ಇಂದಿನ ಬದಲಾದ ಜೀವನಶೈಲಿ ಮತ್ತು ಅನಾರೋಗ್ಯಕರ ಆಹಾರ ಪದ್ಧತಿಯಿಂದಾಗಿ ‘ಫ್ಯಾಟಿ ಲಿವರ್’ (Fatty Liver) ಸಮಸ್ಯೆ ಸಾಮಾನ್ಯವಾಗುತ್ತಿದೆ. ಕೇವಲ ಮದ್ಯಪಾನ ಮಾಡುವುದರಿಂದ ಮಾತ್ರ ಲಿವರ್ ಹಾಳಾಗುತ್ತದೆ ಎಂದು ನೀವು ಭಾವಿಸಿದ್ದರೆ ಅದು ತಪ್ಪು. ಹಾರ್ವರ್ಡ್ ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಡಾ. ಸೌರಭ್ ಸೇಥಿ ಅವರ ಪ್ರಕಾರ, ನಾವು ದಿನನಿತ್ಯ ಸೇವಿಸುವ ಕೆಲವು ಪಾನೀಯಗಳು ಲಿವರ್ ಪಾಲಿಗೆ ವಿಷವಾಗಿ ಪರಿಣಮಿಸಬಹುದು. ಇವುಗಳನ್ನು ತಕ್ಷಣವೇ ನಿಲ್ಲಿಸದಿದ್ದರೆ ಲಿವರ್ ಸಿರೋಸಿಸ್ನಂತಹ ಪ್ರಾಣಾಪಾಯದ ಕಾಯಿಲೆಗಳು ಬರುವ ಸಾಧ್ಯತೆ ಹೆಚ್ಚಿದೆ.
ಲಿವರ್ಗೆ ಮಾರಕವಾಗಿರುವ ಆ 3 ಪಾನೀಯಗಳು ಯಾವುವು?
1. ಸಾಫ್ಟ್ ಡ್ರಿಂಕ್ಸ್ (ಸೋಡಾ ಮತ್ತು ಕೋಲ್ಡ್ ಡ್ರಿಂಕ್ಸ್): ಬಿಸಿಲಿನ ಬೇಗೆ ತಣಿಸಲು ಅಥವಾ ಆಹಾರ ಜೀರ್ಣಿಸಿಕೊಳ್ಳಲು ನಾವು ಸೋಡಾ ಅಥವಾ ತಂಪು ಪಾನೀಯಗಳನ್ನು ಕುಡಿಯುತ್ತೇವೆ. ಆದರೆ ಇವುಗಳಲ್ಲಿ ಫ್ರಕ್ಟೋಸ್ ಮತ್ತು ಸಕ್ಕರೆಯ ಪ್ರಮಾಣ ಅತಿಯಾಗಿರುತ್ತದೆ. ನಮ್ಮ ಲಿವರ್ ಇಷ್ಟೊಂದು ಸಕ್ಕರೆಯನ್ನು ಏಕಕಾಲಕ್ಕೆ ಜೀರ್ಣಿಸಿಕೊಳ್ಳಲು ಸಾಧ್ಯವಾಗದೆ ಅದನ್ನು ನೇರವಾಗಿ ಕೊಬ್ಬಾಗಿ ಪರಿವರ್ತಿಸುತ್ತದೆ. ಈ ಕೊಬ್ಬು ಲಿವರ್ನಲ್ಲಿ ಸಂಗ್ರಹವಾಗಿ ಉರಿಯೂತ (Inflammation) ಉಂಟುಮಾಡುತ್ತದೆ.
2. ಸ್ಪೋರ್ಟ್ಸ್ ಎನರ್ಜಿ ಡ್ರಿಂಕ್ಸ್: ಜಿಮ್ಗೆ ಹೋಗುವ ಯುವಕರು ಆಯಾಸ ಪರಿಹರಿಸಿಕೊಳ್ಳಲು ಎನರ್ಜಿ ಡ್ರಿಂಕ್ಸ್ಗಳ ಮೊರೆ ಹೋಗುತ್ತಾರೆ. ಇವು ಆರೋಗ್ಯಕರ ಎಂದು ಮೇಲ್ನೋಟಕ್ಕೆ ಕಂಡರೂ, ವಾಸ್ತವದಲ್ಲಿ ಇವು ಕೆಫೀನ್ ಮತ್ತು ಕೃತಕ ಸಿಹಿಕಾರಕಗಳ (Artificial Sweeteners) ಮಿಶ್ರಣವಾಗಿರುತ್ತವೆ. ಇವುಗಳನ್ನು ಸಂಸ್ಕರಿಸಲು ಲಿವರ್ ಅತಿಯಾಗಿ ಶ್ರಮಿಸಬೇಕಾಗುತ್ತದೆ, ಇದು ಈಗಾಗಲೇ ಕಾಯಿಲೆಯಿಂದ ಬಳಲುತ್ತಿರುವ ಲಿವರ್ ಮೇಲೆ ಹೆಚ್ಚಿನ ಒತ್ತಡ ಹೇರುತ್ತದೆ.
3. ಬೋಬಾ ಟೀ (Boba Tea): ಇತ್ತೀಚೆಗೆ ಮಕ್ಕಳು ಮತ್ತು ಯುವಜನರಲ್ಲಿ ‘ಬೋಬಾ ಟೀ’ ಕ್ರೇಜ್ ಹೆಚ್ಚಾಗಿದೆ. ವೈದ್ಯರು ಇದನ್ನು “ಶುಗರ್ ಬಾಂಬ್” ಎಂದು ಕರೆಯುತ್ತಾರೆ. ಇದರಲ್ಲಿ ಬಳಸುವ ಟಪಿಯೋಕಾ, ಸಕ್ಕರೆ ಮತ್ತು ಕ್ರೀಮ್ ಅತಿಯಾದ ಕ್ಯಾಲೋರಿಗಳನ್ನು ಹೊಂದಿರುತ್ತವೆ. ಇದರ ನಿಯಮಿತ ಸೇವನೆಯಿಂದ ದೇಹದ ತೂಕ ಹೆಚ್ಚಾಗುವುದಲ್ಲದೆ, ಲಿವರ್ನಲ್ಲಿ ಕೊಬ್ಬಿನ ಪದರ ಅತಿ ವೇಗವಾಗಿ ಬೆಳೆಯಲು ಕಾರಣವಾಗುತ್ತದೆ.
ವೈದ್ಯರ ಸಲಹೆ: ಫ್ಯಾಟಿ ಲಿವರ್ ಸಮಸ್ಯೆ ಲಿವರ್ ಸಿರೋಸಿಸ್ ಆಗಿ ಬದಲಾಗಬಾರದು ಎಂದರೆ ಇಂದೇ ಈ ಸಿಹಿ ವಿಷಗಳಿಂದ ದೂರವಿರಿ. ನೈಸರ್ಗಿಕ ನೀರು, ಎಳನೀರು ಅಥವಾ ಮನೆಯಲ್ಲೇ ತಯಾರಿಸಿದ ತಾಜಾ ಹಣ್ಣಿನ ರಸಗಳನ್ನು (ಸಕ್ಕರೆ ರಹಿತ) ಸೇವಿಸುವುದು ಲಿವರ್ ಆರೋಗ್ಯಕ್ಕೆ ಉತ್ತಮ.
