ಸಾಮಾನ್ಯವಾಗಿ ಪುರುಷರ ಪ್ರಾಬಲ್ಯವೇ ಹೆಚ್ಚಾಗಿರುವ ಸರಕು ಸಾಗಣೆ ವಾಹನಗಳ ಕ್ಷೇತ್ರದಲ್ಲಿ, ಸಾಂಪ್ರದಾಯಿಕ ಚೌಕಟ್ಟುಗಳನ್ನು ಮುರಿದು ಲಾರಿ ಚಲಾಯಿಸುವ ಮೂಲಕ ಹಿಮಾಚಲ ಪ್ರದೇಶದ 25 ವರ್ಷದ ಯುವತಿ ನೇಹಾ ಠಾಕೂರ್ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿದ್ದಾರೆ. ಪದವಿ ಮುಗಿಸಿ ಏರ್ ಹೋಸ್ಟೆಸ್ ಆಗಲು ತರಬೇತಿ ಪಡೆದಿದ್ದ ಈ ಯುವತಿ, ಅಂತಿಮವಾಗಿ ತಮ್ಮ ತಂದೆಯ ಹೆಜ್ಜೆಯಲ್ಲೇ ಸಾಗಿ ಟ್ರಕ್ ಡ್ರೈವಿಂಗ್ ಅನ್ನೇ ವೃತ್ತಿಯಾಗಿಸಿಕೊಂಡಿದ್ದು, ಪ್ರಸ್ತುತ ಹಿಮಾಚಲ ಪ್ರದೇಶದ ಪ್ರಪ್ರಥಮ ಮಹಿಳಾ ಟ್ರಕ್ ವ್ಲಾಗರ್ ಆಗಿ ಹೊರಹೊಮ್ಮಿದ್ದಾರೆ.
ಮಂಡಿ ಮೂಲದ ನೇಹಾ ಅವರಿಗೆ ಬಾಲ್ಯದಿಂದಲೂ ಲಾರಿಗಳೆಂದರೆ ವಿಶೇಷ ಪ್ರೀತಿ. ಅವರ ತಂದೆ ಸ್ವತಃ ಲಾರಿ ಚಾಲಕರಾಗಿದ್ದು, ಶಾಲಾ ದಿನಗಳಲ್ಲಿ ಹಲವು ಬಾರಿ ತಮ್ಮ ತಂದೆಯ ಲಾರಿಯಲ್ಲೇ ಶಾಲೆಗೆ ತೆರಳುತ್ತಿದ್ದರು. ಕಾಲೇಜು ಶಿಕ್ಷಣ ಮುಗಿದ ನಂತರ ಚಂಡೀಗಢಕ್ಕೆ ತೆರಳಿ ಏರ್ ಹೋಸ್ಟೆಸ್ ಆಗಲು ಅಗತ್ಯ ವೃತ್ತಿಪರ ತರಬೇತಿಯನ್ನೂ ಪಡೆದುಕೊಂಡರು. ಆದರೆ ಅವರ ಮನಸ್ಸು ಮಾತ್ರ ತಂದೆಯಂತೆ ದೊಡ್ಡ ವಾಹನಗಳ ಸ್ಟೀರಿಂಗ್ ಹಿಡಿಯುವತ್ತಲೇ ತುಡಿಯುತ್ತಿತ್ತು. ಅಂತಿಮವಾಗಿ ತಮ್ಮ ಊರಿಗೆ ಮರಳಿದ ನೇಹಾ, ತಮ್ಮ 22 ನೇ ವಯಸ್ಸಿನಲ್ಲಿ ಲಾರಿ ಚಾಲನೆ ಮಾಡಲು ಆರಂಭಿಸಿದರು.
ಕೇವಲ ಲಾರಿ ಓಡಿಸುವುದಕ್ಕೆ ಸೀಮಿತವಾಗದೆ, ಹಿಮಾಲಯದ ಕಡಿದಾದ ಬೆಟ್ಟಗುಡ್ಡಗಳ ತಿರುವುಗಳು, ಮಳೆ, ಮಂಜು, ರಸ್ತೆ ಸವಾಲುಗಳು ಹಾಗೂ ಸರಕುಗಳನ್ನು ತುಂಬುವ (ಲೋಡಿಂಗ್) ಮತ್ತು ಇಳಿಸುವ (ಅನ್‌ಲೋಡಿಂಗ್) ದೈನಂದಿನ ನೈಜ ಬದುಕನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲು ಶುರುಮಾಡಿದರು. “ಬೆಳಿಗ್ಗೆ ಲಾರಿ ಸ್ಟಾರ್ಟ್ ಆಗುತ್ತಿದ್ದಂತೆ ನನ್ನ ಕ್ಯಾಮೆರಾವೂ ಆನ್ ಆಗುತ್ತದೆ. ನನಗೆ ಸಾಮಾಜಿಕ ಜಾಲತಾಣದ ಕೃತಕ ಟ್ರೆಂಡ್‌ಗಳ ಅಗತ್ಯವಿಲ್ಲ, ನನ್ನ ದಿನನಿತ್ಯದ ಕಠಿಣ ದುಡಿಮೆಯೇ ನನ್ನ ಕಂಟೆಂಟ್” ಎಂದು ನೇಹಾ ಆತ್ಮವಿಶ್ವಾಸದಿಂದ ಹೇಳಿಕೊಳ್ಳುತ್ತಾರೆ.
ಸಮಾಜದಲ್ಲಿ ಲಾರಿ ಚಾಲಕರ ಬಗ್ಗೆ ಇರುವ ಕೀಳು ಕಲ್ಪನೆ ಮತ್ತು ನಕಾರಾತ್ಮಕ ಮನಸ್ಥಿತಿಯನ್ನು ಬದಲಾಯಿಸುವುದೇ ತಮ್ಮ ಮುಖ್ಯ ಉದ್ದೇಶ ಎನ್ನುತ್ತಾರೆ ನೇಹಾ. “ಲಾರಿಯನ್ನೇ ಏಕೆ ಆರಿಸಿಕೊಂಡಿರಿ ಎಂದು ಹಲವರು ನನ್ನನ್ನು ಪ್ರಶ್ನಿಸುತ್ತಾರೆ, ಆದರೆ ಲಾರಿ ಏಕೆ ಓಡಿಸಬಾರದು? ಎಂಬುದು ನನ್ನ ಸರಳ ಉತ್ತರ” ಎಂದು ಅವರು ಸವಾಲು ಹಾಕಿದ್ದಾರೆ.
ಅಧಿಕೃತ ಕ್ರಿಯೇಟರ್ಸ್ ಪುಟದಲ್ಲಿ ಹಂಚಿಕೊಳ್ಳಲಾದ ಇವರ ಸಾಧನೆಯ ವಿಡಿಯೋ ವ್ಯಾಪಕವಾಗಿ ವೈರಲ್ ಆಗಿದ್ದು, ಲಕ್ಷಾಂತರ ನೆಟ್ಟಿಗರು ಇವರ ಧೈರ್ಯ ಮತ್ತು ಆತ್ಮವಿಶ್ವಾಸವನ್ನು ಕೊಂಡಾಡಿದ್ದಾರೆ. ಹೆಣ್ಣುಮಕ್ಕಳು ತಮ್ಮ ಭಯವನ್ನು ಮೆಟ್ಟಿನಿಂತು ಇಷ್ಟಪಟ್ಟ ಕ್ಷೇತ್ರಗಳಲ್ಲಿ ಹೇಗೆ ಮುನ್ನಡೆಯಬಹುದು ಎಂಬುದಕ್ಕೆ ನೇಹಾ ಠಾಕೂರ್ ಅತ್ಯುತ್ತಮ ಉದಾಹರಣೆಯಾಗಿದ್ದಾರೆ ಎಂದು ಬಳಕೆದಾರರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
