ಭೋಪಾಲ್: ಮಂಗಳವಾರ ಇಬ್ಬರು ಅಭ್ಯರ್ಥಿಗಳ ನಾಮಪತ್ರಗಳು ತಿರಸ್ಕೃತಗೊಂಡ ನಂತರ, ಮಧ್ಯಪ್ರದೇಶದ ರಾಜ್ಯಸಭಾ ಉಪಚುನಾವಣೆಯಲ್ಲಿ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರ ಗೆಲುವು ಖಚಿತವಾಗಿದೆ.
ನಾಮಪತ್ರಗಳನ್ನು ಹಿಂಪಡೆಯಲು ಕೊನೆಯ ದಿನವಾದ ನವೆಂಬರ್ 5 ರಂದು ಫಲಿತಾಂಶವನ್ನು ಘೋಷಿಸಲಾಗುವುದು ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ನಾಮಪತ್ರಗಳ ಪರಿಶೀಲನೆಗೆ ಕೊನೆಯ ದಿನವಾಗಿದ್ದ ಮಂಗಳವಾರದಂದು, ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿಗಳಾದ ರಾಜಕುಮಾರ್ ಲೋಹಾನಿ ಮತ್ತು ಕಾಂತೆ ಸಯನ್ನಾ ಅವರ ನಾಮಪತ್ರಗಳನ್ನು ತಿರಸ್ಕರಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.
ಆದಾಗ್ಯೂ, ಸಯನ್ನಾ ಮತ್ತು ಲೋಹಾನಿ ಅವರು ಪುರಿ ಅವರ ನಾಮಪತ್ರಗಳ ಬಗ್ಗೆ ಆಕ್ಷೇಪಣೆಗಳನ್ನು ಎತ್ತಿದರು. ‘ಫಾರ್ಮ್ 26’ ರಲ್ಲಿ ಸಲ್ಲಿಸಲಾದ ಅಫಿಡವಿಟ್ ಅಮಾನ್ಯವಾಗಿದೆ ಮತ್ತು ಅಪೂರ್ಣವಾಗಿದೆ ಎಂದು ಅವರು ವಾದಿಸಿದರು. ಆದರೆ, ಆಕ್ಷೇಪಣೆಗಳನ್ನು ಪರಿಶೀಲಿಸಿದ ನಂತರ, ರಿಟರ್ನಿಂಗ್ ಆಫೀಸರ್ (RO) ಉಮೇಶ್ ಶರ್ಮಾ ಅವರು ಪುರಿ ಅವರ ನಾಮಪತ್ರಗಳಲ್ಲಿ ಆಕ್ಷೇಪಾರ್ಹವಾದದ್ದು ಏನೂ ಇಲ್ಲ ಎಂದು ತಿಳಿಸಿದ್ದಾರೆ.
“ಪುರಿ ಅವರ ದಾಖಲೆಗಳಲ್ಲಿ ಯಾವುದೇ ದೋಷ ಕಂಡುಬಂದಿಲ್ಲ” ಎಂದು ಅವರು ತಮ್ಮ ಆದೇಶದಲ್ಲಿ ತಿಳಿಸಿರುವುದಾಗಿ ಹೇಳಲಾಗಿದೆ.
ಪುರಿ ಅವರ ನಾಮಪತ್ರಗಳಲ್ಲಿನ ದೋಷಗಳನ್ನು ಕಡೆಗಣಿಸಲಾಗಿದೆ ಎಂದು ಆರೋಪಿಸಿರುವ ಕಾಂಗ್ರೆಸ್, ಈ ವಿಷಯವನ್ನು ನ್ಯಾಯಾಲಯಕ್ಕೆ ಕೊಂಡೊಯ್ಯುವುದಾಗಿ ಹೇಳಿದೆ. “ಇದು ಭಾರತೀಯ ಪ್ರಜಾಪ್ರಭುತ್ವದ ಮೇಲಿನ ದಾಳಿಯಾಗಿದೆ. ಇಂತಹ ಗಂಭೀರ ದೋಷಗಳಿದ್ದರೂ, ನಾಮಪತ್ರವನ್ನು ತಿರಸ್ಕರಿಸಲಾಗಿಲ್ಲ” ಎಂದು ಕಟಾರೆ ಮತ್ತು ಕಾಂಗ್ರೆಸ್ ಶಾಸಕ ಆತಿಫ್ ಅಕೀಲ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ತಮಿಳುನಾಡಿನಲ್ಲಿ ಭಾರತೀಯ ಜನತಾ ಪಕ್ಷವನ್ನು(ಬಿಜೆಪಿ) ಬಲಪಡಿಸುವತ್ತ ಗಮನಹರಿಸಲು ಬಯಸುವುದಾಗಿ ತಿಳಿಸಿ, ಕೇಂದ್ರ ಸಚಿವ ಸಂಪುಟಕ್ಕೆ ರಾಜೀನಾಮೆ ನೀಡಿದ್ದ ಎಲ್. ಮುರುಗನ್ ಅವರು ತಮ್ಮ ರಾಜ್ಯಸಭಾ ಸ್ಥಾನಕ್ಕೂ ರಾಜೀನಾಮೆ ನೀಡಿದ್ದರು. ಈ ಸ್ಥಾನ ತೆರವಾದ ಹಿನ್ನೆಲೆಯಲ್ಲಿ ಮಧ್ಯಪ್ರದೇಶದಲ್ಲಿ ರಾಜ್ಯಸಭಾ ಉಪಚುನಾವಣೆ ನಡೆಯುತ್ತಿದೆ.
ಅವರ ಸ್ಥಾನಕ್ಕೆ, ಬಿಜೆಪಿ 74 ವರ್ಷದ ಹರ್ದೀಪ್ ಪುರಿ ಅವರನ್ನು ಕಣಕ್ಕಿಳಿಸಿದೆ. ಉತ್ತರ ಪ್ರದೇಶದಿಂದ ರಾಜ್ಯಸಭಾ ಸದಸ್ಯರಾಗಿದ್ದ ಪುರಿ ಅವರ ಅಧಿಕಾರಾವಧಿಯು ನವೆಂಬರ್ 25 ರಂದು ಕೊನೆಗೊಳ್ಳಲಿತ್ತು. ಮಧ್ಯಪ್ರದೇಶದಲ್ಲಿ ಬಿಜೆಪಿ ಬೃಹತ್ ಬಹುಮತವನ್ನು ಹೊಂದಿರುವ ಕಾರಣ, ಪುರಿ ಅವರ ಗೆಲುವು ಸುಲಭವಾಗಲಿದೆ. 230 ಸದಸ್ಯ ಬಲದ ಮಧ್ಯಪ್ರದೇಶ ವಿಧಾನಸಭೆಯಲ್ಲಿ, ಬಿಜೆಪಿ 164 ಶಾಸಕರನ್ನು ಹೊಂದಿದೆ.
ಉಪಚುನಾವಣೆಗಾಗಿ ಸಲ್ಲಿಸಿದ ಅಫಿಡವಿಟ್ ನಲ್ಲಿ, ತಮ್ಮ ಪತ್ನಿ ಲಕ್ಷ್ಮಿ ಪುರಿ ಅವರು ವಾರ್ಷಿಕ ಆದಾಯ, ಚರಾಸ್ತಿಗಳು ಮತ್ತು ಬ್ಯಾಂಕ್ ಠೇವಣಿಗಳ ವಿಷಯದಲ್ಲಿ ತಮ್ಮಗಿಂತ ಹೆಚ್ಚು ಶ್ರೀಮಂತರಾಗಿದ್ದಾರೆ ಎಂದು ಹರ್ದೀಪ್ ಪುರಿ ಉಲ್ಲೇಖಿಸಿದ್ದಾರೆ. ಅಫಿಡವಿಟ್‌ನಲ್ಲಿ ತಿಳಿಸಿರುವಂತೆ, ಅವರು 6.54 ಕೋಟಿ ರೂಪಾಯಿ ಮೌಲ್ಯದ ಚರಾಸ್ತಿಗಳನ್ನು ಮತ್ತು 20 ಕೋಟಿ ರೂಪಾಯಿ ಮೌಲ್ಯದ ಸ್ಥಿರಾಸ್ತಿಗಳನ್ನು ಹೊಂದಿದ್ದಾರೆ; ಇದರಲ್ಲಿ ದೆಹಲಿಯ ವೆಸ್ಟ್ ಎಂಡ್ ಪ್ರದೇಶದಲ್ಲಿರುವ ವಸತಿ ಆಸ್ತಿಯೂ ಸೇರಿದೆ. ಕಳೆದ ಐದು ವರ್ಷಗಳಲ್ಲಿ ಅವರ ವಾರ್ಷಿಕ ಆದಾಯವು 63.36 ಲಕ್ಷ ರೂಪಾಯಿಗಳಿಂದ 75.57 ಲಕ್ಷ ರೂಪಾಯಿಗೆ ಏರಿಕೆಯಾಗಿದೆ.
