗೆ ಭಂಗ ಬರಬಹುದು ಹಾಗೂ ಪ್ರತಿಯೊಂದು ಕೆಲಸದಲ್ಲೂ ಅಡೆತಡೆಗಳು ಎದುರಾಗಬಹುದು. ಹಚ್ಚಹಸಿರಾದ, ಮೃದುವಾದ ಎಲೆಗಳಿರುವ ಸಸ್ಯಗಳನ್ನೇ ಆಯ್ಕೆ ಮಾಡುವುದು ಬುದ್ಧಿವಂತಿಕೆ.
2.ಗಡಿಯಾರ (Clock): ಪ್ರಗತಿಗೆ ಬ್ರೇಕ್ ಹಾಕುವ ಉಡುಗೊರೆ
ಯಾವುದೇ ಸಮಾರಂಭಕ್ಕೆ ಹೋದರೂ ಸುಲಭವಾಗಿ ಸಿಗುವ ಗಿಫ್ಟ್ ಅಂದರೆ ಗೋಡೆ ಗಡಿಯಾರ ಅಥವಾ ವಾಚ್. ಆದರೆ ವಾಸ್ತು ಶಾಸ್ತ್ರದ ಎಚ್ಚರಿಕೆ ಏನೆಂದರೆ, ಗಡಿಯಾರವನ್ನ ಉಡುಗೊರೆಯಾಗಿ ನೀಡಬೇಡಿ! ಗಡಿಯಾರವು ಸಮಯದ ಮಿತಿಯನ್ನು (Time Limit) ಸೂಚಿಸುತ್ತದೆ. ಇದು ನಿಮ್ಮ ಮತ್ತು ನಿಮ್ಮ ಪ್ರೀತಿಪಾತ್ರರ ನಡುವಿನ ಬಾಂಧವ್ಯಕ್ಕೆ ಕಾಲಮಿತಿಯನ್ನು ಹೇರಿದಂತೆ ಎಂಬ ನಂಬಿಕೆ ಇದೆ. ಅಷ್ಟೇ ಅಲ್ಲ, ಉಡುಗೊರೆ ಪಡೆದವರ ಜೀವನದ ಬೆಳವಣಿಗೆ ಅಥವಾ ಪ್ರಗತಿಯು ಗಡಿಯಾರದ ಮುಳ್ಳಿನಂತೆ ಒಂದು ಹಂತದಲ್ಲಿ ಸ್ಥಗಿತವಾಗುವ ಸಾಧ್ಯತೆ ಇರುತ್ತದೆ. ಹಾಗಾಗಿ, ಸಂಬಂಧಗಳು ಕಾಲಾತೀತವಾಗಿ ಬೆಳೆಯಬೇಕೆಂದರೆ ಗಡಿಯಾರದಿಂದ ದೂರವಿರಿ
3.ಸುಗಂಧ ದ್ರವ್ಯ (Perfume): ರಾಹು ಗ್ರಹದ ಪ್ರಭಾವಕ್ಕೆ ಒಳಗಾಗದಿರಿ
ಪರ್ಫ್ಯೂಮ್ ಗಿಫ್ಟ್ ಮಾಡುವುದು ಇಂದಿನ ಟ್ರೆಂಡ್. ಆದರೆ ವಾಸ್ತು ಪ್ರಕಾರ, ಸುಗಂಧ ದ್ರವ್ಯಗಳಲ್ಲಿ ಆಲ್ಕೋಹಾಲ್ ಅಂಶವಿರುವುದರಿಂದ ಇದು ‘ರಾಹು’ ಗ್ರಹಕ್ಕೆ ಸಂಬಂಧಿಸಿದೆ ಎನ್ನಲಾಗುತ್ತದೆ. ಇದನ್ನು ಉಡುಗೊರೆ ನೀಡುವುದರಿಂದ ಸಂಬಂಧಗಳಲ್ಲಿ ಅನಗತ್ಯ ಗೊಂದಲ ಅಥವಾ ನಕಾರಾತ್ಮಕತೆ ಉಂಟಾಗುವ ಸಾಧ್ಯತೆ ಇರುತ್ತದೆ.
4.ಚರ್ಮದ ವಸ್ತುಗಳು (Leather Items): ನೆಗೆಟಿವ್ ಎನರ್ಜಿಯ ಆಗರ
ಪರ್ಸ್, ಬೆಲ್ಟ್ ಅಥವಾ ಬ್ಯಾಗ್ಗಳಂತಹ ಚರ್ಮದ ವಸ್ತುಗಳನ್ನು ನೀಡುವುದು ಅಶುಭ. ಚರ್ಮವು ಪ್ರಾಣಿಗಳ ಅಂಶವನ್ನು ಹೊಂದಿರುವುದರಿಂದ ಅದರಲ್ಲಿ ನಕಾರಾತ್ಮಕ ಶಕ್ತಿ ಇರುತ್ತದೆ ಎಂಬುದು ವಾಸ್ತು ತಜ್ಞರ ಅಭಿಮತ. ಇದು ಉಡುಗೊರೆ ಪಡೆದವರ ಆರ್ಥಿಕ ಸ್ಥಿತಿಯ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು.
5.ಕನ್ನಡಿ (Mirrors): ನಕಾರಾತ್ಮಕತೆಯ ಪ್ರತಿಬಿಂಬ
ಕನ್ನಡಿಗಳು ಶಕ್ತಿಯ ಹರಿವನ್ನು ದುಪ್ಪಟ್ಟು ಮಾಡುವ ಸಾಮರ್ಥ್ಯ ಹೊಂದಿವೆ. ಒಂದು ವೇಳೆ ನೀವು ನೀಡಿದ ಕನ್ನಡಿ ನಕಾರಾತ್ಮಕ ಶಕ್ತಿಯನ್ನು ಪ್ರತಿಫಲಿಸಿದರೆ, ಆ ಮನೆಯಲ್ಲಿ ಅಶಾಂತಿ ಮೂಡಬಹುದು. ಹೀಗಾಗಿ ಕನ್ನಡಿಗಳನ್ನು ಉಡುಗೊರೆಯಾಗಿ ನೀಡದಿರುವುದೇ ಉತ್ತಮ.
6.ಕಲಾತ್ಮಕ ವಸ್ತುಗಳು (Art Work): ಆಯ್ಕೆಯಲ್ಲಿರಲಿ ಎಚ್ಚರ
ಯಾವುದೇ ಪೇಂಟಿಂಗ್ ಅಥವಾ ಶಿಲ್ಪಕಲೆಗಳನ್ನು ನೀಡುವಾಗ ಅವುಗಳ ಭಾವ ಗಮನಿಸಿ. ಯುದ್ಧ, ದುಃಖ ಅಥವಾ ಉಗ್ರ ರೂಪದ ಕಲಾಕೃತಿಗಳು ಮನೆಯಲ್ಲಿ ಆಕ್ರಮಣಕಾರಿ ಧೋರಣೆಯನ್ನು ಹೆಚ್ಚಿಸುತ್ತವೆ. ಯಾವಾಗಲೂ ಶಾಂತಿ ಮತ್ತು ಸಂತೋಷವನ್ನು ಸಾರುವ ಕಲೆಗಳಿಗೆ ಮಾತ್ರ ಆದ್ಯತೆ ನೀಡಿ.
7.ಪೆನ್ ಮತ್ತು ಕರ್ಚೀಫ್ (Pen & Handkerchief): ಅಸಂಗತತೆಗೆ ಕಾರಣ
ಕೈಬರಹದ ಪೆನ್ ಅಥವಾ ಕರ್ಚೀಫ್ ನೀಡುವುದು ಸಾಮಾನ್ಯ ಎನಿಸಿದರೂ ಇವುಗಳು ವ್ಯಕ್ತಿಗಳ ನಡುವೆ ಅಸಂಗತತೆ ಅಥವಾ ವೈಮನಸ್ಸು ಉಂಟುಮಾಡಬಹುದು ಎಂದು ವಾಸ್ತು ಶಾಸ್ತ್ರ ಎಚ್ಚರಿಸುತ್ತದೆ. ಮುಖ್ಯವಾಗಿ ಕರ್ಚೀಫ್ ನೀಡುವುದು ದುರಾದೃಷ್ಟದ ಸಂಕೇತವೆಂದು ಪರಿಗಣಿಸಲಾಗುತ್ತದೆ.
8.ಖಾಲಿ ಪರ್ಸ್ಗಳು (Empty Purses): ಲಕ್ಷ್ಮಿಯ ಕೃಪೆಗೆ ಅಡ್ಡಿ
ಯಾರಿಗಾದರೂ ಪರ್ಸ್ ನೀಡುವಾಗ ಅದನ್ನು ಖಾಲಿ ನೀಡಬೇಡಿ. ಚರ್ಮದ ಪರ್ಸ್ ನೀಡುವುದು ಮೊದಲೇ ನಿಷಿದ್ಧ, ಅದರಲ್ಲೂ ಖಾಲಿ ಪರ್ಸ್ ನೀಡುವುದು ಆರ್ಥಿಕ ಮುಗ್ಗಟ್ಟನ್ನು ಆಹ್ವಾನಿಸಿದಂತೆ. ಬಟ್ಟೆಯ ಅಥವಾ ಪರಿಸರ ಸ್ನೇಹಿ ಪರ್ಸ್ ನೀಡುವಾಗ ಅದರಲ್ಲಿ ಒಂದು ನಾಣ್ಯವಿಟ್ಟು ನೀಡುವುದು ಶ್ರೇಯಸ್ಕರ.
