ಮೆರಿಲ್ಯಾಂಡ್: ಕಿವಿಯಲ್ಲಿ ಮೇಣ ಅಥವಾ ಕೊಳೆ ತುಂಬಿಕೊಂಡಾಗ ಹೆಚ್ಚಿನವರು ತಕ್ಷಣ ಹುಡುಕುವುದು ಕಾಟನ್ ಬಡ್ಸ್ (Cotton Swabs) ಅಥವಾ ಹೇರ್ ಪಿನ್ಗಳನ್ನು. ಆದರೆ, ಈ ರೀತಿ ಮಾಡುವುದು ನಿಮ್ಮ ಕಿವಿಯ ಆರೋಗ್ಯಕ್ಕೆ ಎಷ್ಟು ಅಪಾಯಕಾರಿ ಎಂಬ ಸಂಗತಿಯನ್ನು ಅಮೆರಿಕದ ಮೆರಿಲ್ಯಾಂಡ್ ಮೂಲದ ವೈದ್ಯ ಡಾ. ಕುನಾಲ್ ಸೂದ್ ವಿವರಿಸಿದ್ದಾರೆ. ಇನ್ಸ್ಟಾಗ್ರಾಮ್ನಲ್ಲಿ ಮಾರ್ಚ್ 20ರಂದು ವಿಡಿಯೋ ಹಂಚಿಕೊಂಡಿರುವ ಅವರು, ಕಿವಿ ಸ್ವಚ್ಛಗೊಳಿಸುವ ಸರಿಯಾದ ಮತ್ತು ಸುರಕ್ಷಿತ ವಿಧಾನದ ಬಗ್ಗೆ ಬೆಳಕು ಚೆಲ್ಲಿದ್ದಾರೆ.
ಕಿವಿಯ ಮೇಣ ಶತ್ರುವಲ್ಲ, ಮಿತ್ರ! ಸಾಮಾನ್ಯವಾಗಿ ನಾವು ಕಿವಿಯ ಮೇಣವನ್ನು ಕೊಳೆ ಎಂದು ಭಾವಿಸುತ್ತೇವೆ. ಆದರೆ ವೈದ್ಯಕೀಯ ಭಾಷೆಯಲ್ಲಿ ‘ಸೆರುಮೆನ್’ ಎಂದು ಕರೆಯಲಾಗುವ ಈ ಮೇಣವು ವಾಸ್ತವವಾಗಿ ಕಿವಿಗೆ ರಕ್ಷಾಕವಚದಂತೆ ಕೆಲಸ ಮಾಡುತ್ತದೆ. ಇದು ಹೊರಗಿನ ಧೂಳು, ಬ್ಯಾಕ್ಟೀರಿಯಾ ಮತ್ತು ಕಸವು ಕಿವಿಯ ಒಳಭಾಗಕ್ಕೆ ಹೋಗದಂತೆ ತಡೆಯುತ್ತದೆ. ಅಲ್ಲದೆ, ಕಿವಿಯ ಕಾಲುವೆಯನ್ನು ತೇವವಾಗಿರಿಸಿ, ತುರಿಕೆ ಉಂಟಾಗದಂತೆ ನೋಡಿಕೊಳ್ಳುತ್ತದೆ. ಇದು ಕಿವಿಯ ಒಳಗಿನ ಚರ್ಮಕ್ಕೆ ನೀರು ತಗುಲದಂತೆ ತಡೆಯುವ ‘ವಾಟರ್ ಪ್ರೂಫ್’ ಲೈನಿಂಗ್ ಆಗಿಯೂ ಕಾರ್ಯನಿರ್ವಹಿಸುತ್ತದೆ.
ಬಡ್ಸ್ ಬಳಸಿದರೆ ಏನಾಗುತ್ತದೆ? ಡಾ. ಸೂದ್ ಅವರ ಪ್ರಕಾರ, ನಾವು ಕಾಟನ್ ಬಡ್ಸ್ ಅಥವಾ ಪಿನ್ಗಳನ್ನು ಬಳಸಿದಾಗ, ಕಿವಿಯ ಮೇಣವು ಹೊರಗೆ ಬರುವ ಬದಲು ಇನ್ನೂ ಆಳಕ್ಕೆ ಹೋಗಿ ಗಟ್ಟಿಯಾಗುತ್ತದೆ. ಇದು ಕಿವಿಯ ತಮಟೆಗೆ (Eardrum) ಹಾನಿ ಮಾಡಬಹುದು. ಇದರಿಂದ ಕೇಳುವ ಶಕ್ತಿ ಕಡಿಮೆಯಾಗುವುದು, ಕಿವಿಯಲ್ಲಿ ಸದಾ ಶಬ್ದ ಕೇಳಿಸುವುದು (Ringing), ಕಿವಿ ಭಾರವಾದಂತಾಗುವುದು ಮತ್ತು ತಲೆಸುತ್ತು ಬರುವ ಸಾಧ್ಯತೆಗಳಿರುತ್ತವೆ. ‘ಇಯರ್ ಕ್ಯಾಂಡ್ಲಿಂಗ್’ ನಂತಹ ಅಪಾಯಕಾರಿ ವಿಧಾನಗಳಿಂದಲೂ ದೂರವಿರಿ ಎಂದು ಅವರು ಎಚ್ಚರಿಸಿದ್ದಾರೆ.
ಸರಿಯಾದ ಕ್ರಮ ಯಾವುದು? ಒಂದು ವೇಳೆ ಕಿವಿಯಲ್ಲಿ ಮೇಣ ಅತಿಯಾಗಿ ಸಂಗ್ರಹವಾಗಿ ಬ್ಲಾಕ್ ಆಗಿದ್ದರೆ, ನೀವಾಗಿಯೇ ಅದನ್ನು ತೆಗೆಯಲು ಸಾಹಸ ಮಾಡಬೇಡಿ. ತಕ್ಷಣ ವೈದ್ಯರನ್ನು ಭೇಟಿ ಮಾಡಿ. ವೈದ್ಯರು ವಿಶೇಷ ಉಪಕರಣಗಳು, ಸಕ್ಷನ್ ಅಥವಾ ಸುರಕ್ಷಿತ ನೀರಾವರಿ (Irrigation) ವಿಧಾನದ ಮೂಲಕ ಕಿವಿಯ ತಮಟೆಗೆ ತೊಂದರೆಯಾಗದಂತೆ ಮೇಣವನ್ನು ಹೊರತೆಗೆಯುತ್ತಾರೆ. ಕಿವಿಯ ಮೇಣವು ಸಾಮಾನ್ಯವಾಗಿ ಹಳದಿ ಅಥವಾ ಕಂದು ಬಣ್ಣದಲ್ಲಿದ್ದು (Wet earwax), ಕೆಲವರಲ್ಲಿ ಬೂದು ಬಣ್ಣದ (Dry earwax) ಪುಡಿಯಂತಿರುತ್ತದೆ. ಇದು ಸಂಪೂರ್ಣವಾಗಿ ವಂಶವಾಹಿಯ ಮೇಲೆ ಅವಲಂಬಿತವಾಗಿರುತ್ತದೆ.
ಕಿವಿ ಅತ್ಯಂತ ಸೂಕ್ಷ್ಮವಾದ ಅಂಗ. ಅದರ ಸ್ವಚ್ಛತೆಯ ವಿಷಯದಲ್ಲಿ ಅಸಡ್ಡೆ ತೋರುವುದು ಅಥವಾ ತಪ್ಪು ವಿಧಾನಗಳನ್ನು ಅನುಸರಿಸುವುದು ಶಾಶ್ವತ ಕಿವುಡುತನಕ್ಕೆ ಕಾರಣವಾಗಬಹುದು.
