ಭಾರತದಲ್ಲಿ ಅಕ್ಷಯ ತೃತೀಯದಂದು (ಏಪ್ರಿಲ್ 19) ಚಿನ್ನ ಖರೀದಿಸುವುದು ಅತ್ಯಂತ ಶುಭ ಎಂದು ನಂಬಲಾಗಿದೆ. ಆದರೆ, ಮನೆಯಲ್ಲಿ ಇಟ್ಟುಕೊಳ್ಳುವ ಚಿನ್ನದ ಪ್ರಮಾಣಕ್ಕೆ ಸಂಬಂಧಿಸಿದಂತೆ ಕೇಂದ್ರೀಯ ನೇರ ತೆರಿಗೆ ಮಂಡಳಿ (CBDT) ಕೆಲವು ನಿರ್ದಿಷ್ಟ ನಿಯಮಗಳನ್ನು ರೂಪಿಸಿದೆ. ಈ ನಿಯಮಗಳನ್ನು ಮೀರಿದರೆ ಕಾನೂನು ಕ್ರಮ ಎದುರಿಸಬೇಕಾಗಬಹುದು.
ಮನೆಯಲ್ಲಿ ‘ಬಿಲ್’ ಇಲ್ಲದೆಯೇ ಎಷ್ಟು ಪ್ರಮಾಣದ ಚಿನ್ನಾಭರಣಗಳನ್ನು ಇಟ್ಟುಕೊಳ್ಳಬಹುದು ಎಂಬ ಬಗ್ಗೆ ಕೇಂದ್ರೀಯ ನೇರ ತೆರಿಗೆ ಮಂಡಳಿ (CBDT) ಸ್ಪಷ್ಟ ನಿಯಮಗಳನ್ನು ರೂಪಿಸಿದೆ. ಈ ನಿಯಮದ ಪ್ರಕಾರ, ವಿವಾಹಿತ ಮಹಿಳೆ 500 ಗ್ರಾಂ, ಅವಿವಾಹಿತ ಮಹಿಳೆ 250 ಗ್ರಾಂ ಮತ್ತು ಪುರುಷರು 100 ಗ್ರಾಂವರೆಗೆ ಚಿನ್ನಾಭರಣಗಳನ್ನು ಯಾವುದೇ ಖರೀದಿ ದಾಖಲೆಗಳಿಲ್ಲದೆ ಹೊಂದಲು ಕಾನೂನುಬದ್ಧವಾಗಿ ಅವಕಾಶವಿದೆ. ಆದರೆ, ಚಿನ್ನದ ನಾಣ್ಯ ಅಥವಾ ಬಿಸ್ಕೆಟ್ಗಳಿಗೆ ಕಡ್ಡಾಯವಾಗಿ ಬಿಲ್ ಇರಲೇಬೇಕಾಗುತ್ತದೆ. ಈ ಮಿತಿಗಳನ್ನು ಮೀರಿದ ಚಿನ್ನಕ್ಕೆ ಸೂಕ್ತ ಆದಾಯದ ಮೂಲ ಅಥವಾ ಖರೀದಿ ದಾಖಲೆಗಳನ್ನು ಒದಗಿಸುವುದು ಅನಿವಾರ್ಯವಾಗಿದೆ.
ಬಿಲ್ ಅಥವಾ ದಾಖಲೆ ಇಲ್ಲದೆ ಎಷ್ಟು ಚಿನ್ನ ಇಟ್ಟುಕೊಳ್ಳಬಹುದು ?
ಆದಾಯದ ಮೂಲದ ದಾಖಲೆ ಅಥವಾ ಅಧಿಕೃತ ಬಿಲ್ ಇಲ್ಲದಿದ್ದರೂ ಸಹ, ಈ ಕೆಳಗಿನ ಮಿತಿಯೊಳಗೆ ಚಿನ್ನಾಭರಣಗಳನ್ನು ಇಟ್ಟುಕೊಳ್ಳಲು ಕಾನೂನಿನಲ್ಲಿ ಅವಕಾಶವಿದೆ:
- ವಿವಾಹಿತ ಮಹಿಳೆ: 500 ಗ್ರಾಂ ವರೆಗೆ.
- ಅವಿವಾಹಿತ ಮಹಿಳೆ: 250 ಗ್ರಾಂ ವರೆಗೆ.
- ಪುರುಷರು: ಪ್ರತಿ ಪುರುಷನಿಗೆ 100 ಗ್ರಾಂ ವರೆಗೆ (ವಿವಾಹಿತ ಅಥವಾ ಅವಿವಾಹಿತ).
ಆದಾಯ ತೆರಿಗೆ ದಾಳಿಯ ಸಮಯದಲ್ಲಿ ಈ ಮಿತಿಯೊಳಗಿನ ಚಿನ್ನಾಭರಣಗಳನ್ನು ಅಧಿಕಾರಿಗಳು ಜಪ್ತಿ ಮಾಡುವಂತಿಲ್ಲ.
ಚಿನ್ನದ ನಾಣ್ಯಗಳು ಮತ್ತು ಬಿಸ್ಕೆಟ್ಗಳ ನಿಯಮವೇನು ?
ನೆನಪಿರಲಿ, ಮೇಲಿನ ಸಡಿಲಿಕೆಯು ಕೇವಲ ಚಿನ್ನದ ಆಭರಣಗಳಿಗೆ ಮಾತ್ರ ಅನ್ವಯಿಸುತ್ತದೆ. ಒಂದು ವೇಳೆ ನಿಮ್ಮ ಬಳಿ ಚಿನ್ನದ ನಾಣ್ಯಗಳು, ಬಿಸ್ಕೆಟ್ಗಳು ಅಥವಾ ಕಡ್ಡಿಗಳಿದ್ದರೆ (Bars), ಅವುಗಳಿಗೆ ಸಂಬಂಧಿಸಿದ ಅಧಿಕೃತ ಬಿಲ್ ಅಥವಾ ರಸೀದಿ ಇರುವುದು ಕಡ್ಡಾಯ. ದಾಖಲೆ ಇಲ್ಲದಿದ್ದರೆ ಇವುಗಳನ್ನು ಕಾನೂನುಬಾಹಿರ ಎಂದು ಪರಿಗಣಿಸುವ ಸಾಧ್ಯತೆ ಇರುತ್ತದೆ.
ಮಿತಿಗಿಂತ ಹೆಚ್ಚು ಚಿನ್ನ ದೂರೆತರೆ ಏನಾಗುತ್ತದೆ?
ಒಂದು ವೇಳೆ ಮನೆಯಲ್ಲಿ ನಿಗದಿಪಡಿಸಿದ ಮಿತಿಗಿಂತ ಹೆಚ್ಚು ಚಿನ್ನ ಕಂಡುಬಂದರೆ, ಆದಾಯ ತೆರಿಗೆ ಇಲಾಖೆ ವಿವರಣೆ ಕೇಳಬಹುದು. ಆ ಚಿನ್ನವನ್ನು ನೀವು ಪಿತ್ರಾರ್ಜಿತವಾಗಿ (ವಂಶಪಾರಂಪರ್ಯವಾಗಿ) ಪಡೆದಿದ್ದೀರಾ, ಉಡುಗೊರೆಯಾಗಿ ಬಂದಿದೆಯೇ ಅಥವಾ ನಿಮ್ಮ ಉಳಿತಾಯದ ಹಣದಿಂದ ಖರೀದಿಸಿದ್ದೀರಾ ಎಂಬುದನ್ನು ಸಾಬೀತುಪಡಿಸಬೇಕು. ಸೂಕ್ತ ಸಾಕ್ಷ್ಯಗಳಿದ್ದರೆ ಯಾವುದೇ ತೊಂದರೆಯಾಗುವುದಿಲ್ಲ.
1 ಕೆಜಿ ಅಥವಾ ಅದಕ್ಕಿಂತ ಹೆಚ್ಚು ಚಿನ್ನ ಇಟ್ಟುಕೊಳ್ಳಬಹುದೇ?
ಖಂಡಿತವಾಗಿ ಇಟ್ಟುಕೊಳ್ಳಬಹುದು. ಆದರೆ ಅದಕ್ಕೆ ಎರಡು ಷರತ್ತುಗಳಿವೆ:
- ಆ ಚಿನ್ನವನ್ನು ಖರೀದಿಸಲು ಬಳಸಿದ ಹಣ ಘೋಷಿತ ಆದಾಯವಾಗಿರಬೇಕು (Income Tax ಪಾವತಿಸಿರಬೇಕು).
- ನಿಮ್ಮ ಬಳಿ ಅಧಿಕೃತ ಇನ್ವಾಯ್ಸ್ ಅಥವಾ ಬಿಲ್ ಇರಬೇಕು.
ಕಾನೂನುಬದ್ಧವಾಗಿ ಸಂಪಾದಿಸಿದ ಹಣದಲ್ಲಿ ಖರೀದಿಸಿದ ಚಿನ್ನಕ್ಕೆ ಯಾವುದೇ ಗರಿಷ್ಠ ಮಿತಿ ಇರುವುದಿಲ್ಲ; ನೀವು 1 ಕೆಜಿ ಅಥವಾ ಎಷ್ಟು ಬೇಕಾದರೂ ಚಿನ್ನವನ್ನು ನಿಮ್ಮ ಮನೆಯಲ್ಲಿ ಸುರಕ್ಷಿತವಾಗಿ ಇಟ್ಟುಕೊಳ್ಳಬಹುದು.
