ಲಂಡನ್‌ ಐಷಾರಾಮಿ ಹೋಟೆಲ್‌ನಲ್ಲಿ ಸೌದಿ ರಾಜಕುಮಾರ ದುರಂತ ಸಾವು; ತನಿಖೆಯಲ್ಲಿ ಬಹಿರಂಗವಾಯ್ತು ಶಾಕಿಂಗ್ ಅಂಶ

ಲಂಡನ್-ಲಂಡನ್‌ನ ಅತ್ಯಂತ ಐಷಾರಾಮಿ ಕೆನ್ಸಿಂಗ್ಟನ್‌ ಪ್ರದೇಶದಲ್ಲಿರುವ ‘ಮ್ಯಾರಿಯಟ್ ಹೋಟೆಲ್‌’ನಲ್ಲಿ ಸೌದಿ ಅರೇಬಿಯಾದ 29 ವರ್ಷದ ರಾಜಕುಮಾರ ಅಬ್ದುಲ್ಲಾ ಬಿನ್ ಫಹಾದ್ ಬಿನ್ ಅಬ್ದುಲ್ಲಾ ಬಿನ್ ಅಬ್ದುಲಾಜೀಜ್ ಬಿನ್ ಜಲವಿ ಅಲ್ ಸೌದ್ ಅವರ ಮೃತದೇಹ ಪತ್ತೆಯಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕರೋನರ್ ನ್ಯಾಯಾಲಯದ ತನಿಖಾ ವರದಿ ಬಹಿರಂಗಗೊಂಡಿದೆ. ರಾಜಕುಮಾರನ ಸಾವು ಅತಿಯಾದ ಮದ್ಯ ಮತ್ತು ಮಾರಕ ಪಾರ್ಟಿ ಡ್ರಗ್ಸ್‌ ಸೇವನೆಯಿಂದ ಸಂಭವಿಸಿದ ‘ಹೃದಯಾಘಾತ’ದಿಂದ ಆಗಿದೆ ಎಂದು ತನಿಖೆಯಲ್ಲಿ ದೃಢಪಟ್ಟಿದೆ.

ತಜ್ಞರು ನ್ಯಾಯಾಲಯಕ್ಕೆ ಸಲ್ಲಿಸಿದ ವೈದ್ಯಕೀಯ ಮತ್ತು ವಿಷಶಾಸ್ತ್ರದ ವರದಿಯ ಪ್ರಕಾರ, ರಾಜಕುಮಾರನ ದೇಹದಲ್ಲಿ ಅನಿಯಂತ್ರಿತ ಪ್ರಮಾಣದ ಮಾದಕ ವಸ್ತುಗಳು ಪತ್ತೆಯಾಗಿವೆ.

ರಕ್ತದಲ್ಲಿ 100 ಮಿಲಿ ಲೀಟರ್‌ಗೆ 222 ಮಿಗ್ರಾಂ ಆಲ್ಕೋಹಾಲ್ ಪತ್ತೆಯಾಗಿದೆ. ಇದು ಇಂಗ್ಲೆಂಡ್‌ನ ಚಾಲನಾ ಮಿತಿಗಿಂತ ಮೂರು ಪಟ್ಟು ಹೆಚ್ಚು. ಈ ಮಟ್ಟದ ಆಲ್ಕೋಹಾಲ್ ವ್ಯಕ್ತಿಯನ್ನು ಕೋಮಾಗೆ ತಳ್ಳಲು ಸಾಕು.

ದೇಹದಲ್ಲಿ ಪತ್ತೆಯಾದ ಅಪಾಯಕಾರಿ ವಸ್ತುಗಳು

ಡ್ರಗ್ ಕಾಕ್ಟೇಲ್:

GHB (ಗಾಮಾ-ಹೈಡ್ರಾಕ್ಸಿಬ್ಯುಟೈರೇಟ್): ಪಾರ್ಟಿಗಳಲ್ಲಿ ಬಳಸಲಾಗುವ ಅತ್ಯಂತ ಅಪಾಯಕಾರಿ ಕೆಮಿಕಲ್ ಡ್ರಗ್‌ನ ಮಾರಕ ಪ್ರಮಾಣ.

ಗಾಂಜಾ, ಕ್ಸಾನಾಕ್ಸ್ (Xanax) ಹಾಗೂ ಇತರ ಆತಂಕ-ವಿರೋಧಿ (Anti-anxiety) ಮಾತ್ರೆಗಳ ಕುರುಹುಗಳು.

ಈ ಎಲ್ಲಾ ರಾಸಾಯನಿಕಗಳು ಮತ್ತು ಮದ್ಯ ಒಟ್ಟಿಗೆ ಸೇರಿದಾಗ ಉಂಟಾದ ತೀವ್ರ ವಿಷಕಾರಿ ಪರಿಣಾಮದಿಂದ ರಾಜಕುಮಾರನಿಗೆ ದಿಢೀರ್ ಹೃದಯ ಸ್ತಂಭನ (Cardiac Arrest) ಸಂಭವಿಸಿದೆ.

ಖಿನ್ನತೆ ಮತ್ತು ವ್ಯಸನದ ಹಿನ್ನೆಲೆ

ನ್ಯಾಯಾಲಯದ ವಿಚಾರಣೆ ವೇಳೆ, ರಾಜಕುಮಾರ ಅಬ್ದುಲ್ಲಾ ತೀವ್ರ ಖಿನ್ನತೆ ಮತ್ತು ಮಾದಕ ವ್ಯಸನದಿಂದ ಬಳಲುತ್ತಿದ್ದರು ಎಂಬ ವಿಷಯವೂ ಹೊರಬಂದಿದೆ.

ಆಗಸ್ಟ್ 2025 ರಲ್ಲಿ ರೋಹ್ಯಾಂಪ್ಟನ್‌ನ ‘ಪ್ರಿಯರಿ ಚಿಕಿತ್ಸಾಲಯ’ಕ್ಕೆ ದಾಖಲಾಗಿ ಆಲ್ಕೋಹಾಲ್ ಮತ್ತು ಪ್ರಿಸ್ಕ್ರಿಪ್ಷನ್ ಔಷಧಿಗಳ (ಬೆಂಜೊಡಿಯಜೆಪೈನ್‌ಗಳು) ಚಿಕಿತ್ಸೆ ಪಡೆದಿದ್ದರು.

ನಂತರ ಮರ್ಸಿಸೈಡ್‌ನ ‘ರೇನ್‌ಫೋರ್ಡ್ ಹಾಲ್ ಕ್ಲಿನಿಕ್’ನಲ್ಲೂ ಚಿಕಿತ್ಸೆ ಮುಂದುವರಿಸಿದ್ದರು.ಆದರೆ, ಚಿಕಿತ್ಸೆಯ ನಂತರದ ನಿಗದಿತ ಪರಿಶೀಲನಾ ಭೇಟಿಗಳನ್ನು ಅವರು ತಪ್ಪಿಸಿಕೊಂಡಿದ್ದರು.

ನ್ಯಾಯಾಲಯದ ತೀರ್ಪು

ಸಾಕ್ಷ್ಯಗಳನ್ನು ಪರಿಶೀಲಿಸಿದ ಸಹಾಯಕ ಕರೋನರ್ ಜೀನ್ ಹಾರ್ಕಿನ್, ಇದೊಂದು “ದುರಂತಮಯ ಸಾವು” (Misadventure) ಎಂದು ತೀರ್ಪು ನೀಡಿದ್ದಾರೆ.

ರಾಜಕುಮಾರ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲು ಯಾವುದೇ ಡೆತ್ ನೋಟ್ ಆಗಲಿ ಅಥವಾ ಮುನ್ಸೂಚನೆಯಾಗಲಿ ಸಿಕ್ಕಿಲ್ಲ.

ಘಟನೆಯಲ್ಲಿ ಮೂರನೇ ವ್ಯಕ್ತಿಯ ಭಾಗವಹಿಸುವಿಕೆ ಅಥವಾ ಕೊಲೆಯ ಯತ್ನದ ಲಕ್ಷಣಗಳು ಕಂಡುಬಂದಿಲ್ಲ.ಸೌದಿ ರಾಯಲ್ ಕೋರ್ಟ್ ಅಧಿಕೃತ ಹೇಳಿಕೆಯಲ್ಲಿ ರಾಜಕುಮಾರನ ಮರಣವನ್ನು ದೃಢಪಡಿಸಿದ್ದು, ರಿಯಾದ್‌ನ ಪ್ರಸಿದ್ಧ ಇಮಾಮ್ ತುರ್ಕಿ ಬಿನ್ ಅಬ್ದುಲ್ಲಾ ಮಸೀದಿಯಲ್ಲಿ ಅಂತಿಮ ಸಂಸ್ಕಾರದ ಪ್ರಾರ್ಥನೆಗಳನ್ನು ನೆರವೇರಿಸುವುದಾಗಿ ತಿಳಿಸಿದೆ.

ಘಟನೆಯ ವಿವರಗಳು

ಘಟನೆಯ ವಿವರ

ಘಟನೆ ನಡೆದ ಸ್ಥಳ: ಕೆನ್ಸಿಂಗ್ಟನ್‌ನ ಮ್ಯಾರಿಯಟ್ ಹೋಟೆಲ್ (ರಾತ್ರಿಗೆ ಸುಮಾರು £600 ವೆಚ್ಚದ ಕೋಣೆ).

ಮೃತದೇಹ ಪತ್ತೆ- ಕೋಣೆಯ ಐದನೇ ಮಹಡಿಯ ಸ್ನಾನಗೃಹದ ನೆಲದ ಮೇಲೆ ಸಂಪೂರ್ಣವಾಗಿ ಬಟ್ಟೆ ಧರಿಸಿದ ಸ್ಥಿತಿಯಲ್ಲಿ ಹೋಟೆಲ್‌ ಸಿಬ್ಬಂದಿಗೆ ಮೃತದೇಹ ಪತ್ತೆಯಾಗಿತ್ತು.

ಸಿಸಿಟಿವಿ ಪುರಾವೆ- ಸಾಯುವ ಹಿಂದಿನ ಸಂಜೆ ರಾಜಕುಮಾರ ಸಿಗರೇಟ್ ಕುಡಿಯಲು ಹೊರಗೆ ಬಂದಿದ್ದ ದೃಶ್ಯವೇ ಕೊನೆಯದಾಗಿ ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು. ಅವರು ಕೋಣೆಯಲ್ಲಿ ಒಬ್ಬಂಟಿಯಾಗಿದ್ದರು ಎಂಬುದು ದೃಢಪಟ್ಟಿದೆ.