ಮೋಹನ್ಲಾಲ್ ನಟನೆಯ ಬಹುನಿರೀಕ್ಷಿತ ‘ದೃಶ್ಯಂ 3’ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ತನ್ನ ಭರ್ಜರಿ ಪ್ರದರ್ಶನವನ್ನು ಮುಂದುವರಿಸಿದೆ. ಬಿಡುಗಡೆಯಾದ ಮೊದಲ ಬುಧವಾರ ಅಂದರೆ 7ನೇ ದಿನದಂದು ಚಿತ್ರದ ಕಲೆಕ್ಷನ್ನಲ್ಲಿ ಅಲ್ಪ ಪ್ರಮಾಣದ ಬೆಳವಣಿಗೆ ಕಂಡುಬಂದಿದೆ. ವಾರದ ಆರಂಭದ ದಿನಗಳಲ್ಲಿ ಕಲೆಕ್ಷನ್ ಕೊಂಚ ಕುಸಿತ ಕಂಡಿದ್ದರೂ, ಬುಧವಾರದ ಗಳಿಕೆಯಲ್ಲಿ ಏರಿಕೆ ಕಾಣುವ ಮೂಲಕ ಈ ಫ್ರಾಂಚೈಸಿ ಮೇಲಿನ ಪ್ರೇಕ್ಷಕರ ಕ್ರೇಜ್ ಇನ್ನೂ ಕಮ್ಮಿಯಾಗಿಲ್ಲ ಎಂಬುದನ್ನು ಸಾಬೀತುಪಡಿಸಿದೆ.
ಚಿತ್ರರಂಗದ ಬಾಕ್ಸ್ ಆಫೀಸ್ ವಿಶ್ಲೇಷಕರ ಪ್ರಕಾರ, ದೃಶ್ಯಂ 3 ಸಿನಿಮಾ ಭಾರತದಾದ್ಯಂತ 7ನೇ ದಿನದಂದು 4,721 ಶೋಗಳಿಂದ ಒಟ್ಟು 6.65 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡಿದೆ. ಇದು ಮಂಗಳವಾರದ ಗಳಿಕೆಗೆ ಹೋಲಿಸಿದರೆ ಶೇಕಡಾ 2.3 ರಷ್ಟು ಹೆಚ್ಚಿನ ಬೆಳವಣಿಗೆಯಾಗಿದೆ. ಇದರೊಂದಿಗೆ ಸಿನಿಮಾ ಭಾರತದಲ್ಲಿ ಒಟ್ಟು 75.30 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡಿದ್ದು, ಭಾರತದ ಒಟ್ಟು ಗ್ರಾಸ್ ಕಲೆಕ್ಷನ್ 87.38 ಕೋಟಿ ರೂಪಾಯಿ ತಲುಪಿದೆ.
ಭಾರತ ಮಾತ್ರವಲ್ಲದೆ ವಿದೇಶಗಳಲ್ಲೂ ಈ ಸಿನಿಮಾ ಭರ್ಜರಿ ಕಮಾಯಿ ಮಾಡುತ್ತಿದೆ. 7ನೇ ದಿನದಂದು ವಿದೇಶಿ ಮಾರುಕಟ್ಟೆಯಿಂದಲೇ 5 ಕೋಟಿ ರೂಪಾಯಿ ಗಳಿಸಿದೆ. ಇದರೊಂದಿಗೆ ಚಿತ್ರದ ಒಟ್ಟು ಅಂತರರಾಷ್ಟ್ರೀಯ ಗ್ರಾಸ್ ಕಲೆಕ್ಷನ್ 95.70 ಕೋಟಿ ರೂಪಾಯಿಗೆ ತಲುಪಿದೆ. ಒಟ್ಟಾರೆಯಾಗಿ ಬಿಡುಗಡೆಯಾದ ಕೇವಲ ಏಳು ದಿನಗಳಲ್ಲಿ ದೃಶ್ಯಂ 3 ವಿಶ್ವದಾದ್ಯಂತ ಬರೋಬ್ಬರಿ 183.08 ಕೋಟಿ ರೂಪಾಯಿ ಗ್ರಾಸ್ ಕಲೆಕ್ಷನ್ ಮಾಡುವ ಮೂಲಕ ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸಿದೆ.
ಬುಧವಾರದ ಕಲೆಕ್ಷನ್ನಲ್ಲಿ ಮೂಲ ಮಲಯಾಳಂ ಆವೃತ್ತಿಯೇ ಸಿಂಹಪಾಲು ಪಡೆದಿದ್ದು, 5.85 ಕೋಟಿ ರೂಪಾಯಿ ಗಳಿಸಿದೆ. ಇದರ ತೆಲುಗು ಆವೃತ್ತಿ 50 ಲಕ್ಷ ರೂಪಾಯಿ, ತಮಿಳು ಆವೃತ್ತಿ 20 ಲಕ್ಷ ರೂಪಾಯಿ ಹಾಗೂ ಕನ್ನಡ ಆವೃತ್ತಿ 10 ಲಕ್ಷ ರೂಪಾಯಿಗಳನ್ನು ಒಟ್ಟು ಗಳಿಕೆಗೆ ಸೇರಿಸಿದೆ. ಸುಮಾರು 100 ಕೋಟಿ ರೂಪಾಯಿ ಭಾರಿ ಬಜೆಟ್ನಲ್ಲಿ ನಿರ್ಮಾಣವಾಗಿರುವ ಈ ಸಿನಿಮಾ ಈಗಾಗಲೇ ತನ್ನ ನಿರ್ಮಾಣ ವೆಚ್ಚದ ಬಹುಪಾಲು ಹಣವನ್ನು ವಾಪಸ್ ಪಡೆದಿದೆ. ಸಿನಿಮಾ ಬ್ಲಾಕ್ಬಸ್ಟರ್ ಪಟ್ಟಕ್ಕೆ ಏರಬೇಕಾದರೆ ಎರಡನೇ ವಾರಾಂತ್ಯದಲ್ಲೂ ಇದೇ ರೀತಿಯ ಸ್ಥಿರ ಕಲೆಕ್ಷನ್ ಕಾಯ್ದುಕೊಳ್ಳಬೇಕಿದೆ ಎಂದು ಸಿನಿಮಾ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
