ಬಾಲಿವುಡ್‌ನ ಹಿಟ್ ಫ್ರಾಂಚೈಸಿಗಳಲ್ಲಿ ಒಂದಾದ ‘ದೃಶ್ಯಂ’ ಸರಣಿಯ ಕೊನೆಯ ಭಾಗ ‘ದೃಶ್ಯಂ 3’ (ದೃಶ್ಯಂ ದಿ ಕನ್‌ಕ್ಲೂಷನ್) ಸಿನಿಮಾದ ಕುತೂಹಲಕಾರಿ ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆಯಾಗಿದೆ. ನಟ ಅಜಯ್ ದೇವಗನ್ ಮತ್ತೊಮ್ಮೆ ‘ವಿಜಯ್ ಸಾಲ್ಗಾಂವ್ಕರ್’ ಎಂಬ ಚಾಲಾಕಿ ಹಾಗೂ ಕುಟುಂಬಪ್ರೇಮಿ ಪಾತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದ್ದಾರೆ.
ಚಿತ್ರತಂಡ ಹಂಚಿಕೊಂಡಿರುವ ನೂತನ ಪೋಸ್ಟರ್‌ನಲ್ಲಿ ಅಜಯ್ ದೇವಗನ್ ವಿಂಡೋ ಗ್ಲಾಸ್‌ನಿಂದ ಹೊರಗೆ ನೋಡುತ್ತಿರುವ ತೀವ್ರ ಗಂಭೀರ ನೋಟದ ಪೋಸ್ ಗಮನಸೆಳೆಯುತ್ತಿದೆ. ಹಿನ್ನೆಲೆಯಲ್ಲಿ ಪೊಲೀಸ್ ವಾಹನದ ಸೈರನ್ ಬೆಳಕು ಕಾಣಿಸುತ್ತಿದ್ದು, ಕಥೆಯಲ್ಲಿನ ಸಸ್ಪೆನ್ಸ್ ಅನ್ನು ಸೂಚಿಸುವಂತಿದೆ. “ಸರಿಯೋ ತಪ್ಪೋ ಏನೇ ಇರಲಿ, ನನ್ನ ಕುಟುಂಬಕ್ಕಾಗಿ ನಾನು ಯಾವುದೇ ಮೇರೆ ದಾಟಲು ಸಿದ್ಧ” ಎಂಬ ಶೀರ್ಷಿಕೆಯೊಂದಿಗೆ ಈ ಪೋಸ್ಟರ್ ಹಂಚಿಕೊಳ್ಳಲಾಗಿದೆ. ಈ ಚಿತ್ರವು ಅಕ್ಟೋಬರ್ 2ರಂದು ಚಿತ್ರಮಂದಿರಗಳಲ್ಲಿ ತೆರೆಕಾಣಲಿದೆ.
ಚಿತ್ರದ ಟೀಸರ್‌ನಲ್ಲಿ ಬಂದಿರುವ ಹಿನ್ನೆಲೆ ಧ್ವನಿಯಲ್ಲಿ, “ಪ್ರಪಂಚ ನನ್ನನ್ನು ಅಪರಾಧಿ, ಕೊಲೆಗಾರ, ಮಾಸ್ಟರ್ ಮೈಂಡ್ ಅಥವಾ ಹೀರೋ ಎಂದು ಹೇಗೆ ಬೇಕಾದರೂ ಕರೆಯಲಿ. ನನಗೆ ನನ್ನ ಕುಟುಂಬವೇ ಸತ್ಯ. ಅವರು ಸೋಲುವವರೆಗೆ ನಾನು ಅವರ ರಕ್ಷಣೆಗೆ ಗೋಡೆಯಂತೆ ನಿಲ್ಲುತ್ತೇನೆ” ಎಂಬ ಸಂಭಾಷಣೆ ಅಭಿಮಾನಿಗಳಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.
ಅಭಿಷೇಕ್ ಪಾಠಕ್ ನಿರ್ದೇಶನದ ಈ ಚಿತ್ರವನ್ನು ಸ್ಟಾರ್ ಸ್ಟುಡಿಯೋ18 ಮತ್ತು ಪನೋರಮಾ ಸ್ಟುಡಿಯೋಸ್ ಜಂಟಿಯಾಗಿ ನಿರ್ಮಿಸುತ್ತಿವೆ. ಅಜಯ್ ದೇವಗನ್ ಜೊತೆಗೆ ಟಬು ಮತ್ತು ಶ್ರಿಯಾ ಶರಣ್ ತಮ್ಮ ಹಳೆಯ ಪಾತ್ರಗಳನ್ನು ಮುಂದುವರಿಸಲಿದ್ದು, ಈ ಬಾರಿ ಪ್ರಕಾಶ್ ರಾಜ್ ಹಾಗೂ ಜೈದೀಪ್ ಅಹ್ಲಾವತ್ ಹೊಸ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
