ಸಾವಿನ ನಂತರ ಏನಾಗುತ್ತದೆ? ಎಂಬ ಪ್ರಶ್ನೆಗೆ ಯಾರ ಬಳಿಯೂ ನಿಖರ ಉತ್ತರವಿಲ್ಲ. ಆದರೆ ಯುನೈಟೆಡ್ ಕಿಂಗ್ಡಮ್ನ 68 ವರ್ಷದ ಚಾರ್ಲೊಟ್ ಹೋಮ್ಸ್ ಎಂಬ ಮಹಿಳೆ ತಾನು ಕ್ಲಿನಿಕಲ್ ಸಾವು ಅನುಭವಿಸಿ, ಮರಳಿ ಬದುಕಿ ಬಂದಿರುವುದಾಗಿ ಹೇಳಿಕೊಂಡಿದ್ದಾರೆ. ಕೇವಲ ಬದುಕುಳಿದಿದ್ದಷ್ಟೇ ಅಲ್ಲ, ಆ 11 ನಿಮಿಷಗಳಲ್ಲಿ ತಾವು ಸ್ವರ್ಗ ಮತ್ತು ನರಕ ಎರಡನ್ನೂ ನೋಡಿರುವುದಾಗಿ ಅವರು ವಿವರಿಸಿರುವ ರೀತಿ ಜಗತ್ತಿನಾದ್ಯಂತ ಸಂಚಲನ ಮೂಡಿಸಿದೆ.
ಸಾವಿನ ದವಡೆಯಿಂದ ಮರಳಿ ಬಂದ ಕ್ಷಣ
ಚಾರ್ಲೊಟ್ ಹೋಮ್ಸ್ ಅವರು ಸಾಮಾನ್ಯ ಹೃದಯ ತಪಾಸಣೆಗಾಗಿ ಆಸ್ಪತ್ರೆಗೆ ಹೋಗಿದ್ದಾಗ ಅವರ ರಕ್ತದೊತ್ತಡ (Blood Pressure) ಇದ್ದಕ್ಕಿದ್ದಂತೆ 234/134 ಕ್ಕೆ ಏರಿತ್ತು. ಪರಿಸ್ಥಿತಿ ಗಂಭೀರವಾಗಿದ್ದರಿಂದ ವೈದ್ಯರು ತಕ್ಷಣ ಚಿಕಿತ್ಸೆ ಆರಂಭಿಸಿದರು. ಈ ವೇಳೆ ಅವರ ಹೃದಯ ಬಡಿತ ಸುಮಾರು 11 ನಿಮಿಷಗಳ ಕಾಲ ಸಂಪೂರ್ಣವಾಗಿ ನಿಂತುಹೋಗಿತ್ತು. ವೈದ್ಯಕೀಯ ಭಾಷೆಯಲ್ಲಿ ಇದನ್ನು ‘ಕ್ಲಿನಿಕಲ್ ಡೆತ್’ ಎಂದು ಕರೆಯಲಾಗುತ್ತದೆ. ಇದೇ ಸಮಯದಲ್ಲಿ ತಮಗೆ ವಿಚಿತ್ರ ಅನುಭವವಾಯಿತು ಎಂದು ಚಾರ್ಲೊಟ್ ಹೇಳಿದ್ದಾರೆ.
ಸ್ವರ್ಗದಲ್ಲಿ ಪೋಷಕರು ಮತ್ತು ಮೃತಪಟ್ಟ ಮಗನ ಭೇಟಿ
ತಮ್ಮ ಅನುಭವದ ಬಗ್ಗೆ ಮಾತನಾಡಿದ ಅವರು, “ಕಣ್ಣು ಮುಚ್ಚಿದಾಗ ಮೊದಲು ನನಗೆ ನರಕದ ದರ್ಶನವಾಯಿತು, ಅದು ಅತೀವ ನೋವು ಮತ್ತು ಯಾತನೆಯಿಂದ ಕೂಡಿತ್ತು. ಆದರೆ ತಕ್ಷಣವೇ ವಾತಾವರಣ ಬದಲಾಗಿ ಅತ್ಯಂತ ಸುಂದರವಾದ ಹೂವುಗಳ ಸುಗಂಧ ಮತ್ತು ಸಂಗೀತ ಕೇಳಿಸಿತು. ಅಲ್ಲಿ ನನಗೆ ದೇವದೂತರು ಕಂಡರು. ನನ್ನ ಮೃತ ಪೋಷಕರು ಅತ್ಯಂತ ಆರೋಗ್ಯವಂತರಾಗಿ ಮತ್ತು ಸಂತೋಷದಿಂದ ಅಲ್ಲಿರುವುದನ್ನು ನಾನು ನೋಡಿದೆ” ಎಂದಿದ್ದಾರೆ.
ಅತಿ ದೊಡ್ಡ ಅಚ್ಚರಿಯೆಂದರೆ, ಚಾರ್ಲೊಟ್ ಅವರು ಗರ್ಭಿಣಿಯಾಗಿದ್ದಾಗ ಐದೂವರೆ ತಿಂಗಳ ಮಗುವನ್ನು ಕಳೆದುಕೊಂಡಿದ್ದರು. ಆ ಮಗು ಈಗ ಸ್ವರ್ಗದಲ್ಲಿ ಬೆಳೆದಿರುವುದನ್ನು ಅವರು ಕಂಡರಂತೆ. “ದೇವರು ಆ ಮಗುವನ್ನು ನನಗೆ ತೋರಿಸಿ, ಇದು ನಿನ್ನ ಮಗ ಎಂದು ಹೇಳಿದನು” ಎಂದು ಅವರು ಭಾವುಕರಾಗಿ ನೆನಪಿಸಿಕೊಂಡಿದ್ದಾರೆ. ಆಸ್ಪತ್ರೆಯಲ್ಲಿದ್ದ ಅವರ ಪತಿ ಡೇನಿಯಲ್ ಹೇಳುವಂತೆ, ಪ್ರಜ್ಞೆ ಇಲ್ಲದ ಸ್ಥಿತಿಯಲ್ಲಿದ್ದ ಚಾರ್ಲೊಟ್ ಆಸ್ಪತ್ರೆಯ ಕೋಣೆಯಲ್ಲಿ ಹೂವುಗಳು ಕಾಣಿಸುತ್ತಿವೆ ಎಂದು ಹೇಳಲು ಆರಂಭಿಸಿದ್ದರಂತೆ.
‘ವಾಪಸ್ ಹೋಗು’ ಎಂದ ತಂದೆಯ ಧ್ವನಿ
ಸ್ವರ್ಗದ ಶಾಂತಿಯನ್ನು ಅನುಭವಿಸುತ್ತಿದ್ದಾಗ, ಚಾರ್ಲೊಟ್ ಅವರ ತಂದೆಯ ಧ್ವನಿ ಕೇಳಿಸಿತಂತೆ. “ಇನ್ನೂ ನಿನಗೆ ಸಮಯ ಬಂದಿಲ್ಲ, ನೀನು ಮರಳಿ ಹೋಗಬೇಕು” ಎಂದು ತಂದೆ ಹೇಳಿದ ತಕ್ಷಣವೇ ಚಾರ್ಲೊಟ್ ಅವರಿಗೆ ಪ್ರಜ್ಞೆ ಬಂದಿದೆ. ಈಗ ಸಂಪೂರ್ಣ ಗುಣಮುಖರಾಗಿರುವ ಅವರು, ಈ ಅನುಭವವು ಜೀವನದ ಮೇಲಿನ ತಮ್ಮ ದೃಷ್ಟಿಕೋನವನ್ನೇ ಬದಲಿಸಿದೆ ಎಂದು ಹೇಳಿದ್ದಾರೆ. ಸಾವಿನ ನಂತರದ ಲೋಕವು ಕೇವಲ ಕಲ್ಪನೆಯಲ್ಲ, ಅದು ವಾಸ್ತವ ಎಂಬುದು ಅವರ ಅಚಲ ನಂಬಿಕೆಯಾಗಿದೆ.
