ವಯಸ್ಸು ಹೆಚ್ಚಾದಂತೆ ದೇಹದಲ್ಲಿ ಬದಲಾವಣೆಗಳು ಉಂಟಾಗುವುದು ಸಹಜ. ಹಾಗಾದರೆ 40 ವರ್ಷ ದಾಟಿದ ನಂತರ ದೇಹದಲ್ಲಿ ಯಾವೆಲ್ಲ ಬದಲಾವಣೆಗಳು ಕಾಣಿಸಿಕೊಳ್ಳುತ್ತವೆ? ಯಾವ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು? ಯಾವ ಬದಲಾವಣೆಗಳನ್ನು ನಿರ್ಲಕ್ಷಿಸಬಾರದು? ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.
40 ವರ್ಷಕ್ಕೆ ಕಾಲಿಟ್ಟ ತಕ್ಷಣ, “ಅಯ್ಯೋ, ವಯಸ್ಸಾಗುತ್ತಿದೆ” ಎಂದು ಹಲವರು ಸುಮ್ಮನೆ ಹೇಳಿಬಿಡುತ್ತಾರೆ. ಆದರೆ ದೇಹದಲ್ಲಿ ಕಾಣಿಸಿಕೊಳ್ಳುವ ಪ್ರತಿಯೊಂದು ಸಣ್ಣ ಬದಲಾವಣೆಯ ಹಿಂದೆಯೂ ಒಂದು ಕಾರಣವಿರಬಹುದು. “ವಯಸ್ಸಾದ ಮೇಲೆ ಹೀಗೇ ಇರುತ್ತದೆ” ಎಂದು ನಿರ್ಲಕ್ಷಿಸದೆ, 40ರ ನಂತರ ದೇಹದಲ್ಲಿ ಆಗುವ ಬದಲಾವಣೆಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಅಗತ್ಯ.
1. ಹೊಟ್ಟೆಯ ಸುತ್ತ ಕೊಬ್ಬು ಹೆಚ್ಚಾಗುವುದು
ತೂಕ ಹೆಚ್ಚಾಗದಿದ್ದರೂ ಸೊಂಟದ ಸುತ್ತಳತೆ ಹೆಚ್ಚಾಗಬಹುದು. ಹಳೆಯ ಜೀನ್ಸ್ ಅಥವಾ ಪ್ಯಾಂಟ್ ಧರಿಸಿದಾಗ ಸೊಂಟದ ಬಳಿ ಬಿಗಿಯಾಗಿರುವುದು ಇದಕ್ಕೆ ಸೂಚನೆಯಾಗಿರಬಹುದು. 40ರ ನಂತರ ಹೊಟ್ಟೆಯ ಸುತ್ತ ಕೊಬ್ಬು ಸಂಗ್ರಹವಾಗುವ ಸಾಧ್ಯತೆ ಹೆಚ್ಚುತ್ತದೆ. ಇದು ಹೃದಯದ ಆರೋಗ್ಯಕ್ಕೂ ಒಳ್ಳೆಯದಲ್ಲ. ಆದ್ದರಿಂದ ಹೊಟ್ಟೆಯ ಸುತ್ತಲಿನ ಕೊಬ್ಬನ್ನು ನಿಯಂತ್ರಿಸುವುದು ಮುಖ್ಯ.
2. ದೈಹಿಕ ಸಾಮರ್ಥ್ಯ ಕಡಿಮೆಯಾಗುವುದು
ಶಾಪಿಂಗ್ ಬ್ಯಾಗ್‌ಗಳನ್ನು ಎತ್ತುವುದು ಅಥವಾ ಕೆಳಗೆ ಕುಳಿತುಕೊಂಡು ತಕ್ಷಣ ಎದ್ದು ನಿಲ್ಲುವುದು ಹಿಂದೆ ಸುಲಭವಾಗಿತ್ತು. ಆದರೆ ಈಗ ಕಷ್ಟವಾಗುತ್ತಿದೆಯೇ? ವಯಸ್ಸಾದಂತೆ ಸ್ನಾಯುಗಳ ಪ್ರಮಾಣ ಕಡಿಮೆಯಾಗುವುದರಿಂದ ಹೀಗಾಗಬಹುದು. ಆದ್ದರಿಂದ ಸ್ನಾಯುಗಳ ಬಲವನ್ನು ಹೆಚ್ಚಿಸುವ ವ್ಯಾಯಾಮಗಳನ್ನು ಮಾಡುವುದು ಉತ್ತಮ.
3. ಋತುಚಕ್ರದಲ್ಲಿ ಬದಲಾವಣೆ
40ರ ದಶಕದಲ್ಲಿ ಮಹಿಳೆಯರಲ್ಲಿ ಪೆರಿಮೆನೋಪಾಸ್ (ಮೆನೋಪಾಸ್‌ಗೂ ಮುನ್ನದ ಹಂತ) ಆರಂಭವಾಗಬಹುದು. ಈ ಸಮಯದಲ್ಲಿ ಋತುಚಕ್ರ ಸರಿಯಾಗಿ ನಡೆಯದಿರುವುದು, ಇದ್ದಕ್ಕಿದ್ದಂತೆ ಹೆಚ್ಚು ಬೆವರುವುದು, ಮೂಡ್‌ ಸ್ವಿಂಗ್‌ಗಳು ಉಂಟಾಗುವುದು ಮುಂತಾದ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು. ಇವು ಮೂಳೆಗಳು ಮತ್ತು ಹೃದಯದ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು.
4. ನಿದ್ರೆಯ ಸಮಸ್ಯೆಗಳು
ರಾತ್ರಿ ಮಲಗಿದ ತಕ್ಷಣ ಗಾಢ ನಿದ್ರೆಗೆ ಜಾರುತ್ತಿದ್ದ ದಿನಗಳು ಕಡಿಮೆಯಾಗಬಹುದು. ಪದೇಪದೇ ಎಚ್ಚರವಾಗುವುದು, ಗಾಢ ನಿದ್ರೆ ಬರದಿರುವುದು ಮತ್ತು ಬೆಳಗ್ಗೆ ಎದ್ದಾಗಲೂ ದಣಿದಂತೆ ಅನಿಸುವುದು ಸಾಮಾನ್ಯವಾಗಬಹುದು.
5. ನಿರಂತರ ದಣಿವು
ಹಿಂದೆ ವಾರಗಟ್ಟಲೆ ಕೆಲಸ ಮಾಡಿದರೂ ಆಗದಷ್ಟು ದಣಿವು ಈಗ ಸುಲಭವಾಗಿ ಉಂಟಾಗಬಹುದು. ಸಾಕಷ್ಟು ವಿಶ್ರಾಂತಿ ಪಡೆದರೂ ತಿಂಗಳುಗಳ ಕಾಲ ನೀರಸ ಅಥವಾ ದಣಿದ ಅನುಭವವಾಗುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬಾರದು.
6. ಬಿಪಿ, ಶುಗರ್ ಮತ್ತು ಕೊಲೆಸ್ಟ್ರಾಲ್
“ನನಗೆ ಯಾವುದೇ ಆರೋಗ್ಯ ಸಮಸ್ಯೆ ಇಲ್ಲ” ಎಂದು ಧೈರ್ಯವಾಗಿರಬಹುದು. ಆದರೆ ರಕ್ತದೊತ್ತಡ, ರಕ್ತದಲ್ಲಿನ ಸಕ್ಕರೆ ಮತ್ತು ಕೊಲೆಸ್ಟ್ರಾಲ್ ಯಾವುದೇ ಸ್ಪಷ್ಟ ಲಕ್ಷಣಗಳಿಲ್ಲದೆ ಹೆಚ್ಚಾಗಬಹುದು. ಆದ್ದರಿಂದ ನಿಯಮಿತ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುವುದು ಮುಖ್ಯ.
7. ಸಣ್ಣ ವಿಷಯಗಳನ್ನು ಮರೆಯುವುದು
ಹಿಂದೆ ಎಲ್ಲವನ್ನೂ ಸುಲಭವಾಗಿ ನೆನಪಿಟ್ಟುಕೊಳ್ಳುತ್ತಿದ್ದವರು ಈಗ ಸಣ್ಣಪುಟ್ಟ ವಿಷಯಗಳನ್ನೂ ಮರೆಯುತ್ತಿದ್ದೀರಾ? 40ರ ನಂತರ ಇಂತಹ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು. ಹಾರ್ಮೋನ್‌ಗಳಲ್ಲಿನ ಬದಲಾವಣೆ ಮತ್ತು ಸರಿಯಾಗಿ ನಿದ್ರೆ ಮಾಡದಿರುವುದು ನೆನಪಿನ ಮೇಲೆ ಪರಿಣಾಮ ಬೀರಬಹುದು. ಆದ್ದರಿಂದ ಯೋಗ, ಧ್ಯಾನದಂತಹ ಅಭ್ಯಾಸಗಳನ್ನು ರೂಢಿಸಿಕೊಳ್ಳುವುದು ಸಹಾಯಕವಾಗಬಹುದು.
8. ಕೀಲು ನೋವು ಬೇಗ ಕಡಿಮೆಯಾಗದಿರುವುದು
ಸಣ್ಣ ಬೆನ್ನುನೋವು ಅಥವಾ ಮೊಣಕಾಲಿನ ನೋವು ಉಂಟಾದರೆ ವಾರಗಳವರೆಗೆ ಮುಂದುವರಿಯಬಹುದು. ಸಂಧಿವಾತ ಅಥವಾ ತಪ್ಪಾದ ಕುಳಿತುಕೊಳ್ಳುವ ಭಂಗಿಯಿಂದ ನೋವು ದೀರ್ಘಕಾಲ ಮುಂದುವರಿಯುವ ಸಾಧ್ಯತೆಯಿದೆ. ವಯಸ್ಸಾದಂತೆ ಮೂಳೆಗಳ ಬಲವೂ ಕಡಿಮೆಯಾಗಬಹುದು.
ಆದರೆ ದೇಹದಲ್ಲಿ ಕಾಣಿಸಿಕೊಳ್ಳುವ ಈ ಬದಲಾವಣೆಗಳನ್ನು ಕಂಡು ಭಯಪಡುವ ಅಗತ್ಯವಿಲ್ಲ. ಅವುಗಳನ್ನು ಕೇವಲ “ವಯಸ್ಸಿನ ಪರಿಣಾಮ” ಎಂದು ನಿರ್ಲಕ್ಷಿಸದೆ, ಆರೋಗ್ಯಕರ ಆಹಾರ, ನಿಯಮಿತ ವ್ಯಾಯಾಮ ಮತ್ತು ಅಗತ್ಯವಿದ್ದಲ್ಲಿ ವೈದ್ಯರ ಸಲಹೆಯೊಂದಿಗೆ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವುದು ಬಹಳ ಮುಖ್ಯ.
