ಭಾರತದಲ್ಲಿ ಮಹಿಳೆಯರಲ್ಲಿ ಕಂಡುಬರುವ ಕ್ಯಾನ್ಸರ್ಗಳಲ್ಲಿ ಎರಡನೇ ಅತಿ ದೊಡ್ಡ ಮಾರಕ ರೋಗವಾದ ಗರ್ಭಕಂಠದ ಕ್ಯಾನ್ಸರ್ ಅನ್ನು ತಡೆಗಟ್ಟಲು ಸರ್ಕಾರವು ದೇಶಾದ್ಯಂತ 9 ರಿಂದ 14 ವರ್ಷದ ಹೆಣ್ಣುಮಕ್ಕಳಿಗೆ ಉಚಿತ ಮತ್ತು ಸ್ವಯಂಪ್ರೇರಿತ HPV ಲಸಿಕೆ ಅಭಿಯಾನವನ್ನು ಪ್ರಾರಂಭಿಸುತ್ತಿದೆ.
ಹೌದು. ಭಾರತದಲ್ಲಿ ಮಹಿಳೆಯರ ಸಾವಿಗೆ ಪ್ರಮುಖ ಕಾರಣವಾಗಿರುವ ಈ ಮಾರಕ ಕ್ಯಾನ್ಸರ್ ಅನ್ನು ತಡೆಗಟ್ಟಲು ಕೇಂದ್ರ ಸರ್ಕಾರವು ‘ಗಾರ್ಡಾಸಿಲ್’ (Gardasil) ಲಸಿಕೆಯನ್ನು ಬಳಸುತ್ತಿದೆ. ಮಾರುಕಟ್ಟೆಯಲ್ಲಿ ಸುಮಾರು ₹4,000 ದಿಂದ ₹10,000 ವರೆಗೆ ಬೆಲೆಬಾಳುವ ಈ ದುಬಾರಿ ಲಸಿಕೆಯನ್ನು ಸರ್ಕಾರವು ಉಚಿತವಾಗಿ ನೀಡುತ್ತಿರುವುದು ವಿಶೇಷವಾಗಿ ಆರ್ಥಿಕವಾಗಿ ಹಿಂದುಳಿದ ಮತ್ತು ಗ್ರಾಮೀಣ ಭಾಗದ ಮಹಿಳೆಯರಿಗೆ ದೊಡ್ಡ ವರದಾನವಾಗಲಿದೆ. ಲಸಿಕೆಯ ಕೊರತೆ ಮತ್ತು ಹಣದ ಸಮಸ್ಯೆಯಿಂದಾಗಿ ಚಿಕಿತ್ಸೆಯಿಂದ ವಂಚಿತರಾಗುತ್ತಿದ್ದ ಬಡ ಕುಟುಂಬಗಳಿಗೆ ಈ ಯೋಜನೆ ಆರೋಗ್ಯ ಸುರಕ್ಷತೆಯನ್ನು ಖಚಿತಪಡಿಸಲಿದೆ.
‘ಗಾರ್ಡಾಸಿಲ್’ (Gardasil) ಎಂಬ ಏಕ-ಡೋಸ್ (Single-shot) ಲಸಿಕೆಯನ್ನು ನೀಡುವ ಮೂಲಕ ವೈರಸ್ ಸೋಂಕು ತಗುಲುವ ಮೊದಲೇ ಹೆಣ್ಣುಮಕ್ಕಳಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವುದು ಈ ಅಭಿಯಾನದ ಉದ್ದೇಶವಾಗಿದೆ
- ರಾಷ್ಟ್ರೀಯ ಕಾರ್ಯಕ್ರಮ: ವಿಶ್ವ ಆರೋಗ್ಯ ಸಂಸ್ಥೆಯ (WHO) ಶಿಫಾರಸಿನಂತೆ ಭಾರತವು ಈ ಅಭಿಯಾನವನ್ನು ಹಮ್ಮಿಕೊಂಡಿದೆ. ಐಸಿಎಂಆರ್ (ICMR) ಪ್ರಕಾರ, ಭಾರತದ ಮಹಿಳೆಯರಲ್ಲಿ ಕಂಡುಬರುವ ಕ್ಯಾನ್ಸರ್ ಪ್ರಕರಣಗಳಲ್ಲಿ ಶೇ. 22.86 ರಷ್ಟು ಗರ್ಭಕಂಠದ ಕ್ಯಾನ್ಸರ್ ಆಗಿದೆ.
- ಉಚಿತ ಮತ್ತು ಸ್ವಯಂಪ್ರೇರಿತ: ಈ ಅಭಿಯಾನವು ರಾಷ್ಟ್ರೀಯ ರೋಗನಿರೋಧಕ ಕಾರ್ಯಕ್ರಮದ ಅಡಿಯಲ್ಲಿದ್ದರೂ, ಲಸಿಕೆ ಪಡೆಯುವುದು ಸ್ವಯಂಪ್ರೇರಿತವಾಗಿದೆ. ಸಾಮಾಜಿಕ-ಆರ್ಥಿಕ ಅಂತರವಿಲ್ಲದೆ ಎಲ್ಲರಿಗೂ ಸಮಾನವಾಗಿ ಈ ಲಸಿಕೆ ಸಿಗುವಂತೆ ಮಾಡಲು ಇದನ್ನು ಉಚಿತವಾಗಿ ನೀಡಲಾಗುತ್ತಿದೆ.
- ಲಸಿಕೆಯ ಕಾರ್ಯಕ್ಷಮತೆ: ಅಭಿಯಾನದಲ್ಲಿ ‘ಗಾರ್ಡಾಸಿಲ್’ ಎಂಬ ಚತುರ್ಮುಖಿ (Quadrivalent) ಲಸಿಕೆಯನ್ನು ಬಳಸಲಾಗುವುದು. ಇದು ಕ್ಯಾನ್ಸರ್ ಕಾರಕ HPV 16, 18 ವಿಧಗಳ ವಿರುದ್ಧ ಮಾತ್ರವಲ್ಲದೆ, HPV 6 ಮತ್ತು 11 ವಿಧಗಳ ವಿರುದ್ಧವೂ ರಕ್ಷಣೆ ನೀಡುತ್ತದೆ. ಈ ಲಸಿಕೆಯು ಕ್ಯಾನ್ಸರ್ ತಡೆಗಟ್ಟುವಲ್ಲಿ ಶೇ. 93 ರಿಂದ ಶೇ. 100 ರಷ್ಟು ಪರಿಣಾಮಕಾರಿಯಾಗಿದೆ.
ಪ್ರಸ್ತುತ ಮಾರುಕಟ್ಟೆಯಲ್ಲಿ ಲಸಿಕೆಯ ಬೆಲೆ ಎಷ್ಟು?
ಖಾಸಗಿ ಮಾರುಕಟ್ಟೆಯಲ್ಲಿ ಈ ಲಸಿಕೆಯ ಬೆಲೆ ಸಾಮಾನ್ಯ ಜನರಿಗೆ ತಲುಪದಷ್ಟು ದುಬಾರಿಯಾಗಿದೆ:
- ಗಾರ್ಡಾಸಿಲ್ ಲಸಿಕೆ: ಫೆಬ್ರವರಿ 24ರ ಅಂಕಿಅಂಶಗಳ ಪ್ರಕಾರ, ಒಂದು ಡೋಸ್ನ ಬೆಲೆ ಸುಮಾರು ₹3,543. 15 ವರ್ಷ ಮೇಲ್ಪಟ್ಟವರಿಗೆ ಮೂರು ಡೋಸ್ಗಳ ಅಗತ್ಯವಿದ್ದು, ಇದಕ್ಕೆ ಒಟ್ಟು ₹10,500 ಕ್ಕಿಂತ ಹೆಚ್ಚು ವೆಚ್ಚವಾಗುತ್ತದೆ.
- ಗಾರ್ಡಾಸಿಲ್ 9 ಇಂಜೆಕ್ಷನ್: ಇದು ಒಂದು ಡೋಸ್ಗೆ ಸುಮಾರು ₹9,547 ಆಗುತ್ತದೆ. ಪೂರ್ಣ ಕೋರ್ಸ್ಗೆ ಅಂದಾಜು ₹28,000 ಕ್ಕಿಂತ ಹೆಚ್ಚು ಹಣ ಬೇಕಾಗುತ್ತದೆ.
ಬಡ ಮಹಿಳೆಯರಿಗೆ ಈ ಲಸಿಕೆಯಿಂದಾಗುವ ಲಾಭಗಳು:
- ಗ್ರಾಮೀಣ ಮತ್ತು ಬಡ ಮಹಿಳೆಯರಿಗೆ ರಕ್ಷಣೆ: ಐಸಿಎಂಆರ್ ಪ್ರಕಾರ, ನಗರ ಪ್ರದೇಶದ ಮಹಿಳೆಯರಿಗಿಂತ ಗ್ರಾಮೀಣ ಭಾಗದ ಮಹಿಳೆಯರಲ್ಲಿ ಈ ಕ್ಯಾನ್ಸರ್ ಅಪಾಯ ಹೆಚ್ಚಿದೆ. ಆರ್ಥಿಕ ಅಡಚಣೆಯಿಂದಾಗಿ ಇವರಿಗೆ ದುಬಾರಿ ಲಸಿಕೆ ಪಡೆಯಲು ಸಾಧ್ಯವಿರಲಿಲ್ಲ.
- ಆರ್ಥಿಕ ಹೊರೆ ನಿವಾರಣೆ: ಸಾವಿರಾರು ರೂಪಾಯಿ ಬೆಲೆಯ ಲಸಿಕೆಯನ್ನು ಸರ್ಕಾರ ಉಚಿತವಾಗಿ ನೀಡುತ್ತಿರುವುದರಿಂದ ಬಡ ಕುಟುಂಬಗಳ ಮೇಲಿನ ಆರ್ಥಿಕ ಹೊರೆ ಇಳಿಕೆಯಾಗಲಿದೆ.
- ಸಾಮಾಜಿಕ ಅಡೆತಡೆಗಳ ನಿವಾರಣೆ: ಭಾರತದ ಆರ್ಥಿಕವಾಗಿ ಹಿಂದುಳಿದ ವರ್ಗಗಳಲ್ಲಿ ಕ್ಯಾನ್ಸರ್ ಬಗ್ಗೆ ಅರಿವು ಕಡಿಮೆ ಇದೆ. ಸ್ತ್ರೀ ರೋಗಗಳ ಬಗ್ಗೆ ಇರುವ ಮುಜುಗರ, ತಪಾಸಣೆಯ ಬಗ್ಗೆ ಇರುವ ಭಯ ಮತ್ತು ಕುಟುಂಬದ ಬೆಂಬಲದ ಕೊರತೆಯಿಂದಾಗಿ ಅನೇಕ ಮಹಿಳೆಯರು ಚಿಕಿತ್ಸೆಯಿಂದ ವಂಚಿತರಾಗುತ್ತಿದ್ದರು. ಈ ಲಸಿಕೆ ಅಭಿಯಾನವು ಅಂತಹ ಮಹಿಳೆಯರಲ್ಲಿ ಭೀತಿಯನ್ನು ಹೋಗಲಾಡಿಸಲು ಸಹಾಯ ಮಾಡುತ್ತದೆ.
