ಪುಣೆಯಲ್ಲಿ ನಡೆದ ಪ್ರೇಮ ವಿವಾಹವೊಂದು ಮದುವೆಯಾದ ಕೇವಲ 24 ಗಂಟೆಯೊಳಗೆ ವಿಚ್ಛೇದನದಲ್ಲಿ ಅಂತ್ಯವಾಗಿರುವುದು ಸದ್ಯ ದೇಶಾದ್ಯಂತ ಭಾರೀ ಚರ್ಚೆಗೆ ಕಾರಣವಾಗಿದೆ. ಸರಿ ಸುಮಾರು ಮೂರು ವರ್ಷಗಳ ಕಾಲ ಪ್ರೀತಿಸಿ, ಹಸೆಮಣೆ ಏರಿದ್ದ ಈ ಜೋಡಿ, ಸಂಸಾರ ಆರಂಭಿಸುವ ಮೊದಲೇ ಕಾನೂನುಬದ್ಧವಾಗಿ ಬೇರ್ಪಟ್ಟಿದ್ದಾರೆ.
ಮದುವೆಯ ಮರುದಿನವೇ ವಿಚ್ಛೇದನಕ್ಕೆ ಕಾರಣವೇನು?
ವರದಿಗಳ ಪ್ರಕಾರ, ಈ ಜೋಡಿ ದೀರ್ಘಕಾಲದವರೆಗೆ ಪರಸ್ಪರ ಪ್ರೀತಿಸುತ್ತಿದ್ದರು. ಆದರೆ ಮದುವೆಯಾದ ನಂತರ ವೃತ್ತಿಜೀವನ ಮತ್ತು ವಾಸಸ್ಥಳದ ವಿಚಾರದಲ್ಲಿ ಇಬ್ಬರ ನಡುವೆ ಭಿನ್ನಾಭಿಪ್ರಾಯ ಉಂಟಾಗಿದೆ. ಪತಿ ಮರ್ಚೆಂಟ್ ನೇವಿಯಲ್ಲಿ (ಹಡಗಿನಲ್ಲಿ) ಕೆಲಸ ಮಾಡುತ್ತಿದ್ದು, ತನಗೆ ವರ್ಷದ ಆರು ತಿಂಗಳು ಎಲ್ಲಿ ಪೋಸ್ಟಿಂಗ್ ಸಿಗುತ್ತದೆ ಅಥವಾ ಎಷ್ಟು ದಿನ ಮನೆಯಿಂದ ದೂರವಿರಬೇಕಾಗುತ್ತದೆ ಎಂಬ ಬಗ್ಗೆ ನಿಖರ ಮಾಹಿತಿ ಇರಲಿಲ್ಲ.
ಇದೇ ವಿಚಾರವಾಗಿ ಮದುವೆಯಾದ ಮಾರನೇ ದಿನವೇ ದಂಪತಿಗಳ ನಡುವೆ ಗಂಭೀರ ವಾಗ್ವಾದ ನಡೆದಿದೆ. ಪತ್ನಿ ವೃತ್ತಿಯಲ್ಲಿ ವೈದ್ಯೆಯಾಗಿದ್ದು, ಪತಿಯ ಅನಿಶ್ಚಿತ ಕೆಲಸದ ಅವಧಿ ಮತ್ತು ದೂರವಿರುವ ಪರಿಸ್ಥಿತಿಯನ್ನು ಒಪ್ಪಿಕೊಳ್ಳಲು ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಇಬ್ಬರೂ ಪರಸ್ಪರ ಒಪ್ಪಿಗೆಯೊಂದಿಗೆ ವಿಚ್ಛೇದನ ಪಡೆಯಲು ನಿರ್ಧರಿಸಿದರು.
ಸಾಮಾಜಿಕ ಜಾಲತಾಣದಲ್ಲಿ ಸಂಚಲನ
ಈ ಸುದ್ದಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಆಧುನಿಕ ವಿವಾಹಗಳ ಬಗ್ಗೆ ಚರ್ಚೆ ಆರಂಭಿಸಿದ್ದಾರೆ. ಮದುವೆಗೂ ಮುನ್ನ ಎರಡು ವರ್ಷಗಳ ಕಾಲ ಪ್ರೀತಿಸಿದ್ದರೂ ಇಂತಹ ಪ್ರಮುಖ ವಿಚಾರಗಳ ಬಗ್ಗೆ ದಂಪತಿಗಳು ಮೊದಲೇ ಚರ್ಚಿಸಿಲ್ಲವೇಕೆ? ಎಂದು ಹಲವರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಈ ಘಟನೆಯು ಸಂಬಂಧಗಳಲ್ಲಿ ಪರಸ್ಪರ ಪ್ರೀತಿಗಿಂತಲೂ ಹೊಂದಾಣಿಕೆ ಮತ್ತು ಮುಕ್ತ ಸಂವಹನ ಎಷ್ಟು ಮುಖ್ಯ ಎಂಬುದನ್ನು ನೆನಪಿಸಿದೆ.
ಕೆಲವರು ಈ ನಿರ್ಧಾರವನ್ನು ಸ್ವಾಗತಿಸಿದ್ದು, “ಒಂದೇ ಮನೆಯಲ್ಲಿ ಕಿತ್ತಾಡುತ್ತಾ ಬದುಕುವ ಬದಲು ಆರಂಭದಲ್ಲೇ ದೂರವಾಗುವುದು ಉತ್ತಮ” ಎಂದಿದ್ದಾರೆ. ಇನ್ನು ಕೆಲವರು ಮದುವೆ ಎನ್ನುವುದು ಇಂದಿನ ಕಾಲದಲ್ಲಿ ಕೇವಲ ಒಪ್ಪಂದದಂತಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಯಾವುದೇ ಹಿಂಸೆ ಅಥವಾ ಅಪರಾಧದ ಆರೋಪವಿಲ್ಲದೆ ಶಾಂತಿಯುತವಾಗಿ ಈ ವಿಚ್ಛೇದನ ಪ್ರಕ್ರಿಯೆ ಪೂರ್ಣಗೊಂಡಿರುವುದು ವಿಶೇಷ.
