ದೇಶ ಕಾಯುವ ಯೋಧರನ್ನು ಕಂಡರೆ ಪ್ರತಿಯೊಬ್ಬ ಭಾರತೀಯನ ಎದೆಯಲ್ಲೂ ಹೆಮ್ಮೆ, ಗೌರವ ಮೂಡುವುದು ಸಹಜ. ಇದೀಗ ದೆಹಲಿ ಮೆಟ್ರೋ ರೈಲಿನಲ್ಲಿ ಪುಟ್ಟ ಬಾಲಕಿಯೊಬ್ಬಳು ಭದ್ರತಾ ಸಿಬ್ಬಂದಿಗೆ ನೀಡಿದ ಮುಗ್ಧ ಗೌರವದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸಿದ್ದು, ಲಕ್ಷಾಂತರ ಜನರ ಹೃದಯ ಗೆದ್ದಿದೆ.
ದೆಹಲಿ ಮೆಟ್ರೋ ಕೋಚ್ನಲ್ಲಿ ಪ್ರಯಾಣಿಸುತ್ತಿದ್ದ ಪುಟ್ಟ ಬಾಲಕಿಯೊಬ್ಬಳು, ಅಲ್ಲೇ ನಿಂತಿದ್ದ ಸಿಐಎಸ್ಎಫ್ (ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ – CISF) ಯೋಧನನ್ನು ಗಮನಿಸಿದ್ದಾಳೆ. ಯಾವುದೇ ಹಿಂಜರಿಕೆಯಿಲ್ಲದೆ ತಕ್ಷಣವೇ ಎದ್ದು ನಿಂತು, ಶಿಸ್ತಿನಿಂದ ಆ ಯೋಧನಿಗೆ ಗಂಭೀರವಾಗಿ ಸೆಲ್ಯೂಟ್ ಹೊಡೆದಿದ್ದಾಳೆ. ಬಾಲಕಿಯ ಈ ಅನಿರೀಕ್ಷಿತ ಹಾಗೂ ಗೌರವಪೂರ್ವಕ ನಡವಳಿಕೆಯನ್ನು ಕಂಡ ಯೋಧ ಕೂಡ ಪ್ರತಿಯಾಗಿ ಗೌರವ ಸಲ್ಲಿಸಿದ್ದು, ಈ ಸುಂದರ ಕ್ಷಣ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಸಿಐಎಸ್ಎಫ್ ಅಧಿಕೃತ ಖಾತೆಯಲ್ಲಿ ಹಂಚಿಕೆ ಈ ಮುದ್ದಾದ ವಿಡಿಯೋವನ್ನು ಕೇಂದ್ರ ಕೈಗಾರಿಕಾ ಭದ್ರತಾ ಪಡೆಯು ತನ್ನ ಅಧಿಕೃತ ‘ಎಕ್ಸ್’ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡಿದೆ. “ನಮ್ಮ ಸಮವಸ್ತ್ರ ಜನರಲ್ಲಿ ಮೂಡಿಸುವ ನಂಬಿಕೆ ಮತ್ತು ಗೌರವಕ್ಕೆ ಈ ಪುಟ್ಟ ಬಾಲಕಿಯ ಸೆಲ್ಯೂಟ್ ಸಾಕ್ಷಿಯಾಗಿದೆ. ಇದು ಕೇವಲ ಸಮವಸ್ತ್ರಕ್ಕೆ ಸಲ್ಲಿಸಿದ ಗೌರವ ಮಾತ್ರವಲ್ಲ, ದೇಶದ ಸೇವೆ, ಧೈರ್ಯ ಮತ್ತು ಸಮರ್ಪಣಾ ಮನೋಭಾವಕ್ಕೆ ಸಿಕ್ಕ ಹೃದಯಪೂರ್ವಕ ಗೌರವ” ಎಂದು ಸಿಐಎಸ್ಎಫ್ ಸಂಸ್ಥೆ ಭಾವುಕ ಸಾಲುಗಳನ್ನು ಬರೆದುಕೊಂಡಿದೆ.
ನೆಟ್ಟಿಗರ ಮೆಚ್ಚುಗೆಯ ಮಹಾಪೂರ ಯಾವುದೇ ಪೂರ್ವಸಿದ್ಧತೆಯಿಲ್ಲದೆ, ದೈನಂದಿನ ಮೆಟ್ರೋ ಪ್ರಯಾಣದ ವೇಳೆ ಸ್ವಯಂಪ್ರೇರಿತವಾಗಿ ನಡೆದ ಈ ಮುಗ್ಧ ಕ್ಷಣಕ್ಕೆ ಇಂಟರ್ನೆಟ್ನಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ.
“ವಯಸ್ಸಿನಲ್ಲಿ ಈಕೆ ಚಿಕ್ಕವಳಿರಬಹುದು, ಆದರೆ ಈಕೆಯ ದೇಶಭಕ್ತಿ ಮತ್ತು ಸೈನಿಕರ ಮೇಲಿರುವ ಗೌರವ ಅಪಾರವಾದುದು”, “ಮಕ್ಕಳಿಗೆ ಬಾಲ್ಯದಲ್ಲೇ ದೇಶ ಕಾಯುವವರ ಬಗ್ಗೆ ಗೌರವ ಕಲಿಸುವುದು ಹೆಮ್ಮೆಯ ವಿಚಾರ” ಎಂದು ಸಾಮಾಜಿಕ ಜಾಲತಾಣ ಬಳಕೆದಾರರು ಕಮೆಂಟ್ ಮಾಡುತ್ತಿದ್ದಾರೆ. ದೇಶದ ಸಮವಸ್ತ್ರಧಾರಿ ಯೋಧರು ಮತ್ತು ಸಾರ್ವಜನಿಕರ ನಡುವಿನ ಪ್ರೀತಿ ಹಾಗೂ ನಂಬಿಕೆಯನ್ನು ಈ ವಿಡಿಯೋ ಮತ್ತೊಮ್ಮೆ ಎತ್ತಿಹಿಡಿದಿದೆ.
