ವಾಟ್ಸ್ಆ್ಯಪ್ ಬಳಕೆದಾರರಿಗೆ ಒಂದು ಸಿಹಿಸುದ್ದಿ. ಶೀಘ್ರದಲ್ಲೇ ಮತ್ತೊಂದು ಹೊಸ ಫೀಚರ್ ಲಭ್ಯವಾಗಲಿದೆ. ಅದೇನೆಂದರೆ, ಇನ್ನು ಮುಂದೆ ವಾಟ್ಸ್ಆ್ಯಪ್ ‘ಯೂಸರ್ ನೇಮ್’ (Usernames) ಸೌಲಭ್ಯವನ್ನು ಪರಿಚಯಿಸಲಿದೆ. ಪ್ರಸ್ತುತ ಇನ್ಸ್ಟಾಗ್ರಾಮ್ನಲ್ಲಿ ನಾವು ಯೂಸರ್ ನೇಮ್ ಆಧಾರದ ಮೇಲೆ ವ್ಯಕ್ತಿಗಳನ್ನು ಗುರುತಿಸುತ್ತೇವೆ. ಅದೇ ರೀತಿಯ ಆಯ್ಕೆ ಶೀಘ್ರದಲ್ಲೇ ವಾಟ್ಸ್ಆ್ಯಪ್ನಲ್ಲೂ ಸಿಗಲಿದೆ.
ಪ್ರಮುಖ ಮೆಸೇಜಿಂಗ್ ಪ್ಲಾಟ್ಫಾರ್ಮ್ ವಾಟ್ಸ್ಆ್ಯಪ್ ಹೊಸ ಫೀಚರ್ ಒಂದನ್ನು ಪರಿಚಯಿಸಲು ಸಿದ್ಧತೆ ನಡೆಸುತ್ತಿದೆ. ಟೆಲಿಗ್ರಾಮ್ ಮತ್ತು ಸಿಗ್ನಲ್ ಆ್ಯಪ್ಗಳ ಮಾದರಿಯಲ್ಲಿ, ಬಳಕೆದಾರರು ತಮ್ಮದೇ ಆದ ಯೂಸರ್ ನೇಮ್ ಅನ್ನು ಆಯ್ಕೆ ಮಾಡಿಕೊಳ್ಳಲು ವಾಟ್ಸ್ಆ್ಯಪ್ ಅವಕಾಶ ನೀಡಲಿದೆ. ಪ್ರಸ್ತುತ ಇದು ಪರೀಕ್ಷಾ ಹಂತದಲ್ಲಿದೆ. ಈ ಫೀಚರ್ ಲಭ್ಯವಾದರೆ, ಬಳಕೆದಾರರು ತಮ್ಮ ಫೋನ್ ನಂಬರ್ ಇತರರಿಗೆ ಕಾಣದಂತೆ ಮರೆಮಾಡಬಹುದು. ಕೇವಲ ಯೂಸರ್ ನೇಮ್ ಮಾತ್ರ ಕಾಣಿಸುತ್ತದೆ. ಬಳಕೆದಾರರ ಫೋನ್ ನಂಬರ್ಗಳು ಸೈಬರ್ ಅಪರಾಧಿಗಳಿಗೆ ಸಿಗದಂತೆ ಭದ್ರತೆ ಕಲ್ಪಿಸುವ ನಿಟ್ಟಿನಲ್ಲಿ ವಾಟ್ಸ್ಆ್ಯಪ್ ಈ ಪ್ರಯತ್ನ ಮಾಡುತ್ತಿದೆ. ಬಳಕೆದಾರರ ಖಾಸಗಿತನಕ್ಕೆ (Privacy) ಹೆಚ್ಚಿನ ಆದ್ಯತೆ ನೀಡಲು ಇದನ್ನು ಜಾರಿಗೆ ತರಲಾಗುತ್ತಿದೆ.
ಬಳಕೆದಾರರಿಗೆ ಮಾಹಿತಿ ಈ ಫೀಚರ್ ಇನ್ನೂ ಅಧಿಕೃತವಾಗಿ ಬಿಡುಗಡೆಯಾಗಿಲ್ಲ. ಬೀಟಾ ಟೆಸ್ಟರ್ಗಳಿಗೂ ಇದು ಇನ್ನೂ ಸಿಕ್ಕಿಲ್ಲ. ಮುಂದಿನ ದಿನಗಳಲ್ಲಿ ನೀವು ಈ ಫೀಚರ್ ಅನ್ನು ನೋಡಬಹುದು. ಚಾಟ್ ಏರಿಯಾದಲ್ಲಿ ಕೇವಲ ನಿಮ್ಮ ಯೂಸರ್ ನೇಮ್ ಮಾತ್ರ ಕಾಣಿಸುವುದರಿಂದ ನಿಮ್ಮ ಫೋನ್ ನಂಬರ್ ಇತರರಿಗೆ ತಿಳಿಯುವುದಿಲ್ಲ. ಯೂಸರ್ ನೇಮ್ನಲ್ಲಿ ಕನಿಷ್ಠ ಒಂದು ಅಕ್ಷರ ಇರಬೇಕು. ಇದು ‘www’ ನಿಂದ ಪ್ರಾರಂಭವಾಗಬಾರದು. ಸಣ್ಣ ಅಕ್ಷರಗಳು (a–z), ಸಂಖ್ಯೆಗಳು (0–9), ಚುಕ್ಕಿಗಳು (dots) ಮತ್ತು ಅಂಡರ್ಸ್ಕೋರ್ಗಳನ್ನು ಮಾತ್ರ ಯೂಸರ್ ನೇಮ್ನಲ್ಲಿ ಬಳಸುವಂತೆ ವಾಟ್ಸ್ಆ್ಯಪ್ ಸಿದ್ಧಪಡಿಸುತ್ತಿದೆ. ಯೂಸರ್ ನೇಮ್ ಬದಲಾಯಿಸಿದರೆ, ನಿಮ್ಮ ಚಾಟ್ನಲ್ಲಿರುವ ಪ್ರತಿಯೊಬ್ಬರಿಗೂ ಸಿಸ್ಟಮ್ ಸ್ವಯಂಚಾಲಿತವಾಗಿ ಸಂದೇಶ ಕಳುಹಿಸುತ್ತದೆ. ಇದರಿಂದ ಯಾವುದೇ ಗೊಂದಲ ಉಂಟಾಗುವುದಿಲ್ಲ.
ವಾಟ್ಸ್ಆ್ಯಪ್ನ ಇತರ ಫೀಚರ್ಗಳು ವಾಟ್ಸ್ಆ್ಯಪ್ ಶೀಘ್ರದಲ್ಲೇ ಮತ್ತಷ್ಟು ಫೀಚರ್ಗಳನ್ನು ಪರಿಚಯಿಸಲಿದೆ. ಫೇಸ್ಬುಕ್ ಮೆಸೆಂಜರ್ನಂತೆ, ಯಾರು ಆನ್ಲೈನ್ನಲ್ಲಿದ್ದಾರೆ ಎಂಬುದನ್ನು ವಾಟ್ಸ್ಆ್ಯಪ್ನಲ್ಲೂ ತಿಳಿಯಬಹುದು. ಪ್ರಸ್ತುತ, ಯಾರಾದರೂ ಆನ್ಲೈನ್ನಲ್ಲಿದ್ದಾರೆಯೇ ಅಥವಾ ಇಲ್ಲವೇ ಎಂದು ತಿಳಿಯಲು ಚಾಟ್ ವಿಂಡೋವನ್ನು ಓಪನ್ ಮಾಡಬೇಕಾಗುತ್ತದೆ. ಆದರೆ, ಇನ್ನು ಮುಂದೆ ಚಾಟ್ ಓಪನ್ ಮಾಡದೆಯೇ ಆನ್ಲೈನ್ನಲ್ಲಿರುವ ಬಳಕೆದಾರರ ವಿವರಗಳು ಒಂದೇ ಕಡೆ ಕಾಣಿಸುತ್ತವೆ. ಇದರಿಂದ ನೀವು ಸುಲಭವಾಗಿ ಚಾಟ್ ಮಾಡಬಹುದು. ಆದಾಗ್ಯೂ, ತಮ್ಮ ಆನ್ಲೈನ್ ಸ್ಟೇಟಸ್ ಕಾಣಿಸದಂತೆ ಸೆಟ್ಟಿಂಗ್ಸ್ನಲ್ಲಿ ಡಿಸೇಬಲ್ (Disable) ಮಾಡಿಕೊಂಡಿರುವ ಬಳಕೆದಾರರ ಮಾಹಿತಿ ಎಂದಿನಂತೆ ಕಾಣಿಸುವುದಿಲ್ಲ. ಈ ಫೀಚರ್ ಕೂಡ ಕೆಲವೇ ದಿನಗಳಲ್ಲಿ ಬಿಡುಗಡೆಯಾಗಲಿದೆ.
