ಇರಾನ್-ಇಸ್ರೇಲ್ ಯುದ್ಧದ ಪರಿಣಾಮವಾಗಿ ಅಡುಗೆ ಅನಿಲದ (LPG) ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿದ್ದು, ಸಿಲಿಕಾನ್ ಸಿಟಿಯ ಜನತೆ ಈಗ ಇಂಡಕ್ಷನ್ ಸ್ಟೌವ್‌ಗಳ ಮೊರೆ ಹೋಗುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ಇಂಡಕ್ಷನ್ ಸ್ಟೌವ್‌ಗಳಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿರುವ ಈ ಸಂದರ್ಭದಲ್ಲಿ ವಿದ್ಯುತ್ ಅವಘಡಗಳನ್ನು ತಪ್ಪಿಸಲು ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ (BESCOM) ಸಾರ್ವಜನಿಕರಿಗೆ ಮಹತ್ವದ ಸುರಕ್ಷತಾ ಸಲಹೆಗಳನ್ನು ನೀಡಿದೆ.ನಿಮ್ಮ ಮನೆಯ ಸುರಕ್ಷತೆಗಾಗಿ ಹೊಸ ಸ್ಟೌವ್ ಖರೀದಿಸುವ ಮುನ್ನ ಈ ಅಂಶಗಳನ್ನು ಗಮನಿಸಿ:
ಬೆಸ್ಕಾಂ ಸೂಚಿಸಿರುವ ಪ್ರಮುಖ ಸುರಕ್ಷತಾ ಕ್ರಮಗಳು:
ಗುಣಮಟ್ಟಕ್ಕೆ ಆದ್ಯತೆ: ಕೇವಲ ಬೆಲೆ ಕಡಿಮೆ ಇದೆ ಎಂದು ಯಾವುದೋ ಕಂಪನಿಯ ಸ್ಟೌವ್ ಖರೀದಿಸಬೇಡಿ. ಯಾವಾಗಲೂ ಐಎಸ್‌ಐ (ISI) ಪ್ರಮಾಣಿತ ಮತ್ತು ಕನಿಷ್ಠ 3 ಸ್ಟಾರ್ ಅಥವಾ ಅದಕ್ಕಿಂತ ಹೆಚ್ಚಿನ ವಿದ್ಯುತ್ ದಕ್ಷತೆಯುಳ್ಳ (Energy Efficient) ಇಂಡಕ್ಷನ್ ಸ್ಟೌವ್‌ಗಳನ್ನೇ ಆರಿಸಿ.
ಪ್ಲಗ್ ಮತ್ತು ಸಾಕೆಟ್: ಇಂಡಕ್ಷನ್ ಸ್ಟೌವ್ ಬಳಸಲು ಪ್ರತ್ಯೇಕವಾದ 15A (ಆಂಪಿಯರ್) ಅಥವಾ ಹೆಚ್ಚಿನ ಲೋಡ್ ಸಾಮರ್ಥ್ಯದ ಸಾಕೆಟ್ ಅಳವಡಿಸಿ. ಸದಾ 3-ಪಿನ್ ಪ್ಲಗ್ ಇರುವ ಸ್ಟೌವ್‌ಗಳನ್ನೇ ಬಳಸುವುದು ಸುರಕ್ಷಿತ.
ವೈರಿಂಗ್ ಪರೀಕ್ಷಿಸಿ: ನಿಮ್ಮ ಮನೆಯ ವೈರಿಂಗ್ ಹಳೆಯದಾಗಿದ್ದರೆ ಅಥವಾ ಸಮರ್ಪಕವಾದ ಅರ್ಥಿಂಗ್ (Earthing) ವ್ಯವಸ್ಥೆ ಇಲ್ಲದಿದ್ದರೆ ಇಂಡಕ್ಷನ್ ಸ್ಟೌವ್ ಬಳಸಬೇಡಿ. ಇದು ಶಾರ್ಟ್ ಸರ್ಕ್ಯೂಟ್‌ಗೆ ಕಾರಣವಾಗಬಹುದು.
ಸ್ಮಾರ್ಟ್ ಫೀಚರ್ಸ್: ಆಕಸ್ಮಿಕ ಅವಘಡ ತಡೆಯಲು ಆಟೋಮ್ಯಾಟಿಕ್ ಆಫ್ (Automatic Off) ಮತ್ತು ಮಕ್ಕಳ ಸುರಕ್ಷತೆಗಾಗಿ ಚೈಲ್ಡ್ ಲಾಕ್ (Child Lock) ಸೌಲಭ್ಯವಿರುವ ಮಾದರಿಗಳನ್ನೇ ಖರೀದಿಸಿ.
ತುರ್ತು ಸಹಾಯ: ಒಂದು ವೇಳೆ ವಿದ್ಯುತ್‌ಗೆ ಸಂಬಂಧಿಸಿದ ಯಾವುದೇ ಅವಘಡ ಸಂಭವಿಸಿದಲ್ಲಿ ತಕ್ಷಣ ಬೆಸ್ಕಾಂನ 24×7 ಸಹಾಯವಾಣಿ 1912 ಕ್ಕೆ ಕರೆ ಮಾಡಿ.
