ಟೆಕ್ನಿಕಲ್ ಅಪ್‌ಗ್ರೇಡ್ ಹೆಸರಿನಲ್ಲಿ ನೌಕರರ ಭವಿಷ್ಯ ನಿಧಿ ಸಂಸ್ಥೆ (EPFO) ಮಾಡಿದ ಒಂದು ಎಡವಟ್ಟು, ಈಗ ದೇಶದ ಲಕ್ಷಾಂತರ ಉದ್ಯೋಗಿಗಳ ಪಾಲಿಗೆ ಡಿಜಿಟಲ್ ನರಕವಾಗಿ ಮಾರ್ಪಟ್ಟಿದೆ ಕಳೆದ ಕೆಲವು ದಿನಗಳಿಂದ ಇಪಿಎಫ್‌ಒ ಸರ್ವರ್ ಸಂಪೂರ್ಣವಾಗಿ ಸ್ಥಗಿತಗೊಂಡಿದ್ದು, ತುರ್ತು ವೈದ್ಯಕೀಯ ವೆಚ್ಚ ಹಾಗೂ ಕೌಟುಂಬಿಕ ಅಗತ್ಯಗಳಿಗಾಗಿ ತಮ್ಮದೇ ಸ್ವಂತ ದುಡಿಮೆಯ ಹಣವನ್ನು ಹಿಂಪಡೆಯಲಾಗದೆ ಸಾರ್ವಜನಿಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಬ್ಯಾಂಕ್ ಖಾತೆಯಲ್ಲಿ ಲಕ್ಷಾಂತರ ರೂಪಾಯಿ ಹಣವಿದ್ದರೂ, ಆಸ್ಪತ್ರೆಯ ಬೆಡ್ ಮೇಲೆ ಸಾವು-ಬದುಕಿನ ನಡುವೆ ಹೋರಾಡುತ್ತಿರುವ ಸಾರ್ವಜನಿಕರಿಗೆ ಇಪಿಎಫ್‌ಒನ ಈ ತಾಂತ್ರಿಕ ಲೋಪ ಭಾರೀ ಹೊಡೆತ ನೀಡಿದೆ.
3 ದಿನದ ಮೆಡಿಕಲ್ ಅಡ್ವಾನ್ಸ್ 20 ದಿನವಾದರೂ ಪ್ರೊಸೆಸ್ ಆಗ್ತಿಲ್ಲ
ಯಾರಾದರೂ ವೈದ್ಯಕೀಯ ತುರ್ತು ಪರಿಸ್ಥಿತಿಯಲ್ಲಿದ್ದರೆ, ನಿಯಮಗಳ ಪ್ರಕಾರ ಇಪಿಎಫ್‌ಒ ಮೆಡಿಕಲ್ ಅಡ್ವಾನ್ಸ್ ಹಣವು 3 ರಿಂದ 4 ದಿನಗಳಲ್ಲಿ ಕೈ ಸೇರಬೇಕು. ಆದರೆ, ಸದ್ಯ ಸರ್ವರ್ ಕುಸಿತದಿಂದಾಗಿ ಇಂತಹ ಎಮರ್ಜೆನ್ಸಿ ರಿಕ್ವೆಸ್ಟ್‌ಗಳು ಕೂಡ ಕಳೆದ 15 ರಿಂದ 20 ದಿನಗಳಿಂದ ಯಾವುದೇ ಸ್ಟೇಟಸ್ ಅಪ್ಡೇಟ್ ಇಲ್ಲದೆ ಅಂಡರ್ ಪ್ರೊಸೆಸ್ (Under Process) ಅಂತಲೇ ತೋರಿಸುತ್ತಿವೆ. ಆಸ್ಪತ್ರೆಯ ಬೆಡ್ ಮೇಲೆ ಸಾವು-ಬದುಕಿನ ನಡುವೆ ಹೋರಾಡುತ್ತಿರುವ ಸಾರ್ವಜನಿಕರು ಗಂಟೆಗಳ ಲೆಕ್ಕದಲ್ಲಿ ಕಾಯುತ್ತಿದ್ದಾರೆಯೇ ಹೊರತು ಇಪಿಎಫ್‌ಒಗೆ ದಿನಗಳ ಬೆಲೆಯೂ ಗೊತ್ತಿಲ್ಲದಂತಾಗಿದೆ.
ಸಾರ್ವಜನಿಕರ ನಂಬಿಕೆಗೆ ಬಿದ್ದ ಅತಿ ದೊಡ್ಡ ಪೆಟ್ಟು ಎಂದರೆ ಇಪಿಎಫ್‌ಒನ ಅಧಿಕೃತ ಕುಂದುಕೊರತೆ ಪೋರ್ಟಲ್ ಆದ EPFiGMS ಮತ್ತು ಕೇಂದ್ರ ಸರ್ಕಾರದ CPGRAMS ವ್ಯವಸ್ಥೆಗಳ ಸಂಪೂರ್ಣ ವೈಫಲ್ಯ. ತೊಂದರೆಗೆ ಸಿಲುಕಿದ ಜನರು ಇಲ್ಲಿ ದೂರು ದಾಖಲಿಸಿದರೆ, ಇಲಾಖೆಯಿಂದ ಕೇವಲ ಆಟೋಮೇಟೆಡ್ (ಖುದ್ದಾಗಿ ಪರಿಶೀಲಿಸದ), ಕಾಪಿ-ಪೇಸ್ಟ್ ಮಾಡಿದ ಬೇಜವಾಬ್ದಾರಿ ಅಧಿಕಾರಶಾಹಿ ಉತ್ತರಗಳು ಬರುತ್ತಿವೆಯೇ ಹೊರತು ಯಾವುದೇ ಗಟ್ಟಿ ಪರಿಹಾರ ಸಿಗುತ್ತಿಲ್ಲ.
ಅಧಿಕೃತ ಚಾನೆಲ್‌ಗಳಿಂದ ಯಾವುದೇ ಸ್ಪಂದನೆ ಸಿಗದ ಕಾರಣ, ಬೇಸತ್ತ ಗ್ರಾಹಕರು ಇಪಿಎಫ್‌ಒನ ಅಧಿಕೃತ ಸೋಶಿಯಲ್ ಮೀಡಿಯಾ ಖಾತೆಗಳ ಕಾಮೆಂಟ್ ಬಾಕ್ಸ್‌ನಲ್ಲಿ ತಮ್ಮ ಯುಎನ್ (UAN) ನಂಬರ್, ಮೆಂಬರ್ ಐಡಿ ಮತ್ತು ಫೋನ್ ನಂಬರ್‌ಗಳಿರುವ ಸ್ಕ್ರೀನ್‌ಶಾಟ್‌ಗಳನ್ನು ನೇರವಾಗಿ ಪೋಸ್ಟ್ ಮಾಡುತ್ತಿದ್ದಾರೆ. ಕೇವಲ ಒಬ್ಬ ಹ್ಯೂಮನ್ ಆಫೀಸರ್ ಗಮನ ಸೆಳೆಯಲು ಹೋಗಿ ಜನರು ತಮ್ಮ ಅತ್ಯಂತ ರಹಸ್ಯವಾದ ವೈಯಕ್ತಿಕ ಮಾಹಿತಿಯನ್ನು ಇಂಟರ್ನೆಟ್‌ನಲ್ಲಿ ಸಾರ್ವಜನಿಕವಾಗಿ ತೆರೆದಿಡುತ್ತಿರುವುದು ಪರಿಸ್ಥಿತಿಯ ಗಂಭೀರತೆಗೆ ಹಿಡಿದ ಕನ್ನಡಿಯಾಗಿದೆ.
ಉದ್ಯೋಗಿಗಳ ನೇರ ಪ್ರಶ್ನೆ:
“ಪ್ರತಿ ತಿಂಗಳು ನಮ್ಮ ಸಂಬಳದಿಂದ ಪಿಎಫ್ ಹಣ ಕಟ್ ಆಗುವಾಗ ಒಂದು ಸೆಕೆಂಡ್ ಕೂಡ ತಡವಾಗುವುದಿಲ್ಲ. ಆದರೆ, ನಮಗೆ ಅತ್ಯಂತ ಸಂಕಷ್ಟವಿರುವಾಗ ನಮ್ಮದೇ ಸ್ವಂತ ದುಡಿಮೆಯ ಹಣವನ್ನು ಹಿಂಪಡೆಯಲು ನಾವು ಡಿಜಿಟಲ್ ಭಿಕ್ಷುಕರಂತೆ ಅಲೆಯಬೇಕೇ?” ಎಂದು ಇಪಿಎಫ್‌ಒನ ನೈತಿಕತೆಯನ್ನು ಉದ್ಯೋಗಿಗಳು ಪ್ರಶ್ನಿಸುತ್ತಿದ್ದಾರೆ.
ಆಫೀಸ್‌ಗಳಿಗೆ ಅಲೆದಾಡಿದರೂ ಪ್ರಯೋಜನವಿಲ್ಲ:
ವೆಬ್‌ಸೈಟ್ ಕೆಲಸ ಮಾಡದ ಕಾರಣ ಇಪಿಎಫ್‌ಒ ಪ್ರಾದೇಶಿಕ ಕಚೇರಿಗಳಿಗೆ ಭೌತಿಕವಾಗಿ ಭೇಟಿ ನೀಡುತ್ತಿರುವ ಸಾರ್ವಜನಿಕರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ. ಆದರೆ, ಬ್ಯಾಕೆಂಡ್ ಸರ್ವರ್‌ಗಳೇ ಸ್ಥಗಿತಗೊಂಡಿರುವುದರಿಂದ ಅಲ್ಲಿನ ಸ್ಥಳೀಯ ಅಧಿಕಾರಿಗಳ ಕೈಗಳೂ ಕಟ್ಟಿಹಾಕಿದಂತಾಗಿವೆ.
ಹೊಸ ವ್ಯವಸ್ಥೆಗೆ ಶಿಫ್ಟ್ ಆಗಿ ಇಡೀ ಎರಡು ವಾರಗಳು ಕಳೆದಿದ್ದರೂ, ಹಳೆಯ ಸಿಸ್ಟಮ್‌ಗಿಂತಲೂ ಈಗಿನ ಸಿಸ್ಟಮ್ ಅತ್ಯಂತ ನಿಧಾನಗತಿಯಲ್ಲಿ ಸಾಗುತ್ತಿದೆ. ತಾಂತ್ರಿಕ ತಂಡಗಳು ಇದನ್ನು ಕೇವಲ ಡೌನ್‌ಟೈಮ್ ಎಂದು ಕರೆಯುತ್ತಿರಬಹುದು, ಆದರೆ ಬಡ ಮತ್ತು ಮಧ್ಯಮ ವರ್ಗದ ಕಾರ್ಮಿಕರಿಗೆ ಇದು ಬದುಕಿನ ಪ್ರಶ್ನೆಯಾಗಿದೆ. ಒಟ್ಟಾರೆಯಾಗಿ, ಭಾರತದ ಶ್ರಮಿಕ ವರ್ಗ ಮತ್ತು ಅವರ ಜೀವಿತಾವಧಿಯ ಉಳಿತಾಯವನ್ನು ಕಾಯುವ ಇಪಿಎಫ್‌ಒ ಸಂಸ್ಥೆಯ ನಡುವಿನ ನಂಬಿಕೆ ಸದ್ಯ ಸಂಪೂರ್ಣವಾಗಿ ತಳ ಮುಟ್ಟಿದೆ.
