ಲಕ್ನೋ: ಶಾಲಾ ತರಗತಿಯ ಕೋಣೆಯೊಳಗೆ ನಡೆದಿರುವ ಅತ್ಯಂತ ಆಘಾತಕಾರಿ ಮತ್ತು ದಿಗಿಲು ಹುಟ್ಟಿಸುವ ಕ್ರೌರ್ಯದ ಘಟನೆಯೊಂದು ಉತ್ತರ ಪ್ರದೇಶದ ಲಕ್ನೋದಿಂದ ವರದಿಯಾಗಿದೆ. ಇಲ್ಲಿನ ಎಎಲ್ಎಸ್ ಅಕಾಡೆಮಿ (ALS Academy) ಶಾಲೆಯಲ್ಲಿ ಕೇವಲ 5 ವರ್ಷದ ನರ್ಸರಿ ವಿದ್ಯಾರ್ಥಿಯೊಬ್ಬನ ಮೇಲೆ ಅದೇ ತರಗತಿಯ ಕ್ಲಾಸ್ ಮಾನಿಟರ್ ಬರೋಬ್ಬರಿ 2 ನಿಮಿಷಗಳ ಕಾಲ ಭೀಕರವಾಗಿ ಹಲ್ಲೆ ನಡೆಸಿದ್ದಾಳೆ. ಶಿಕ್ಷಕಿ ತರಗತಿಯಿಂದ ಹೊರಹೋಗುತ್ತಿದ್ದಂತೆ ನಡೆದ ಈ ಅಮಾನವೀಯ ಘಟನೆಯಿಂದಾಗಿ ಮಗುವಿನ ಮುಖ ಸಂಪೂರ್ಣವಾಗಿ ಊದಿಕೊಂಡಿದ್ದು, ತೀವ್ರ ಗಾಯಗಳಾಗಿವೆ. ಬುಧವಾರ ನಡೆದಿರುವ ಈ ಇಡೀ ಕೃತ್ಯವು ಶಾಲಾ ಕೊಠಡಿಯ ಸಿಸಿಟಿವಿ (CCTV) ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಸದ್ಯ ಪೋಷಕರಲ್ಲಿ ತೀವ್ರ ಆಕ್ರೋಶ ಮೂಡಿಸಿದೆ.
ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಯ್ತು ಅಸಲಿ ಭೀತಿ:
ಲಭ್ಯವಾಗಿರುವ ಸುಮಾರು 3 ನಿಮಿಷಗಳ ಸಿಸಿಟಿವಿ ದೃಶ್ಯಾವಳಿಗಳ ಪ್ರಕಾರ, ತರಗತಿಯಲ್ಲಿ ಸುಮಾರು 18 ವಿದ್ಯಾರ್ಥಿಗಳಿದ್ದರು. ಶಿಕ್ಷಕಿಯೊಬ್ಬರು ತರಗತಿಯಿಂದ ಹೊರಡುವ ಮುನ್ನ ಎಲ್ಲಾ ಮಕ್ಕಳಿಗೂ ಬೆಂಚ್ ಮೇಲೆ ತಲೆ ತಗ್ಗಿಸಿ ಕುಳಿತುಕೊಳ್ಳುವಂತೆ ಸೂಚನೆ ನೀಡಿದ್ದಾರೆ. ತದನಂತರ ತರಗತಿಯನ್ನು ನೋಡಿಕೊಳ್ಳುವಂತೆ ಕ್ಲಾಸ್ ಮಾನಿಟರ್ಗೆ ಜವಾಬ್ದಾರಿ ವಹಿಸಿ ಶಿಕ್ಷಕಿ ಹೊರಗೆ ನಡೆದಿದ್ದಾರೆ.
ಶಿಕ್ಷಕಿ ಕೊಠಡಿಯಿಂದ ಹೊರಹೋಗುತ್ತಿದ್ದಂತೆ ಮಾನಿಟರ್ ತನ್ನ ಅಟ್ಟಹಾಸ ಶುರು ಮಾಡಿದ್ದಾಳೆ. ತಲೆ ಎತ್ತಿದ ವಿದ್ಯಾರ್ಥಿಗಳಿಗೆ ತಕ್ಷಣವೇ ಹೊಡೆಯಲು ಆರಂಭಿಸಿದ್ದಾಳೆ. ಕೆಲ ಮಕ್ಕಳಿಗೆ ಕಪಾಳಮೋಕ್ಷ ಮಾಡಿದ ಆಕೆ, ಬಳಿಕ 5 ವರ್ಷದ ಈ ಮುಗ್ಧ ಬಾಲಕನತ್ತ ತಿರುಗಿದ್ದಾಳೆ. ಮಗು ಕೇವಲ ಕೆಲವು ಸೆಕೆಂಡುಗಳ ಕಾಲ ತಲೆ ಎತ್ತಿದ್ದನ್ನೇ ಗಮನಿಸಿದ ಮಾನಿಟರ್, ತಕ್ಷಣ ಆತನ ಡೆಸ್ಕ್ ಬಳಿ ಧಾವಿಸಿ ಸತತವಾಗಿ ಕಪಾಳಕ್ಕೆ ಹೊಡೆದಿದ್ದಾಳೆ. ಅಷ್ಟೇ ಅಲ್ಲದೆ ಮಗುವಿನ ತಲೆಯನ್ನು ಬಲವಂತವಾಗಿ ಡೆಸ್ಕ್ ಮೇಲೆ ಒತ್ತಿ ಹಿಡಿಯಲು ಯತ್ನಿಸಿದ್ದಾಳೆ. ಮಗು ತೀವ್ರ ನೋವಿನಿಂದ ಅಳಲಾರಂಭಿಸಿದರೂ ಆಕೆ ಕರುಣೆ ತೋರದೆ ಮತ್ತೆ ಹಲ್ಲೆ ನಡೆಸಿದ್ದಾಳೆ.
ಭಯ ಮತ್ತು ನೋವಿನಿಂದ ಕಂಗಾಲಾದ ಬಾಲಕ ತರಗತಿಯಿಂದ ಹೊರಗೆ ಓಡಿಹೋಗಲು ಪ್ರಯತ್ನಿಸಿದ್ದಾನೆ. ಆದರೆ, ಕ್ರೂರವಾಗಿ ವರ್ತಿಸಿದ ಮಾನಿಟರ್ ಆತನ ದಾರಿ ತಡೆದು, ಬಲವಂತವಾಗಿ ಒಳಗೆ ಎಳೆದುಕೊಂಡು ಬಂದು ಮತ್ತೆ ಹೊಡೆದಿದ್ದಾಳೆ. ಅಷ್ಟಕ್ಕೇ ನಿಲ್ಲಿಸದೆ, ತರಗತಿಯ ಮುಖ್ಯ ಬಾಗಿಲನ್ನು ಒಳಗಿನಿಂದ ಚಿಲಕ ಹಾಕಿದ್ದಾಳೆ. ಮಗು ಮತ್ತೊಂದು ಬಾಗಿಲನ್ನು ತೆರೆಯಲು ಯತ್ನಿಸಿದಾಗ, ಅದೂ ಲಾಕ್ ಆಗಿದ್ದರಿಂದ ಅಸಹಾಯಕನಾಗಿದ್ದಾನೆ. ಮಾನಿಟರ್ ಆತನನ್ನು ಮತ್ತೆ ಸೀಟಿಗೆ ಎಳೆದು ತಂದು ಮನಬಂದಂತೆ ಥಳಿಸಿದ್ದಾಳೆ. ಈ ಇಡೀ ಭೀಕರ ದೃಶ್ಯ ನಡೆಯುತ್ತಿದ್ದಾಗ ಉಳಿದ ವಿದ್ಯಾರ್ಥಿಗಳು ಭಯದಿಂದ ತಲೆ ತಗ್ಗಿಸಿ ಸುಮ್ಮನೆ ಕುಳಿತಿದ್ದರು.
ಸುಮಾರು 10 ನಿಮಿಷಗಳ ನಂತರ ಶಿಕ್ಷಕಿ ಮರಳಿ ಬಂದು ಬಾಗಿಲು ತಟ್ಟಿದಾಗ ಮಾನಿಟರ್ ಚಿಲಕ ತೆಗೆದಿದ್ದಾಳೆ. ತಕ್ಷಣವೇ ಬಾಲಕ ಶಿಕ್ಷಕಿಯ ಬಳಿ ಓಡಿಹೋಗಿ ತನ್ನ ಮೇಲಾದ ಹಲ್ಲೆಯ ಬಗ್ಗೆ ದೂರು ನೀಡಿದ್ದಾನೆ. ಶಿಕ್ಷಕಿ ಇಬ್ಬರನ್ನೂ ವಿಚಾರಿಸುತ್ತಿರುವುದು ಸಿಸಿಟಿವಿಯಲ್ಲಿ ಕಂಡುಬಂದಿದೆ.
ಮಗು ಸಂಜೆ ಮನೆಗೆ ಮರಳಿದಾಗ ಆತನ ಮುಖ ಊದಿಕೊಂಡಿರುವುದನ್ನು ಮತ್ತು ಗಾಯದ ಗುರುತುಗಳನ್ನು ಕಂಡು ಪೋಷಕರು ತೀವ್ರ ಆತಂಕಗೊಂಡಿದ್ದಾರೆ. ತಕ್ಷಣವೇ ಶಾಲೆಗೆ ಧಾವಿಸಿದ ಪೋಷಕರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅಸಲಿ ಸತ್ಯ ಹೊರಬಿದ್ದಿದೆ. ಘಟನೆಯ ತೀವ್ರತೆಯನ್ನು ಅರಿತ ಶಾಲಾ ಆಡಳಿತ ಮಂಡಳಿಯು ಹಲ್ಲೆ ನಡೆಸಿದ ಕ್ಲಾಸ್ ಮಾನಿಟರ್ ಅನ್ನು ತಕ್ಷಣವೇ ಶಾಲೆಯಿಂದ ಉಚ್ಚಾಟಿಸಿ (Expelled) ಆದೇಶ ಹೊರಡಿಸಿದೆ. ಆದಾಗ್ಯೂ, ನರ್ಸರಿ ಮಕ್ಕಳನ್ನು ಮಾನಿಟರ್ಗಳ ಭರವಸೆಗೆ ಬಿಟ್ಟುಹೋಗುವ ಶಾಲೆಗಳ ಬೇಜವಾಬ್ದಾರಿತನದ ಕುರಿತು ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
