ತಾಯ್ತನವೆಂಬುದು ಪ್ರತಿಯೊಬ್ಬ ಹೆಣ್ಣಿನ ಬದುಕಿನ ಅತ್ಯಂತ ಸುಂದರ ಹಾಗೂ ಪುನರ್ಜನ್ಮದ ಕ್ಷಣ. ಆದರೆ, ಅದೇ ಹೆರಿಗೆಯ ವೇಳೆ ಮಹಿಳೆಯೊಬ್ಬಳು ಉಸಿರು ನಿಂತು, ಹೃದಯ ಬಡಿತ ಸಂಪೂರ್ಣವಾಗಿ ಸ್ಥಗಿತಗೊಂಡು ಬರೋಬ್ಬರಿ 45 ನಿಮಿಷಗಳ ಕಾಲ ‘ಕ್ಲಿನಿಕಲಿ ಡೆಡ್’ (ವೈದ್ಯಕೀಯವಾಗಿ ಮೃತಪಟ್ಟ ಸ್ಥಿತಿ) ಆಗಿದ್ದು, ಬಳಿಕ ವೈದ್ಯರ ತೀವ್ರ ಹೋರಾಟದಿಂದ ಸಾವಿನ ದವಡೆಯಿಂದ ಪವಾಡಸದೃಶವಾಗಿ ಮರಳಿ ಬಂದಿರುವ ಎದೆ ನಡುಗಿಸುವ ನೈಜ ಘಟನೆಯೊಂದು ಬೆಳಕಿಗೆ ಬಂದಿದೆ.
ಟಿಎಲ್ಸಿ (TLC) ವಾಹಿನಿಯ ‘ಇಆರ್: ಕಾಟ್ ಆನ್ ಕ್ಯಾಮೆರಾ’ (ER: Caught on Camera) ನೈಜ ತುರ್ತು ವೈದ್ಯಕೀಯ ಸರಣಿಯಲ್ಲಿ ನಿಕೋಲ್ ಎಂಬ ಮಹಿಳೆ ತನಗೆ ಎದುರಾದ ಈ ಕರಾಳ ಹಾಗೂ ರೋಚಕ ಅನುಭವವನ್ನು ಹಂಚಿಕೊಂಡಿದ್ದಾರೆ.
‘ನನಗೆ ಉಸಿರಾಡಲು ಆಗ್ತಿಲ್ಲ’ ಎಂದ 10 ನಿಮಿಷದಲ್ಲೇ ನಿಂತ ಹೃದಯ !
ತಮ್ಮ ಮೂರನೇ ಮಗುವನ್ನು ಬರಮಾಡಿಕೊಳ್ಳಲು ನಿಕೋಲ್ ಮತ್ತು ಆಕೆಯ ಪತಿ ಆಂಥೋನಿ ಅತ್ಯಂತ ಉತ್ಸಾಹದಿಂದ ಆಸ್ಪತ್ರೆಗೆ ತೆರಳಿದ್ದರು. ಹೆರಿಗೆ ಕೋಣೆಗೆ ಹೋಗುವ ಮುನ್ನ ನಿಕೋಲ್, “ಹೇ ಬೇಬಿ ನಂಬರ್ 3, ನಾವು ಆಸ್ಪತ್ರೆಯಲ್ಲಿದ್ದೇವೆ, ನಿನ್ನನ್ನು ನೋಡಲು ಕಾತರರಾಗಿದ್ದೇವೆ” ಎಂದು ನಗುನಗುತ್ತಲೇ ಮೊಬೈಲ್ನಲ್ಲಿ ವಿಡಿಯೋ ರೆಕಾರ್ಡ್ ಮಾಡಿಕೊಂಡಿದ್ದರು.
ಆದರೆ, ಈ ವಿಡಿಯೋ ಮಾಡಿದ ಕೇವಲ 10 ನಿಮಿಷಗಳಲ್ಲಿ ಪರಿಸ್ಥಿತಿ ಸಂಪೂರ್ಣವಾಗಿ ತಿರುಗುಮುರುಗಾಯಿತು. ನಿಕೋಲ್ಗೆ ತೀವ್ರ ವಾಕರಿಕೆ ಹಾಗೂ ದೇಹದೊಳಗೆ ಯಾವುದೋ ಕೆಟ್ಟ ಘಟನೆ ನಡೆಯುತ್ತಿದೆ ಎಂಬ ಭಯದ ಭಾವನೆ ಆವರಿಸಿತು. “ನನ್ನ ದೇಹದಲ್ಲಿ ಏನೋ ವಿನಾಶಕಾರಿ ಘಟನೆ ನಡೆಯುತ್ತಿದೆ ಎಂಬ ಕಲ್ಪನೆ ಬಂತು. ನನಗೆ ಉಸಿರಾಡಲು ಸಾಧ್ಯವಾಗುತ್ತಿಲ್ಲ, ಉಸಿರು ಕಟ್ಟುತ್ತಿದೆ ಎಂದು ಕಿರುಚಿದ್ದು ಮಾತ್ರ ನನಗೆ ನೆನಪಿದೆ, ಆಮೇಲೆ ಕತ್ತಲಾವರಿಸಿತು” ಎಂದು ನಿಕೋಲ್ ನೆನಪಿಸಿಕೊಂಡಿದ್ದಾರೆ.
ಕ್ಷಣಾರ್ಧದಲ್ಲೇ ಆಕೆಯ ಉಸಿರಾಟ ಹಾಗೂ ಹೃದಯ ಬಡಿತ ಸಂಪೂರ್ಣ ಸ್ಥಗಿತಗೊಂಡಿತು. ತಕ್ಷಣವೇ ನರ್ಸ್ಗಳು ಸಿಪಿಆರ್ (CPR) ಆರಂಭಿಸಿದರು. ಕಂಗಾಲಾದ ಪತಿ ಆಂಥೋನಿ ವೈದ್ಯರನ್ನು ವಿಚಾರಿಸಿದಾಗ, “ನಿಮ್ಮ ಪತ್ನಿ ತಾಂತ್ರಿಕವಾಗಿ ಮೃತಪಟ್ಟಿದ್ದಾರೆ (Expired)” ಎಂಬ ಆಘಾತಕಾರಿ ಸುದ್ದಿ ಸಿಕ್ಕಿತು. ನಿಕೋಲ್ ಅವರ ಹೃದಯ ಬರೋಬ್ಬರಿ 45 ನಿಮಿಷಗಳ ಕಾಲ ನಿಂತೇ ಹೋಗಿತ್ತು!
ಏನಿದು ‘ಅಮ್ನಿಯೋಟಿಕ್ ಫ್ಲೂಯಿಡ್ ಎಂಬಾಲಿಸಮ್’ ?
ನಿಕೋಲ್ ಅವರಿಗೆ ಎದುರಾಗಿದ್ದು ಅತ್ಯಂತ ಅಪರೂಪದ ಹಾಗೂ ಮಾರಣಾಂತಿಕವಾದ ‘ಅಮ್ನಿಯೋಟಿಕ್ ಫ್ಲೂಯಿಡ್ ಎಂಬಾಲಿಸಮ್’ (Amniotic Fluid Embolism – AFE) ಎಂಬ ಸ್ಥಿತಿ.
ಗರ್ಭದಲ್ಲಿ ಮಗುವನ್ನು ಸುತ್ತುವರಿದಿರುವ ದ್ರವವು (Amniotic Fluid) ಅನಿರೀಕ್ಷಿತವಾಗಿ ತಾಯಿಯ ರಕ್ತನಾಳವನ್ನು ಪ್ರವೇಶಿಸಿದಾಗ ತೀವ್ರ ಅಲರ್ಜಿಕ್ ರಿಯಾಕ್ಷನ್ ಉಂಟಾಗಿ ಹೃದಯಾಘಾತ ಮತ್ತು ಅಂಗಾಂಗಗಳ ವೈಫಲ್ಯ ಸಂಭವಿಸುತ್ತದೆ. ಇದು ಲಕ್ಷ ಹೆರಿಗೆಗಳಲ್ಲಿ ಕೇವಲ 6 ಮಹಿಳೆಯರಲ್ಲಿ ಮಾತ್ರ ಕಂಡುಬರುವ ಅತ್ಯಂತ ಜಟಿಲ ಕಾಯಿಲೆಯಾಗಿದ್ದು, ಹೆರಿಗೆ ಸಮಯದಲ್ಲಿ ಸಂಭವಿಸುವ ಹೃದಯಾಘಾತಗಳಿಗೆ ಇದು ಪ್ರಮುಖ ಕಾರಣವಾಗಿದೆ.
ಮರಣೋತ್ತರ ಸಿ-ಸೆಕ್ಷನ್ ಮತ್ತು ಪವಾಡಸದೃಶ ಮರುಜೀವ:
ತಾಯಿ ಈಗಾಗಲೇ ಮೃತಪಟ್ಟಿದ್ದಾರೆ ಎಂದು ಭಾವಿಸಿದ ವೈದ್ಯರ ತಂಡ, ಗರ್ಭದಲ್ಲಿರುವ ಕಂದಮ್ಮನನ್ನಾದರೂ ಉಳಿಸಿಕೊಳ್ಳಲು ತಕ್ಷಣವೇ ಆಕೆಯನ್ನು ಆಪರೇಷನ್ ಥಿಯೇಟರ್ಗೆ ಸಾಗಿಸಿ ‘ಪೋಸ್ಟ್ಮಾರ್ಟಮ್ ಸಿ-ಸೆಕ್ಷನ್’ (Postmortem C-section) ಶಸ್ತ್ರಚಿಕಿತ್ಸೆಗೆ ಮುಂದಾಯಿತು.
ಒಂದೆಡೆ ಮಗುವನ್ನು ಹೊರತೆಗೆಯುವ ಕಾರ್ಯಾಚರಣೆ ನಡೆಯುತ್ತಿದ್ದರೆ, ಮತ್ತೊಂದೆಡೆ ವೈದ್ಯರ ಮತ್ತೊಂದು ತಂಡ ನಿಕೋಲ್ ಅವರ ಎದೆಯನ್ನು ಅದುಮಿ, ವಿದ್ಯುತ್ ಶಾಕ್ ಹಾಗೂ ಔಷಧಗಳನ್ನು ನೀಡಿ ಬದುಕಿಸಲು ಕೊನೆಯ ಹಂತದ ಪ್ರಯತ್ನ ನಡೆಸಿತು. ಬರೋಬ್ಬರಿ 45 ನಿಮಿಷಗಳ ನಿರಂತರ ಹೋರಾಟದ ಬಳಿಕ, ವೈದ್ಯಕೀಯ ಲೋಕವೇ ನಿಬ್ಬೆರಗಾಗುವಂತೆ ನಿಕೋಲ್ ಅವರ ನಾಡಿಮಿಡಿತ ಮರಳಿ ಬಂತು!
ಮಗು ಉಳಿಯಿತು, ಆದರೆ ಗರ್ಭಕೋಶ ಕಳೆದುಕೊಂಡ ತಾಯಿ:
ಮಗು ಸುರಕ್ಷಿತವಾಗಿ ಜನಿಸಿತಾದರೂ, ನಿಕೋಲ್ಗೆ ಮತ್ತೊಂದು ಭಾರಿ ಗಂಡಾಂತರ ಎದುರಾಯಿತು. ಹೆರಿಗೆಯ ಬಳಿಕ ಗರ್ಭಕೋಶ ಸಂಕುಚಿತಗೊಳ್ಳದೆ ತೀವ್ರ ರಕ್ತಸ್ರಾವ (Massive Hemorrhage) ಆರಂಭವಾಯಿತು. ರಕ್ತಸ್ರಾವ ಎಷ್ಟಿತ್ತೆಂದರೆ ಆಕೆಯ ಜೀವ ಉಳಿಸುವುದೇ ಕಷ್ಟವಾಗಿತ್ತು. ರಕ್ತವನ್ನು ತಡೆದು ಜೀವ ಉಳಿಸಲು ವೈದ್ಯರು ಅನಿವಾರ್ಯವಾಗಿ ನಿಕೋಲ್ ಅವರ ಗರ್ಭಕೋಶವನ್ನು (Uterus) ಶಸ್ತ್ರಚಿಕಿತ್ಸೆ ಮೂಲಕ ಸಂಪೂರ್ಣವಾಗಿ ತೆಗೆದುಹಾಕಬೇಕಾಯಿತು.
ಒಂದು ವಾರದ ತೀವ್ರ ನಿಗಾ ಘಟಕದ ಚಿಕಿತ್ಸೆಯ ನಂತರ ನಿಕೋಲ್ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ. ತಾನು ಸತ್ತು ಮತ್ತೆ ಬದುಕಿ ಬಂದ ಅನುಭವ ತಮ್ಮ ಇಡೀ ಜೀವನದ ದೃಷ್ಟಿಕೋನವನ್ನೇ ಬದಲಿಸಿದೆ ಎಂದಿರುವ ಅವರು, ಈ ಹೊಸ ಬದುಕನ್ನು ತನ್ನ ಕಂದಮ್ಮನ ಜೊತೆ ಪೂರ್ಣವಾಗಿ ಅನುಭವಿಸಲು ನಿರ್ಧರಿಸಿದ್ದಾರೆ.
