ಬೇಸಿಗೆ ಬಂತೆಂದರೆ ಗಂಟಲು ನೋವು, ಜ್ವರ, ವಾಂತಿ-ಬೇಧಿ ಇಂತಹ ಕಾಯಿಲೆಗಳು ಹೆಚ್ಚಾಗುತ್ತವೆ. ಕೆಲವೊಮ್ಮೆ ಜ್ವರ ದೀರ್ಘಕಾಲದವರೆಗೆ ಇರುತ್ತದೆ. ಇದು ಸಾಮಾನ್ಯ ಜ್ವರವಿರಬಹುದು ಅಥವಾ ವೈರಲ್ ಕೂಡ ಆಗಿರಬಹುದು. ಆದರೆ ಜ್ವರ ಪ್ರಾರಂಭವಾಗಿ 2-3 ದಿನಗಳಾದರೂ ಕಡಿಮೆಯಾಗದೇ ಇದ್ದರೆ, ಇತರ ಕೆಲವು ರೋಗಲಕ್ಷಣಗಳು ಸಹ ಗೋಚರಿಸಿದರೆ ತಕ್ಷಣವೇ ಎಚ್ಚೆತ್ತುಕೊಳ್ಳಬೇಕು. ಇದು ಗಂಭೀರ ಕಾಯಿಲೆ ಮಲೇರಿಯಾದ ಲಕ್ಷಣವೂ ಆಗಿರಬಹುದು. ಮಲೇರಿಯಾ ಎಂಬುದು ಹೆಣ್ಣು ಅನೋಲ್ಸ್ ಸೊಳ್ಳೆಯ ಕಚ್ಚುವಿಕೆಯಿಂದ ಉಂಟಾಗುವ ಸೋಂಕು.
ಪ್ರಪಂಚದಾದ್ಯಂತದ ಅನೇಕ ದೇಶಗಳ ಜನರು ಮಲೇರಿಯಾ ಕಾಯಿಲೆಯಿಂದ ತೊಂದರೆಗೀಡಾಗಿದ್ದಾರೆ. ಭಾರತವೂ ಈ ದೇಶಗಳಲ್ಲೊಂದು. ಮಲೇರಿಯಾದ ಲಕ್ಷಣಗಳೆಂದರೆ ಜ್ವರ, ಶೀತ, ಬೆವರು, ತಲೆನೋವು, ಆಯಾಸ ಮತ್ತು ಸ್ನಾಯು ನೋವು. ಜ್ವರದ ಜೊತೆಗೆ ಈ ಕೆಳಗಿನ ಲಕ್ಷಣಗಳು ಕಾಣಿಸಿಕೊಂಡರೆ ತಕ್ಷಣ ಮಲೇರಿಯಾ ಪರೀಕ್ಷೆಗೆ ಒಳಗಾಗಬೇಕು.
ಚಳಿ ಅಥವಾ ಶೀತದ ಭಾವನೆ
ಶೀತವು ಮಲೇರಿಯಾ ಜ್ವರದ ಸಾಮಾನ್ಯ ಲಕ್ಷಣವಾಗಿದೆ. ಜ್ವರ ಬರುವ ಮೊದಲು ಇದು ಹೆಚ್ಚಾಗಿ ಸಂಭವಿಸುತ್ತದೆ. ರೋಗಿಗೆ ವಿಪರೀತ ಚಳಿಯಾಗುತ್ತದೆ.
ತಲೆನೋವು
ಮಲೇರಿಯಾ ಜ್ವರವಿದ್ದರೆ ತಲೆನೋವು ಕೂಡ ಬರುತ್ತದೆ. ಇದು ಕೆಲವೊಮ್ಮೆ ಸೌಮ್ಯವಾಗಿರಬಹುದು ಅಥವಾ ತಡೆಯಲಾಗದಷ್ಟು ತಲೆನೋವು ಕೂಡ ಬರಬಹುದು.
ಆಯಾಸ
ಮಲೇರಿಯಾ ರೋಗಿಗಳು ಸಾಮಾನ್ಯವಾಗಿ ತುಂಬಾ ಆಯಾಸವನ್ನು ಅನುಭವಿಸುತ್ತಾರೆ.
ಸ್ನಾಯು ನೋವು
ಜ್ವರದ ಜೊತೆಗೆ ಸ್ನಾಯು ನೋವು ಕೂಡ ಮಲೇರಿಯಾದ ಲಕ್ಷಣವಾಗಿದೆ.
ವಾಂತಿ ಮತ್ತು ಹೊಟ್ಟೆ ನೋವು
ಜ್ವರದ ಜೊತೆಗೆ ವಾಂತಿ ಅಥವಾ ವಾಂತಿ ಬಂದಂತಾಗುತ್ತಿದ್ದರೆ, ಹೊಟ್ಟೆ ತೊಳಸುವಿಕೆ, ಹೊಟ್ಟೆಯಲ್ಲಿ ನೋವು ಕೂಡ ಇದ್ದರೆ ಅದು ಮಲೇರಿಯಾದ ಲಕ್ಷಣವಾಗಿರಬಹುದು.
ಮಲೇರಿಯಾ ಪರೀಕ್ಷೆಯು ಸರಳ ಮತ್ತು ಸುಲಭವಾದ ಪರೀಕ್ಷೆ. ಇದನ್ನು ಹೆಚ್ಚಾಗಿ ಕ್ಲಿನಿಕ್ಗಳಲ್ಲಿ ಮಾಡಲಾಗುತ್ತದೆ. ಇದಕ್ಕೆ ಔಷಧಿಗಳೊಂದಿಗೆ ಚಿಕಿತ್ಸೆ ನೀಡಬಹುದು. ಸಕಾಲದಲ್ಲಿ ಮಲೇರಿಯಾ ಪತ್ತೆಯಾದರೆ ಬಹುಬೇಗ ನಿಯಂತ್ರಿಸಬಹುದು. ಮಲೇರಿಯಾವನ್ನು ತಡೆಗಟ್ಟಲು ಕೆಲವು ಕ್ರಮಗಳನ್ನು ತಿಳಿಯೋಣ.
ಸೊಳ್ಳೆಗಳಿಂದ ರಕ್ಷಿಸಿಕೊಳ್ಳಿ
ಸೊಳ್ಳೆಗಳ ಕಾಟ ತಪ್ಪಿಸಲು ಪರದೆಗಳನ್ನು ಬಳಸಿ. ಸೊಳ್ಳೆ ನಿವಾರಕ ಕ್ರೀಮ್ ಅಥವಾ ಲೋಷನ್ ಅನ್ನು ಅನ್ವಯಿಸಿ. ಮನೆಯ ಸುತ್ತಲೂ ನೀರು ಸಂಗ್ರಹವಾಗದಂತೆ ಎಚ್ಚರ ವಹಿಸಿ.
ಮಲೇರಿಯಾ ವಿರೋಧಿ ಔಷಧಗಳು
ಮಲೇರಿಯಾ ಪೀಡಿತ ಪ್ರದೇಶಕ್ಕೆ ಹೋಗುತ್ತಿದ್ದರೆ ಮೊದಲೇ ಅದನ್ನು ತಡೆಗಟ್ಟಬಲ್ಲ ಔಷಧಗಳನ್ನು ತೆಗೆದುಕೊಳ್ಳಬೇಕು. ವೈದ್ಯರ ಸಲಹೆ ಮೇರೆಗೆ ಔಷಧ ಸೇವಿಸಿ.
ಪ್ರತಿರಕ್ಷಣಾ ವ್ಯವಸ್ಥೆ
ಮಲೇರಿಯಾವನ್ನು ತಪ್ಪಿಸಲು ದೇಹದ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸಿಕೊಳ್ಳಿ.
ಬಟ್ಟೆಗಳ ಆಯ್ಕೆ
ಉದ್ದನೆಯ ತೋಳುಗಳಿರುವ ಬಟ್ಟೆಗಳನ್ನು ಧರಿಸಿ, ಪ್ಯಾಂಟ್ ಧರಿಸುವುದು ಉತ್ತಮ. ಇದು ದೇಹದ ಚರ್ಮವನ್ನು ಸಂಪೂರ್ಣವಾಗಿ ಮುಚ್ಚಿಡುತ್ತದೆ ಮತ್ತು ಸೊಳ್ಳೆಗಳಿಂದ ನಮ್ಮನ್ನು ರಕ್ಷಿಸುತ್ತದೆ.
