ಕೋವಿಡ್-19 ಸಾಂಕ್ರಾಮಿಕವು ಪ್ರಪಂಚದೆಲ್ಲೆಡೆ ಬಹುತೇಕ ನಾಶವಾಗುತ್ತಿದೆ. ಆದರೆ, ಇದು ಕೋಟಿಗಟ್ಟಲೆ ಜನರನ್ನು ಬಲಿ ಪಡೆಯಿತು. ಭಾರತದಲ್ಲಿ ಲಕ್ಷಾಂತರ ಜನರು ಈ ರೋಗಕ್ಕೆ ಬಲಿಯಾಗಿದ್ದಾರೆ. ಆದರೆ, ತೀವ್ರವಾದ ಕಾಯಿಲೆ ಮತ್ತು ಆಸ್ಪತ್ರೆಗೆ ದಾಖಲಾಗಿ ಡಿಸ್ಚಾರ್ಜ್ ಬಳಿಕ ಮೃತಪಟ್ಟವರಲ್ಲಿ ಪುರುಷರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ ಎಂದು ಅಧ್ಯಯನ ವರದಿ ತಿಳಿಸಿದೆ. ಪುರುಷರಲ್ಲಿ ಕೋವಿಡ್-19 ಸಾವಿನ ಪ್ರಮಾಣವು ಮಹಿಳೆಯರಿಗಿಂತ ಹೆಚ್ಚಾಗಿದೆ ಎಂದು ಅಧ್ಯಯನದಲ್ಲಿ ತಿಳಿದು ಬಂದಿದೆ.
ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ICMR) ನ ಇತ್ತೀಚಿನ ಅಧ್ಯಯನದಲ್ಲಿ ಈ ಅಂಶ ಬೆಳಕಿಗೆ ಬಂದಿದೆ. ಹೊಸ ಅಧ್ಯಯನವು ಭಾರತದಾದ್ಯಂತ 31 ಕೋವಿಡ್ ಆಸ್ಪತ್ರೆಗಳಿಂದ ಡೇಟಾವನ್ನು ವಿಶ್ಲೇಷಿಸಿದೆ. ಕೋವಿಡ್ ಗಾಗಿ ಆಸ್ಪತ್ರೆಗೆ ದಾಖಲಾದ ಒಂದು ವರ್ಷದ ನಂತರ ಸಂಶೋಧನಾ ತಂಡವು 14,419 ಜನರನ್ನು ಸಂಪರ್ಕಿಸಿದೆ. ಅವರಲ್ಲಿ, 942 ಜನರು ವಿವಿಧ ಕಾರಣಗಳಿಂದ ಮೃತಪಟ್ಟಿದ್ದಾರೆ. ಅದರಲ್ಲಿ 616 (ಶೇ .65) ರಷ್ಟು ಪುರುಷರೇ ಆಗಿದ್ದಾರೆ.
40 ವರ್ಷಕ್ಕಿಂತ ಮೇಲ್ಪಟ್ಟ ಪುರುಷರಲ್ಲಿ ಒಂದು ವರ್ಷದೊಳಗೆ ಸಾಯುವ ಹೆಚ್ಚಿನ ಸಂಭವನೀಯತೆ ಕಂಡುಬಂದಿದೆ ಹಾಗೂ ಆರಂಭದಲ್ಲಿ ಮಧ್ಯಮದಿಂದ ತೀವ್ರತರವಾದ ಕೋವಿಡ್ ರೋಗವನ್ನು ಹೊಂದಿರುವವರಲ್ಲಿ ಕಂಡುಬಂದಿದೆ ಎಂದು ಅಭಿವೃದ್ಧಿ ಸಂಶೋಧನಾ ವಿಭಾಗದ ವಿಜ್ಞಾನಿ ಡಾ. ಅಪರ್ಣಾ ಮುಖರ್ಜಿ ಹೇಳಿದ್ದಾರೆ.
ಅಧ್ಯಯನವು ಕೋವಿಡ್-19 ಲಸಿಕೆಗಳ ರಕ್ಷಣಾತ್ಮಕ ಪರಿಣಾಮವನ್ನು ಒತ್ತಿಹೇಳುತ್ತದೆ. ಕೋವಿಡ್ ಲಸಿಕೆ ಪಡೆದವರು ಮೃತಪಟ್ಟ ಸಂಖ್ಯೆ ತೀರಾ ಕಡಿಮೆ ಎಂದು ಅಧ್ಯಯನವು ದೃಢಪಡಿಸಿದೆ. ಒಂದು ಡೋಸ್ ಲಸಿಕೆ ಕೂಡ ಕೆಲವು ರಕ್ಷಣಾತ್ಮಕ ಪರಿಣಾಮವನ್ನು ಹೊಂದಿದೆ ಎಂದು ಡಾ. ಅಪರ್ಣಾ ಮುಖರ್ಜಿ ವಿವರಿಸಿದರು.
ಇನ್ನು ಸೇಂಟ್ ಲೂಯಿಸ್ ಮತ್ತು ವೆಟರನ್ಸ್ ಅಫೇರ್ಸ್ ಸೇಂಟ್ ಲೂಯಿಸ್ ಹೆಲ್ತ್ ಕೇರ್ ಸಿಸ್ಟಮ್‌ನಲ್ಲಿನ ವಾಷಿಂಗ್ಟನ್ ಯೂನಿವರ್ಸಿಟಿ ಸ್ಕೂಲ್ ಆಫ್ ಮೆಡಿಸಿನ್‌ನ ಮತ್ತೊಂದು ಅಧ್ಯಯನವು, ಕೋವಿಡ್‌ನಿಂದ ಬದುಕುಳಿದ ಜನರು ಸಹ ದೀರ್ಘ ಕೋವಿಡ್ ಸಂಬಂಧಿತ ಪರಿಸ್ಥಿತಿಗಳ ಅಪಾಯವನ್ನು ಹೊಂದಿರುತ್ತಾರೆ ಎಂದು ಸೂಚಿಸಿದೆ. ಇವುಗಳಲ್ಲಿ ಸೋಂಕಿನ ಎರಡು ವರ್ಷಗಳ ನಂತರವೂ ಮಧುಮೇಹ, ಶ್ವಾಸಕೋಶದ ತೊಂದರೆಗಳು, ಆಯಾಸ, ರಕ್ತ ಹೆಪ್ಪುಗಟ್ಟುವಿಕೆ, ಜಠರಗರುಳಿನ ಮತ್ತು ಮಸ್ಕ್ಯುಲೋಸ್ಕೆಲಿಟಲ್ ವ್ಯವಸ್ಥೆಗಳ ಮೇಲೆ ಪರಿಣಾಮವೂ ಸೇರಿವೆ.
