ಬೆಂಗಳೂರು: ತೂಕ ಇಳಿಸಬೇಕು ಎಂದು ನಿರ್ಧರಿಸಿದ ಕೂಡಲೇ ಹಲವರು ಮಾಡುವ ಮೊದಲ ಕೆಲಸವೆಂದರೆ ಊಟ ಬಿಡುವುದು. ಆದರೆ, ಉಪವಾಸ ಮಾಡುವುದರಿಂದ ದೇಹದ ಪೋಷಕಾಂಶಗಳು ಕುಸಿಯುತ್ತವೆ ಎಂಬುದು ನಿಮಗೆ ಗೊತ್ತೇ? ಆರೋಗ್ಯಕರವಾಗಿ ತೂಕ ಇಳಿಸಲು ಇರುವ ಅತ್ಯುತ್ತಮ ಮಾರ್ಗವೆಂದರೆ ಅದು ವೆಜಿಟೇಬಲ್ ಡಯಟ್ ಸೂಪ್.
ಹೋಟೆಲ್ಗಳಲ್ಲಿ ಸಿಗುವ ಸಂರಕ್ಷಕಗಳು (Preservatives) ಮತ್ತು ಅತಿಯಾದ ಉಪ್ಪು ಇರುವ ಸೂಪ್ಗಳಿಗಿಂತ, ಮನೆಯಲ್ಲೇ ತಯಾರಿಸುವ ಪೌಷ್ಟಿಕಾಂಶಭರಿತ ಸೂಪ್ ನಿಮ್ಮ ಜೀರ್ಣಕ್ರಿಯೆಯನ್ನು ಹೆಚ್ಚಿಸಿ, ಕೊಬ್ಬನ್ನು ಕರಗಿಸಲು ನೆರವಾಗುತ್ತದೆ.
ಈ ಡಯಟ್ ಸೂಪ್ ಏಕೆ ವಿಶೇಷ?
ಇದು ದೇಹವನ್ನು ಹೈಡ್ರೇಟ್ ಆಗಿಡುತ್ತದೆ.
ನಾರು ಪದಾರ್ಥ (Fiber) ಹೆಚ್ಚಿರುವುದರಿಂದ ಹೆಚ್ಚು ಹೊತ್ತು ಹಸಿವಾಗದಂತೆ ತಡೆಯುತ್ತದೆ.
ದೇಹದಲ್ಲಿರುವ ಕಲ್ಮಶಗಳನ್ನು ಹೊರಹಾಕಲು (Detox) ಸಹಾಯ ಮಾಡುತ್ತದೆ.
ಬೇಕಾಗುವ ಪದಾರ್ಥಗಳು (Ingredients):
ಮಸಾಲೆಗೆ: ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ (3 ಎಸಳು), ಸ್ವಲ್ಪ ಶುಂಠಿ, ಹಸಿರು ಈರುಳ್ಳಿ (Spring Onion).
ತರಕಾರಿಗಳು: ಕ್ಯಾರೆಟ್ ಬೀನ್ಸ್, ಕ್ಯಾಪ್ಸಿಕಂ, ಎಲೆಕೋಸು, ಬಟಾಣಿ ಮತ್ತು ಸ್ವೀಟ್ ಕಾರ್ನ್ (ಎಲ್ಲವೂ ಸಣ್ಣಗೆ ಹೆಚ್ಚಿದ್ದು).
ರುಚಿಗೆ: ಉಪ್ಪು, ಕಾಳು ಮೆಣಸಿನ ಪುಡಿ (Pepper), ಒಣ ಮೆಣಸಿನ ಪುಡಿ (Chilli flakes), ಮಿಕ್ಸ್ಡ್ ಹರ್ಬ್ಸ್ ಮತ್ತು ಸ್ವಲ್ಪ ವಿನೇಗರ್.
ದಪ್ಪಗಾಗಿಸಲು: ಮುಕ್ಕಾಲು ಚಮಚ ಕಾರ್ನ್ ಫ್ಲೋರ್.
ತಯಾರಿಸುವ ಸರಳ ವಿಧಾನ (Step-by-Step):
ಒಗ್ಗರಣೆ: ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ, ಶುಂಠಿ ಮತ್ತು ಬೆಳ್ಳುಳ್ಳಿಯನ್ನು ಹಾಕಿ ಸುವಾಸನೆ ಬರುವವರೆಗೆ ಹುರಿಯಿರಿ.
ತರಕಾರಿ ಫ್ರೈ: ಮೊದಲು ಹಸಿರು ಈರುಳ್ಳಿ ಕ್ಯಾರೆಟ್ ಬೀನ್ಸ್ ಮತ್ತು ಕ್ಯಾಪ್ಸಿಕಂ ಸೇರಿಸಿ ಮಧ್ಯಮ ಉರಿಯಲ್ಲಿ ಬಾಡಿಸಿ. ನಂತರ ಎಲೆಕೋಸು, ಬಟಾಣಿ ಮತ್ತು ಸ್ವೀಟ್ ಕಾರ್ನ್ ಸೇರಿಸಿ.
ಬೇಯಿಸುವುದು: ಈಗ 4 ಬಟ್ಟಲು ನೀರು ಹಾಕಿ 5–6 ನಿಮಿಷಗಳ ಕಾಲ ತರಕಾರಿಗಳನ್ನು ಚೆನ್ನಾಗಿ ಬೇಯಲು ಬಿಡಿ.
ದಪ್ಪವಾಗಿಸಲು: ಸೂಪ್ ತುಸು ಗಟ್ಟಿಯಾಗಲು ತಣ್ಣನೆಯ ನೀರಿನಲ್ಲಿ ಕಲಸಿದ ಕಾರ್ನ್ ಫ್ಲೋರ್ ಮಿಶ್ರಣವನ್ನು ಸೇರಿಸಿ ಕುದಿಸಿ.
ರುಚಿ ಹೆಚ್ಚಿಸಲು: ಕೊನೆಯಲ್ಲಿ ರುಚಿಗೆ ತಕ್ಕಷ್ಟು ಉಪ್ಪು ವಿನೇಗರ್ ಮಿಕ್ಸ್ಡ್ ಹರ್ಬ್ಸ್ ಕಾಳುಮೆಣಸಿನ ಪುಡಿ ಮತ್ತು ಒಣ ಮೆಣಸಿನ ಪುಡಿ ಸೇರಿಸಿ 2 ನಿಮಿಷ ಕುದಿಸಿದರೆ ನಿಮ್ಮ ಬಿಸಿ ಬಿಸಿ ಡಯಟ್ ಸೂಪ್ ಸಿದ್ಧ
