ಮಹಾರಾಷ್ಟ್ರದ ಪ್ರಸಿದ್ಧ ಪ್ರವಾಸಿ ತಾಣ ಲೋನಾವಾಲಾದ ಜ್ಯುವೆಲ್ಲರಿ ಅಂಗಡಿಯೊಂದರಲ್ಲಿ ಸಿನಿಮೀಯ ಶೈಲಿಯ ಕಳ್ಳತನವೊಂದು ನಡೆದಿದ್ದು, ಗ್ರಾಹಕಿಯಂತೆ ಬಂದ ಮಹಿಳೆಯೊಬ್ಬಳು ಅಂಗಡಿ ಸಿಬ್ಬಂದಿಯ ಕಣ್ಣು ತಪ್ಪಿಸಿ ಬೆಳ್ಳಿ ಆಭರಣಗಳಿದ್ದ ಸಂಪೂರ್ಣ ಪೆಟ್ಟಿಗೆಯನ್ನೇ (Box) ಹೊತ್ತೊಯ್ದು ಪರಾರಿಯಾಗಿರುವ ಘಟನೆ ಬೆಳಕಿಗೆ ಬಂದಿದೆ.
ಮಹಿಳೆ ಅಂಗಡಿಯಿಂದ ಬಾಕ್ಸ್ ಹಿಡಿದು ಹೊರಗೆ ಓಡಿಬರುವುದು ಹಾಗೂ ಅಂಗಡಿಯ ಸಿಬ್ಬಂದಿ ಆಕೆಯ ಬೆನ್ನುಬಿದ್ದ ದೃಶ್ಯಗಳು ಸಿಸಿಟಿವಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ಸೆರೆಯಾಗಿದ್ದು, ಸಾರ್ವಜನಿಕರಲ್ಲಿ ಅಚ್ಚರಿ ಮೂಡಿಸಿದೆ.
ಗಮನ ಬೇರೆಡೆ ಸೆಳೆದು ಕ್ಷಣಾರ್ಧದಲ್ಲಿ ಕೈಚಳಕ
ವರದಿಗಳ ಪ್ರಕಾರ, ಸಾಮಾನ್ಯ ಗ್ರಾಹಕಿಯಂತೆ ಅಂಗಡಿಗೆ ಪ್ರವೇಶಿಸಿದ ಮಹಿಳೆ, ತನಗೆ ಬೆಳ್ಳಿ ಆಭರಣಗಳನ್ನು ತೋರಿಸುವಂತೆ ಕೇಳಿದ್ದಾಳೆ. ಅಂಗಡಿಯವರು ಕೆಲವು ವಿನ್ಯಾಸಗಳನ್ನು ಮುಂದಿಟ್ಟಾಗ, “ಇನ್ನೂ ಹೆಚ್ಚಿನ ವೆರೈಟಿ, ಹೊಸ ಡಿಸೈನ್‌ಗಳನ್ನು ತೋರಿಸಿ” ಎಂದು ಕೇಳಿದ್ದಾಳೆ.
ಆಕೆಯ ಮಾತನ್ನು ನಂಬಿದ ವ್ಯಾಪಾರಿ ಮತ್ತಷ್ಟು ಒಡವೆಗಳನ್ನು ತರಲು ಅಂಗಡಿಯ ಇನ್ನೊಂದು ಮೂಲೆಯತ್ತ ತೆರಳಿದ್ದಾರೆ. ಅಂಗಡಿಯವರ ಗಮನ ಬೇರೆಡೆ ತಿರುಗುತ್ತಿದ್ದಂತೆ ಕ್ಷಣಮಾತ್ರವೂ ತಡಮಾಡದ ಚಾಲಾಕಿ ಮಹಿಳೆ, ಕೌಂಟರ್ ಮೇಲಿದ್ದ ಬೆಳ್ಳಿ ಆಭರಣಗಳ ಇಡೀ ಪೆಟ್ಟಿಗೆಯನ್ನು ಕ್ಷಿಪ್ರವಾಗಿ ಎತ್ತಿಕೊಂಡು ಅಂಗಡಿಯಿಂದ ಹೊರಗೆ ಧಾವಿಸಿದ್ದಾಳೆ.
ಬೈಕ್‌ನಲ್ಲಿ ಕಾದು ನಿಂತಿದ್ದ ಸಹಚರನೊಂದಿಗೆ ಪರಾರಿ
ಪೆಟ್ಟಿಗೆ ಮಾಯವಾಗಿರುವುದನ್ನು ತಕ್ಷಣವೇ ಗಮನಿಸಿದ ಅಂಗಡಿಯ ಮಾಲೀಕರು ಮತ್ತು ಸಿಬ್ಬಂದಿ ಗಾಬರಿಯಿಂದ ಹೊರಗೆ ಓಡಿಬಂದಿದ್ದಾರೆ. ಅಷ್ಟರಲ್ಲೇ ರಸ್ತೆಯ ಟ್ರಾಫಿಕ್ ನಡುವೆ ನುಗ್ಗಿ ಓಡಿದ ಮಹಿಳೆ, ಅಂಗಡಿಯ ಹೊರಗೆ ಮೊದಲೇ ಬೈಕ್ ಸ್ಟಾರ್ಟ್ ಮಾಡಿಕೊಂಡು ಕಾದು ನಿಂತಿದ್ದ ತನ್ನ ಸಹಚರನ ಹಿಂಬದಿ ಸೀಟಿಗೆ ಹಾರಿ ಕುಳಿತಿದ್ದಾಳೆ.
ಅಂಗಡಿ ಸಿಬ್ಬಂದಿ ಸಮೀಪಕ್ಕೆ ಬರುವಷ್ಟರಲ್ಲಿ ಇಬ್ಬರೂ ಬೈಕ್‌ನಲ್ಲಿ ಮಿಂಚಿನ ವೇಗದಲ್ಲಿ ಪರಾರಿಯಾಗುವಲ್ಲಿ ಯಶಸ್ವಿಯಾಗಿದ್ದಾರೆ.
ಎಫ್‌ಐಆರ್ ದಾಖಲು, ಶೋಧ ಕಾರ್ಯ ತೀವ್ರ
ಘಟನೆ ಸಂಬಂಧ ಜ್ಯುವೆಲ್ಲರಿ ಮಾಲೀಕರು ಸ್ಥಳೀಯ ಪೊಲೀಸ್ ಠಾಣೆಗೆ ತೆರಳಿ ಅಧಿಕೃತ ದೂರು ದಾಖಲಿಸಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು, ಅಂಗಡಿ ಹಾಗೂ ರಸ್ತೆಯ ಸುತ್ತಮುತ್ತಲಿನ ಸಿಸಿಟಿವಿ ದೃಶ್ಯಾವಳಿಗಳನ್ನು ವಶಕ್ಕೆ ಪಡೆದು ಪರಿಶೀಲನೆ ನಡೆಸುತ್ತಿದ್ದಾರೆ.
ಕಳ್ಳತನಕ್ಕೆ ಬಳಸಲಾದ ಬೈಕ್‌ನ ನೋಂದಣಿ ಸಂಖ್ಯೆ ಮತ್ತು ಆರೋಪಿ ಮಹಿಳೆಯ ಚಹರೆಯನ್ನು ಪತ್ತೆಹಚ್ಚಲು ವಿಶೇಷ ತಂಡಗಳನ್ನು ರಚಿಸಲಾಗಿದ್ದು, ಖದೀಮರ ಪತ್ತೆಗೆ ಜಾಲ ಬೀಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
