ಬೆಂಗಳೂರು: ರೈಲು ಪ್ರಯಾಣದ ಸಮಯದಲ್ಲಿ ಸಿಗುವ ಆಹಾರದ ಗುಣಮಟ್ಟದ ಬಗ್ಗೆ ನಿಮಗೆ ಆತಂಕವಿದೆಯೇ? ಹಾಗಾದರೆ ನಿಮಗೊಂದು ಗುಡ್ ನ್ಯೂಸ್. ಭಾರತೀಯ ರೈಲ್ವೆ ಮತ್ತು IRCTC ಪ್ರಯಾಣಿಕರ ಆರೋಗ್ಯ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ಕ್ರಾಂತಿಕಾರಿ ಬದಲಾವಣೆಯೊಂದನ್ನು ಜಾರಿಗೆ ತಂದಿದೆ. ರೈಲಿನಲ್ಲಿ ನೀಡಲಾಗುವ ಆಹಾರದ ಪ್ಯಾಕೆಟ್‌ಗಳ ಮೇಲೆ ಈಗ QR ಕೋಡ್ ಅಳವಡಿಸಲಾಗುತ್ತಿದೆ
ಏನಿದು QR ಕೋಡ್ ಮ್ಯಾಜಿಕ್?
ಇನ್ಮುಂದೆ ನೀವು ರೈಲಿನಲ್ಲಿ ಆರ್ಡರ್ ಮಾಡುವ ಪ್ರತಿ ಆಹಾರದ ಪ್ಯಾಕೆಟ್ ಮೇಲೂ ಒಂದು QR ಕೋಡ್ ಇರಲಿದೆ. ಪ್ರಯಾಣಿಕರು ತಮ್ಮ ಸ್ಮಾರ್ಟ್‌ಫೋನ್ ಮೂಲಕ ಇದನ್ನು ಸ್ಕ್ಯಾನ್ ಮಾಡಿದರೆ ಸಾಕು, ಈ ಕೆಳಗಿನ ಸಂಪೂರ್ಣ ಮಾಹಿತಿ ಲಭ್ಯವಾಗಲಿದೆ:
ಕಿಚನ್ ಡಿಟೇಲ್ಸ್: ಆಹಾರವನ್ನು ಯಾವ ಬೇಸ್ ಕಿಚನ್‌ನಲ್ಲಿ ತಯಾರಿಸಲಾಗಿದೆ?
ಟೈಮ್ ಚೆಕ್: ಆಹಾರ ಪ್ಯಾಕ್ ಮಾಡಿದ ನಿಖರ ಸಮಯ ಮತ್ತು ಅದು ಕೆಡದಂತೆ ಇರುವ ಅವಧಿ (Expiry Date).
ಲೈವ್ ಸ್ಟ್ರೀಮಿಂಗ್: ಅಚ್ಚರಿಯ ವಿಷಯವೆಂದರೆ, ಈ ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ಅಡುಗೆ ಮನೆಯಲ್ಲಿ ಆಹಾರ ತಯಾರಾಗುತ್ತಿರುವ ನೇರ ದೃಶ್ಯಗಳನ್ನುನೋಡಿ ಶುಚಿತ್ವವನ್ನು ಖಚಿತಪಡಿಸಿಕೊಳ್ಳಬಹುದು
ನಕಲಿ ಮಾರಾಟಗಾರರಿಗೆ ಬೀಳಲಿದೆ ಬ್ರೇಕ್
ರೈಲಿನಲ್ಲಿ ಅನಧಿಕೃತ ವ್ಯಕ್ತಿಗಳು ಆಹಾರ ಮಾರಾಟ ಮಾಡುವುದನ್ನು ತಡೆಯಲು ಈಗ ಕೆಟರಿಂಗ್ ಸಿಬ್ಬಂದಿಗೆ ‘ಡಿಜಿಟಲ್ ಐಡಿ’ (Digital ID) ಕಡ್ಡಾಯಗೊಳಿಸಲಾಗಿದೆ. ಇದರಿಂದ ಸಿಬ್ಬಂದಿಯ ಪೂರ್ವಾಪರಗಳನ್ನು ಪರಿಶೀಲಿಸುವುದು ಸುಲಭವಾಗಲಿದ್ದು, ಪ್ರಯಾಣಿಕರಿಗೆ ಅಧಿಕೃತ ಸಿಬ್ಬಂದಿಯಿಂದಲೇ ಆಹಾರ ಸಿಗುವುದು ಖಚಿತವಾಗಲಿದೆ.
ದೂರು ನೀಡಲು ಸಾಕು ಒಂದು ಕ್ಲಿಕ್
ಆಹಾರದ ರುಚಿ ಅಥವಾ ಗುಣಮಟ್ಟದಲ್ಲಿ ಏನಾದರೂ ವ್ಯತ್ಯಯ ಕಂಡುಬಂದಲ್ಲಿ, ಪ್ರಯಾಣಿಕರು ಅಲೆದಾಡುವ ಅಗತ್ಯವಿಲ್ಲ. ಅದೇ QR ಕೋಡ್ ಬಳಸಿ ತಕ್ಷಣವೇ ಫೋಟೋ ಸಹಿತ ದೂರನ್ನು ಸಂಬಂಧಪಟ್ಟ ಅಧಿಕಾರಿಗಳಿಗೆ ಡಿಜಿಟಲ್ ರೂಪದಲ್ಲಿ ಸಲ್ಲಿಸಬಹುದು. ಇದರಿಂದ ಗುತ್ತಿಗೆದಾರರು ಕಡ್ಡಾಯವಾಗಿ ಗುಣಮಟ್ಟ ಕಾಯ್ದುಕೊಳ್ಳಲೇಬೇಕಾದ ಅನಿವಾರ್ಯತೆ ಎದುರಾಗಿದೆ.
