ಬಾಲಿವುಡ್ ಪ್ರೇಕ್ಷಕರಲ್ಲಿ ಸದ್ಯ ಭಾರಿ ಕುತೂಹಲ ಮೂಡಿಸಿರುವ ಕಾಕ್ಟೈಲ್ 2 ಸಿನಿಮಾ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವಿಭಿನ್ನ ರೀತಿಯ ಚರ್ಚೆಗಳು ನಡೆಯುತ್ತಿದ್ದವು. ಈ ಚಿತ್ರದಲ್ಲಿ ನಾಯಕಿಯರಾದ ಕೃತಿ ಸನೂನ್ ಮತ್ತು ರಶ್ಮಿಕಾ ಮಂದಣ್ಣ ಸಲಿಂಗಕಾಮಿಗಳಾಗಿ ಅಂದರೆ ಲೆಸ್ಬಿಯನ್ ಜೋಡಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ವದಂತಿಗಳು ಹರಿದಾಡುತ್ತಿದ್ದವು. ಇದೀಗ ಚಿತ್ರತಂಡ ಈ ಎಲ್ಲಾ ಸುಳ್ಳು ಸುದ್ದಿಗಳಿಗೆ ಬ್ರೇಕ್ ಹಾಕಿದ್ದು, ಸಿನಿಮಾದ ಅಸಲಿ ಕಥಾವಸ್ತು ಏನೆಂಬುದನ್ನು ಮಾಧ್ಯಮಗಳ ಮುಂದೆ ಸ್ಪಷ್ಟಪಡಿಸಿದೆ.
ವದಂತಿಗಳನ್ನು ನಿರಾಕರಿಸಿದ ಚಿತ್ರತಂಡ ಮುಂಬೈನಲ್ಲಿ ನಡೆದ ಭವ್ಯ ಟ್ರೈಲರ್ ಬಿಡುಗಡೆ ಸಮಾರಂಭದಲ್ಲಿ ಚಿತ್ರದ ನಾಯಕ ನಟ ಶಾಹಿದ್ ಕಪೂರ್, ಕೃತಿ ಸನೂನ್, ರಶ್ಮಿಕಾ ಮಂದಣ್ಣ ಹಾಗೂ ನಿರ್ದೇಶಕ ಹೋಮಿ ಅದಾಜಾನಿಯಾ ಮತ್ತು ನಿರ್ಮಾಪಕ ದಿನೇಶ್ ವಿಜನ್ ಒಟ್ಟಾಗಿ ಭಾಗವಹಿಸಿದ್ದರು. ಈ ವೇಳೆ ಮಾಧ್ಯಮಗಳು ಚಿತ್ರದ ಕಥೆಯ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ನಿರ್ಮಾಪಕ ದಿನೇಶ್ ವಿಜನ್, ಇದು ಯಾವುದೇ ರೀತಿಯ ಸಲಿಂಗಕಾಮಿ ಪ್ರೇಮಕಥೆಯಲ್ಲ ಎಂದು ಸ್ಪಷ್ಟವಾಗಿ ನಿರಾಕರಿಸಿದ್ದಾರೆ.
ಶಾಹಿದ್ ಕಪೂರ್ ಕಡೆಗೆ ಬೆರಳು ತೋರಿದ ನಾಯಕಿಯರು ಟ್ರೈಲರ್ ಲಾಂಚ್ ಕಾರ್ಯಕ್ರಮದಲ್ಲಿ ರಶ್ಮಿಕಾ ಮತ್ತು ಕೃತಿ ನಡುವಿನ ಪ್ರೇಮಕಥೆಯ ವದಂತಿ ಎಲ್ಲಿಂದ ಶುರುವಾಯಿತು ಎಂಬ ಪ್ರಶ್ನೆ ಎದುರಾಯಿತು. ಇದಕ್ಕೆ ತಮಾಷೆಯಾಗಿ ಉತ್ತರಿಸಿದ ಕೃತಿ ಸನೂನ್, ಈ ವದಂತಿಗಳು ಕೇವಲ ಒಂದು ಜಾಗದಿಂದಲೇ ಹರಡುತ್ತಿವೆ ಎಂದು ಹೇಳುತ್ತಾ ನಟ ಶಾಹಿದ್ ಕಪೂರ್ ಅವರ ಕಡೆಗೆ ನೋಡಿದರು. ಇದಕ್ಕೆ ರಶ್ಮಿಕಾ ಮಂದಣ್ಣ ಕೂಡ ಧ್ವನಿಗೂಡಿಸಿದರು. ತಕ್ಷಣವೇ ಮಧ್ಯಪ್ರವೇಶಿಸಿದ ಶಾಹಿದ್ ಕಪೂರ್, ನಾನಂತೂ ಏನೂ ಹೇಳಿಲ್ಲ, ಈ ವದಂತಿಗಳು ಎಲ್ಲಿಂದ ಬರುತ್ತಿವೆಯೋ ನನಗಂತೂ ತಿಳಿಯುತ್ತಿಲ್ಲ ಎಂದು ನಗುತ್ತಲೇ ಜಾರಿಕೊಂಡರು.
ಚಿತ್ರೀಕರಣದ ಸೆಟ್ನಲ್ಲಿ ನಡೆದಿದ್ದೇನು? ಈ ವದಂತಿ ಹೇಗೆ ಹರಡಿತು ಎಂಬುದರ ರಹಸ್ಯವನ್ನು ನಿರ್ದೇಶಕ ಹೋಮಿ ಅದಾಜಾನಿಯಾ ಬಿಚ್ಚಿಟ್ಟಿದ್ದಾರೆ. ಚಿತ್ರೀಕರಣದ ಸಮಯದಲ್ಲಿ ಕೃತಿ ಮತ್ತು ರಶ್ಮಿಕಾ ಒಳ್ಳೆಯ ಸ್ನೇಹಿತರಾಗಿದ್ದರಿಂದ ಸೆಟ್ನಲ್ಲಿ ತುಂಬಾ ಆತ್ಮೀಯವಾಗಿ ಇರುತ್ತಿದ್ದರು. ಇದನ್ನು ನೋಡಿ ನಾವೇ ಸುಮ್ಮನೆ ತಮಾಷೆಗೆ, ಒಂದು ವೇಳೆ ಇವರಿಬ್ಬರ ನಡುವೆ ಪ್ರೇಮಕಥೆ ಇದ್ದು ಶಾಹಿದ್ ಕಪೂರ್ ಮೂರನೇ ವ್ಯಕ್ತಿಯಾದರೆ ಹೇಗೆ ಇರುತ್ತದೆ ಎಂದು ಚರ್ಚಿಸುತ್ತಿದ್ದೆವು. ಹಾಗೇನಾದರೂ ಇದ್ದರೆ ಅಂತಹ ಸಿನಿಮಾ ಮಾಡಲು ನನಗೇನು ಅಭ್ಯಂತರವಿಲ್ಲ ಎಂದು ನಾನು ಹೇಳಿದ್ದೆ. ಅದೇ ಮಾತು ಹೊರಗೆ ಹೋಗಿ ದೊಡ್ಡ ವದಂತಿಯಾಗಿ ಮಾರ್ಪಟ್ಟಿದೆ ಎಂದು ಅವರು ವಿವರಿಸಿದ್ದಾರೆ.
ಮನರಂಜನೆಯ ತ್ರಿಕೋನ ಪ್ರೇಮಕಥೆ ಬಿಡುಗಡೆಯಾಗಿರುವ ಟ್ರೈಲರ್ ಪ್ರಕಾರ, ಇದು ಸಂಪೂರ್ಣವಾಗಿ ಪ್ರೀತಿ ಮತ್ತು ಸ್ನೇಹದ ನಡುವೆ ನಡೆಯುವ ತ್ರಿಕೋನ ಪ್ರೇಮಕಥೆಯಾಗಿದೆ. ಸಿನಿಮಾದಲ್ಲಿ ಶಾಹಿದ್ ಕಪೂರ್ ಮತ್ತು ರಶ್ಮಿಕಾ ಮಂದಣ್ಣ ನಡುವೆ ಪ್ರಣಯವಿದ್ದರೆ, ಕೃತಿ ಸನೂನ್ ಶಾಹಿದ್ ಅವರ ಆಪ್ತ ಗೆಳತಿಯಾಗಿ ಕಾಣಿಸಿಕೊಂಡಿದ್ದಾರೆ. ಆದರೆ ದಿನಕಳೆದಂತೆ ಕೃತಿಗೆ ಶಾಹಿದ್ ಮೇಲೆ ಪ್ರೀತಿ ಚಿಗುರೊಡೆಯುತ್ತದೆ. ಅಲ್ಲಿಂದ ಮೂವರ ಜೀವನದಲ್ಲಿ ಎದುರಾಗುವ ಗೊಂದಲಗಳು ಮತ್ತು ತಿರುವುಗಳೇ ಈ ಚಿತ್ರದ ಪ್ರಮುಖ ಆಕರ್ಷಣೆಯಾಗಿದೆ.
೨೦೧೨ರಲ್ಲಿ ಬಿಡುಗಡೆಯಾಗಿ ಸೂಪರ್ ಹಿಟ್ ಆಗಿದ್ದ ಸೈಫ್ ಅಲಿ ಖಾನ್ ಮತ್ತು ದೀಪಿಕಾ ಪಡುಕೋಣೆ ನಟನೆಯ ಕಾಕ್ಟೈಲ್ ಚಿತ್ರದ ಸರಣಿ ಇದಾಗಿದ್ದರೂ, ಇದು ನೇರ ಮುಂದುವರಿದ ಭಾಗವಲ್ಲ ಎಂದು ಕೃತಿ ಸನೂನ್ ಸ್ಪಷ್ಟಪಡಿಸಿದ್ದಾರೆ. ಹೊಸ ಕಥೆ ಮತ್ತು ಹೊಸ ಪಾತ್ರಗಳೊಂದಿಗೆ ಮೂಡಿಬರುತ್ತಿರುವ ಈ ರೊಮ್ಯಾಂಟಿಕ್ ಕಾಮಿಡಿ ಸಿನಿಮಾ ಜೂನ್ 19 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
