ಕೊಲಂಬೊ: ಶ್ರೀಲಂಕಾದ ಮಾಜಿ ಟೆಸ್ಟ್ ಕ್ರಿಕೆಟಿಗ ಮತ್ತು ವಿಶ್ವಕಪ್ ವಿಜೇತ ನಾಯಕ ಅರ್ಜುನ ರಣತುಂಗ ಅವರ ಹಿರಿಯ ಸಹೋದರ ದಮ್ಮಿಕಾ ಅವರನ್ನು ದೇಶದ ಭ್ರಷ್ಟಾಚಾರ ನಿಗ್ರಹ ಆಯೋಗ ಬಂಧಿಸಿ, ನಂತರ ಸೋಮವಾರ ಜಾಮೀನಿನ ಮೇಲೆ ಬಿಡುಗಡೆ ಮಾಡಿದೆ.
2017 ರಲ್ಲಿ ಸರ್ಕಾರಿ ಸಂಸ್ಥೆ ಸಿಲೋನ್ ಪೆಟ್ರೋಲಿಯಂ ಕಾರ್ಪೊರೇಷನ್(ಸಿಪಿಸಿ) ಅಧ್ಯಕ್ಷರಾಗಿದ್ದಾಗ ಕಚ್ಚಾ ತೈಲ ಖರೀದಿಯಲ್ಲಿ ತಪ್ಪು ಟೆಂಡರ್ ಪ್ರಕ್ರಿಯೆಗಾಗಿ 63 ವರ್ಷದ ದಮ್ಮಿಕಾ ಅವರನ್ನು ಬಂಧಿಸಲಾಗಿದೆ ಎಂದು ಲಂಚ ಅಥವಾ ಭ್ರಷ್ಟಾಚಾರ ತನಿಖಾ ಆಯೋಗ(ಸಿಐಎಬಿಒಸಿ) ತಿಳಿಸಿದೆ.
ದಮ್ಮಿಕಾ ಅವರ ಅನಗತ್ಯ ಪ್ರಭಾವದಿಂದಾಗಿ ಸಿಪಿಸಿಗೆ 800 ಮಿಲಿಯನ್ ಶ್ರೀಲಂಕಾ ರೂಪಾಯಿ ನಷ್ಟವಾಗಿದೆ ಎಂದು ಸಿಐಎಬಿಒಸಿ ಹೇಳಿದೆ.
ದಮ್ಮಿಕಾ ಅವರ ಕಿರಿಯ ಸಹೋದರ ಅರ್ಜುನನನ್ನು ಪ್ರಕರಣದಲ್ಲಿ ಎರಡನೇ ಆರೋಪಿಯನ್ನಾಗಿ ಹೆಸರಿಸಲಾಗಿದೆ ಎಂದು CIABOC ಕೊಲಂಬೊ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯಕ್ಕೆ ತಿಳಿಸಿದೆ.
ಅರ್ಜುನ ವಿದೇಶದಲ್ಲಿರುವುದರಿಂದ ಆತನನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಲು ಸಾಧ್ಯವಾಗಲಿಲ್ಲ.
ದಮ್ಮಿಕಾ ಸಿಪಿಸಿಯ ನೇತೃತ್ವ ವಹಿಸಿದ್ದಾಗ ಅರ್ಜುನ ಪೆಟ್ರೋಲಿಯಂ ಕೈಗಾರಿಕಾ ಸಚಿವರಾಗಿದ್ದರು. ದಮ್ಮಿಕಾ 1989/90 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಆರಂಭಿಕ ಆಟಗಾರನಾಗಿ ಎರಡು ಟೆಸ್ಟ್ ಪಂದ್ಯಗಳನ್ನು ಆಡಿದರು. ನಂತರ ಅವರು ದೇಶದಲ್ಲಿ ಕ್ರೀಡೆಯ ಆಡಳಿತ ಮಂಡಳಿಯಾದ ಶ್ರೀಲಂಕಾ ಕ್ರಿಕೆಟ್ನ ಮೊದಲ ಸಿಇಒ ಆದರು
