ನವದೆಹಲಿ: ಮೆಟಾ (Meta) ಒಡೆತನದ ಜನಪ್ರಿಯ ಮೆಸೇಜಿಂಗ್ ಆಪ್ WhatsApp ಬಳಕೆದಾರರಿಗೆ ಮಹತ್ವದ ಹೊಸ ವೈಶಿಷ್ಟ್ಯವನ್ನು ಘೋಷಿಸಿದೆ. ಇನ್ನು ಮುಂದೆ ಯಾರೊಂದಿಗಾದರೂ ಸಂಪರ್ಕ ಸಾಧಿಸಲು ತಮ್ಮ ಮೊಬೈಲ್ ಸಂಖ್ಯೆ ಹಂಚಿಕೊಳ್ಳುವ ಅಗತ್ಯವಿಲ್ಲ. ಅದರ ಬದಲಿಗೆ ಪ್ರತಿಯೊಬ್ಬ ಬಳಕೆದಾರರು ತಮ್ಮದೇ ಆದ ವಿಶಿಷ್ಟ (Unique) ಯೂಸರ್ನೇಮ್ ಆಯ್ಕೆ ಮಾಡಿಕೊಂಡು ಅದನ್ನು ಹಂಚಿಕೊಳ್ಳಬಹುದು.
ಹೌದು. ವಾಟ್ಸಾಪ್ ಬಳಕೆದಾರರಿಗೆ ಮೆಟಾ (Meta) ಮಹತ್ವದ ಅಪ್ಡೇಟ್ ನೀಡಿದೆ. ಇನ್ನು ಮುಂದೆ ಯಾರೊಂದಿಗಾದರೂ ಸಂಪರ್ಕ ಸಾಧಿಸಲು ತಮ್ಮ ಮೊಬೈಲ್ ಸಂಖ್ಯೆಯನ್ನು ಹಂಚಿಕೊಳ್ಳುವ ಅಗತ್ಯ ಇರುವುದಿಲ್ಲ. ಅದರ ಬದಲಿಗೆ ಪ್ರತಿಯೊಬ್ಬ ಬಳಕೆದಾರರು ತಮ್ಮದೇ ಆದ ಯೂನಿಕ್ ಯೂಸರ್ನೇಮ್ (Username) ಆಯ್ಕೆ ಮಾಡಿಕೊಂಡು ಅದನ್ನು ಬಳಸಬಹುದು. ಈ ಹೊಸ ಫೀಚರ್ನಿಂದ ಬಳಕೆದಾರರ ಗೌಪ್ಯತೆ (Privacy) ಮತ್ತಷ್ಟು ಬಲವಾಗಲಿದ್ದು, ಫೋನ್ ನಂಬರ್ ಬಹಿರಂಗಪಡಿಸದೇ ಸುರಕ್ಷಿತವಾಗಿ ಚಾಟ್ ಮಾಡುವ ಅವಕಾಶ ದೊರೆಯಲಿದೆ.
ವಾಟ್ಸ್ಆಪ್ ಪ್ರಕಟಣೆಯ ಪ್ರಕಾರ, “ನಿಮ್ಮ ಫೋನ್ ಸಂಖ್ಯೆ ವೈಯಕ್ತಿಕ ಮಾಹಿತಿಯಾಗಿದೆ. ಕೆಲವೊಮ್ಮೆ ಅದನ್ನು ಹಂಚಿಕೊಳ್ಳದೇ ಇತರರೊಂದಿಗೆ ಸಂಪರ್ಕದಲ್ಲಿರಲು ನೀವು ಬಯಸಬಹುದು. ಅದಕ್ಕಾಗಿ ನಾವು WhatsApp ನಲ್ಲಿ ಯೂಸರ್ನೇಮ್ ವ್ಯವಸ್ಥೆಯನ್ನು ಪರಿಚಯಿಸುತ್ತಿದ್ದೇವೆ” ಎಂದು ತಿಳಿಸಿದೆ.
ಈ ವಾರದಿಂದಲೇ ಯೂಸರ್’ನೇಮ್ ಕಾಯ್ದಿರಿಸುವ ಅವಕಾಶ
ಕಂಪನಿಯ ಮಾಹಿತಿ ಪ್ರಕಾರ, ಈ ವಾರದಿಂದಲೇ ಬಳಕೆದಾರರು ತಮ್ಮ ಯೂಸರ್ನೇಮ್ ಅನ್ನು ಮುಂಗಡವಾಗಿ (Reserve) ಕಾಯ್ದಿರಿಸಬಹುದು. ಈ ವೈಶಿಷ್ಟ್ಯವು ವರ್ಷದ ನಂತರದ ಅವಧಿಯಲ್ಲಿ ಅಧಿಕೃತವಾಗಿ ಬಿಡುಗಡೆಯಾಗಲಿದೆ.
ಯೂಸರ್ನೇಮ್ ಕಾಯ್ದಿರಿಸಲು:
• WhatsApp ಅನ್ನು ಇತ್ತೀಚಿನ (Latest) ಆವೃತ್ತಿಗೆ ಅಪ್ಡೇಟ್ ಮಾಡಿ.
• Settings > Account > Username ಗೆ ತೆರಳಿ.
• ನಿಮ್ಮ ಇಷ್ಟದ ಯೂಸರ್ನೇಮ್ ಅನ್ನು ಆಯ್ಕೆ ಮಾಡಿ ಕಾಯ್ದಿರಿಸಿ.
ಫೋನ್ ಸಂಖ್ಯೆ ಸುರಕ್ಷಿತವಾಗಿರಲಿದೆ
ಈ ಹೊಸ ವ್ಯವಸ್ಥೆಯಿಂದ ದೊಡ್ಡ WhatsApp ಗುಂಪುಗಳಿಗೆ ಸೇರಿಸಿದಾಗ, ಅಥವಾ ಮೊದಲ ಬಾರಿಗೆ ಯಾವುದೇ ವ್ಯಕ್ತಿ ಅಥವಾ ವ್ಯವಹಾರಕ್ಕೆ ಸಂದೇಶ ಕಳುಹಿಸಿದಾಗ, ನಿಮ್ಮ ಫೋನ್ ಸಂಖ್ಯೆ ಸ್ವಯಂಚಾಲಿತವಾಗಿ ಇತರರಿಗೆ ಗೋಚರಿಸುವುದಿಲ್ಲ.
ಯಾರಾದರೂ ಸಂಪರ್ಕಿಸಬೇಕಾದರೆ ಏನು ಮಾಡಬೇಕು?
ಮೆಟಾ ಸ್ಪಷ್ಟಪಡಿಸಿರುವಂತೆ, ಯೂಸರ್ನೇಮ್ಗಳ ಸಾರ್ವಜನಿಕ ಡೈರೆಕ್ಟರಿ ಇರುವುದಿಲ್ಲ. ಅಲ್ಲದೆ, ಯಾವುದೇ ಸಲಹೆ (Suggestions) ಕೂಡ ತೋರಿಸಲಾಗುವುದಿಲ್ಲ. ಹೀಗಾಗಿ ಯಾರಾದರೂ ನಿಮ್ಮನ್ನು ಸಂಪರ್ಕಿಸಲು ನಿಮ್ಮ ನಿಖರವಾದ (Exact) ಯೂಸರ್ನೇಮ್ ತಿಳಿದಿರಬೇಕು.
ಹಂತ ಹಂತವಾಗಿ ಜಾಗತಿಕ ಬಿಡುಗಡೆ
ಈ ಹೊಸ ವೈಶಿಷ್ಟ್ಯವನ್ನು ಮುಂದಿನ ಕೆಲವು ತಿಂಗಳಲ್ಲಿ ವಿಶ್ವದಾದ್ಯಂತ ಹಂತ ಹಂತವಾಗಿ (Gradual Rollout) ಬಿಡುಗಡೆ ಮಾಡಲಾಗುತ್ತದೆ. ಪ್ರತಿ ದೇಶದಲ್ಲಿ ಈ ಫೀಚರ್ ಲಭ್ಯವಾದಾಗ WhatsApp ಬಳಕೆದಾರರಿಗೆ ಆಪ್ನಲ್ಲೇ ಮಾಹಿತಿ ನೀಡಲಿದೆ.
ಕುನಾಲ್ ಶಾ ಅವರಿಗೆ WhatsApp ಜಾಗತಿಕ ನೇತೃತ್ವ
ಇತ್ತೀಚೆಗಷ್ಟೇ ಮೆಟಾ, ಭಾರತೀಯ ಫಿನ್ಟೆಕ್ ಸಂಸ್ಥೆ CRED ಸಂಸ್ಥಾಪಕ ಕುನಾಲ್ ಶಾ ಅವರನ್ನು WhatsAppನ ಹೊಸ ಜಾಗತಿಕ ಮುಖ್ಯಸ್ಥರಾಗಿ ನೇಮಿಸಿದೆ. ಈ ನೇಮಕಾತಿ ಜಾಗತಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರತೀಯ ಉದ್ಯಮಿಗೆ ದೊರೆತ ಪ್ರಮುಖ ಜವಾಬ್ದಾರಿಗಳಲ್ಲೊಂದು ಎಂದು ಪರಿಗಣಿಸಲಾಗಿದೆ.ಮೆಟಾ ಸಿಇಒ ಮಾರ್ಕ್ ಜುಕರ್ಬರ್ಗ್ ಈ ನೇಮಕಾತಿಯನ್ನು ಫೇಸ್ಬುಕ್ನಲ್ಲಿ ಘೋಷಿಸಿ, “ಕುನಾಲ್ ಶಾ CRED ಅನ್ನು ಭಾರತದ ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳಲ್ಲಿ ಒಂದಾಗಿ ಬೆಳೆಸಿದ್ದಾರೆ. ಅವರ ಅನುಭವ ಮತ್ತು ಜಾಗತಿಕ ದೃಷ್ಟಿಕೋನವು ವಿಶ್ವದ ಅತಿದೊಡ್ಡ ಮೆಸೇಜಿಂಗ್ ಸೇವೆಯಾದ WhatsApp ಅನ್ನು ಮತ್ತಷ್ಟು ಅಭಿವೃದ್ಧಿಪಡಿಸಲು ನೆರವಾಗಲಿದೆ” ಎಂದು ಪ್ರಶಂಸಿಸಿದ್ದಾರೆ.
WhatsApp ಪರಿಚಯಿಸುತ್ತಿರುವ ಈ Username ಫೀಚರ್ ಬಳಕೆದಾರರ ಖಾಸಗಿತನವನ್ನು ಹೆಚ್ಚಿಸುವ ಪ್ರಮುಖ ಹೆಜ್ಜೆಯಾಗಿದೆ. ವಿಶೇಷವಾಗಿ ಅಪರಿಚಿತರೊಂದಿಗೆ, ದೊಡ್ಡ ಗ್ರೂಪ್ಗಳಲ್ಲಿ ಅಥವಾ ವ್ಯವಹಾರಿಕ ಸಂಪರ್ಕಗಳಲ್ಲಿ ಫೋನ್ ಸಂಖ್ಯೆ ಬಹಿರಂಗವಾಗದಂತೆ ರಕ್ಷಣೆ ನೀಡಲಿದೆ. ಸದ್ಯ ಯೂಸರ್ನೇಮ್ ಕಾಯ್ದಿರಿಸುವ ಅವಕಾಶ ಆರಂಭವಾಗಿದ್ದು, ಮುಂದಿನ ಕೆಲ ತಿಂಗಳಲ್ಲಿ ಈ ಹೊಸ ವೈಶಿಷ್ಟ್ಯವನ್ನು ಹಂತ ಹಂತವಾಗಿ ವಿಶ್ವದಾದ್ಯಂತ ಎಲ್ಲಾ ಬಳಕೆದಾರರಿಗೆ ಲಭ್ಯವಾಗುವ ನಿರೀಕ್ಷೆಯಿದೆ.
