ಕಠ್ಮಂಡು : ಈ ವರ್ಷದ ಜನವರಿಯಲ್ಲಿ ನೇಪಾಳದ ರೆಸಾರ್ಟ್ ನಗರ ಪೊಖಾರಾದಲ್ಲಿ ಯೆತಿ ಏರ್ಲೈನ್ಸ್ ವಿಮಾನ ಅಪಘಾತಕ್ಕೀಡಾಗಿ ಐವರು ಭಾರತೀಯರು ಸೇರಿದಂತೆ ಎಲ್ಲ 72 ಮಂದಿ ಮೃತಪಟ್ಟಿದ್ದರು.
ಯೇತಿ ಏರ್ಲೈನ್ಸ್ನ 9 ಎನ್-ಎಎನ್ಸಿ ಎಟಿಆರ್ -72 ವಿಮಾನವು ಜನವರಿ 15 ರಂದು ಇಳಿಯುವ ಕೆಲವೇ ನಿಮಿಷಗಳ ಮೊದಲು ಹಳೆಯ ವಿಮಾನ ನಿಲ್ದಾಣ ಮತ್ತು ಹೊಸ ವಿಮಾನ ನಿಲ್ದಾಣದ ನಡುವಿನ ಸೇಟಿ ನದಿಯ ದಡದಲ್ಲಿ ಅಪಘಾತಕ್ಕೀಡಾಗಿತ್ತು. ವಿಮಾನ ಅಪಘಾತವು ಮಾನವ ತಪ್ಪಿನಿಂದ ಸಂಭವಿಸಿದೆ ಎಂದು ಅಪಘಾತದ ನಂತರ ರಚಿಸಲಾದ ಐದು ಸದಸ್ಯರ ತನಿಖಾ ಆಯೋಗವು ತನ್ನ ವರದಿಯಲ್ಲಿ ತಿಳಿಸಿದೆ ಎಂದು ನೇಪಾಳದ ಅಧಿಕೃತ ಸುದ್ದಿ ಸಂಸ್ಥೆ ಆರ್ಎಸ್ಎಸ್ ವರದಿ ಮಾಡಿದೆ.
ವಿಮಾನದಲ್ಲಿದ್ದ ಐವರು ಭಾರತೀಯರಲ್ಲಿ ಅಭಿಶೇಖ್ ಕುಶ್ವಾಹ (25), ಬಿಶಾಲ್ ಶರ್ಮಾ (22), ಅನಿಲ್ ಕುಮಾರ್ ರಾಜ್ಭರ್ (27), ಸೋನು ಜೈಸ್ವಾಲ್ (35) ಮತ್ತು ಸಂಜಯ ಜೈಸ್ವಾಲ್ (26) ಸೇರಿದ್ದಾರೆ.
ಮಾಜಿ ಕಾರ್ಯದರ್ಶಿ ನಾಗೇಂದ್ರ ಪ್ರಸಾದ್ ಘಿಮಿರೆ ಅವರ ಸಮನ್ವಯದಲ್ಲಿ ರಚಿಸಲಾದ ಆಯೋಗವು ಸಂಸ್ಕೃತಿ, ಪ್ರವಾಸೋದ್ಯಮ ಮತ್ತು ನಾಗರಿಕ ವಿಮಾನಯಾನ ಸಚಿವ ಸುದನ್ ಕಿರಾಟಿ ಅವರಿಗೆ ವರದಿಯನ್ನು ಸಲ್ಲಿಸಿದೆ. ಆಯೋಗವು ತನಿಖೆ ನಡೆಸಿ ವರದಿಯನ್ನು ಸಿದ್ಧಪಡಿಸಲು ಎಂಟು ತಿಂಗಳು ಮತ್ತು ಮೂರು ದಿನಗಳನ್ನು ತೆಗೆದುಕೊಂಡಿತು.
