ಒಂದು ಕಾಲದಲ್ಲಿ ‘ಸಾಫ್ಟ್ವೇರ್ ಇಂಜಿನಿಯರ್’ ಎಂದರೆ ಸಮಾಜದಲ್ಲಿ ಭಾರಿ ಗೌರವ, ಲಕ್ಷ ಲಕ್ಷ ಸಂಬಳದ ಉದ್ಯೋಗ ಎಂಬ ಕಾಲವಿತ್ತು. ಆದರೆ ಕಾಲ ಬದಲಾಗಿದೆ ! ಈಗ ಐಟಿ ಕ್ಷೇತ್ರದಲ್ಲಿ ಕೆರಿಯರ್ ಆರಂಭಿಸುತ್ತಿರುವ ಫ್ರೆಶರ್ಗಳಿಗಿಂತಲೂ, ನೈಪುಣ್ಯ ಹೊಂದಿರುವ ಗೃಹ ಕಾರ್ಮಿಕರು (Domestic Workers) ಮತ್ತು ಕ್ಲೀನಿಂಗ್ ಸೇವೆ ನೀಡುವವರೇ ಹೆಚ್ಚು ಸಂಪಾದಿಸುತ್ತಿದ್ದಾರೆ ಎಂಬ ಆಘಾತಕಾರಿ ಹಾಗೂ ಕುತೂಹಲಕಾರಿ ವಿಷಯವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಇಂಜಿನಿಯರಿಂಗ್ ಪದವಿಗಿಂತ ಕೌಶಲ್ಯವೇ ಹಣ ತಂದುಕೊಡುತ್ತದೆ ಎಂಬುದಕ್ಕೆ ಈ ವರದಿ ಸಾಕ್ಷಿಯಾಗಿದೆ.
ಹೌದು. ಭಾರತದಲ್ಲಿ ಐಟಿ ಫ್ರೆಶರ್ಗಳಿಗಿಂತ ಗೃಹ ಕಾರ್ಮಿಕರು ಮತ್ತು ಸಣ್ಣ ವ್ಯಾಪಾರಿಗಳೇ ಹೆಚ್ಚು ಸಂಪಾದಿಸುತ್ತಿದ್ದಾರೆ ಎಂಬ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಮಾರುಕಟ್ಟೆಯಲ್ಲಿ ‘ಮೌಲ್ಯ ಸೃಷ್ಟಿ’ (Value Creation) ಎಷ್ಟು ಮುಖ್ಯ ಎಂಬ ಬಗ್ಗೆ ನೆಟಿಜನ್ಗಳು ಆಸಕ್ತಿದಾಯಕ ಕಾಮೆಂಟ್ ಮಾಡುತ್ತಿದ್ದಾರೆ.
ಕ್ಲೀನಿಂಗ್ ಮಾಡುತ್ತಾ ತಿಂಗಳಿಗೆ 40 ಸಾವಿರ ಸಂಪಾದನೆ!
ಭಾರತದಲ್ಲಿ ಪ್ರಸ್ತುತ ಉದ್ಯೋಗ ಮತ್ತು ಆದಾಯದ ಬಗ್ಗೆ ಕುತೂಹಲಕಾರಿ ಚರ್ಚೆ ನಡೆಯುತ್ತಿದೆ. ಒಂದು ಕಾಲದಲ್ಲಿ ವೈಟ್ ಕಾಲರ್ ಉದ್ಯೋಗಗಳು, ವಿಶೇಷವಾಗಿ ಐಟಿ ಕ್ಷೇತ್ರದಲ್ಲಿ ಕೆಲಸ ಮಾಡುವವರಿಗೇ ಭಾರಿ ಸಂಬಳ ಇರುತ್ತದೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ, ಬದಲಾಗುತ್ತಿರುವ ಕಾಲದಲ್ಲಿ ಸಾಂಪ್ರದಾಯಿಕ ಸೇವಾ ವಲಯಗಳು ಮತ್ತು ಸಣ್ಣ ವ್ಯವಹಾರಗಳು ಕಾರ್ಪೊರೇಟ್ ಉದ್ಯೋಗಿಗಳಿಗಿಂತ ಹೆಚ್ಚು ಆದಾಯವನ್ನು ನೀಡುತ್ತಿವೆ ಎಂದು ಇತ್ತೀಚಿನ ಚರ್ಚೆಗಳು ಸಾಬೀತುಪಡಿಸುತ್ತಿವೆ. ಐಟಿ ಫ್ರೆಶರ್ಗಳಿಗಿಂತ ಗೃಹ ಕಾರ್ಮಿಕರು (Domestic Maids) ಉತ್ತಮ ಆದಾಯ ಹೊಂದಿರುವುದು ಎಲ್ಲರನ್ನೂ ಆಶ್ಚರ್ಯಕ್ಕೆ ಗುರಿಪಡಿಸಿದೆ.
ವರ್ಷಕ್ಕೆ 4.8 ಲಕ್ಷ ರೂಪಾಯಿ ಆದಾಯ.. ಹೊಸ ಟ್ರೆಂಡ್ ಗುರು!
ಸಾಮಾಜಿಕ ಜಾಲತಾಣ ‘X’ ನಲ್ಲಿ ಮಹಿಳೆಯೊಬ್ಬರು ಹಂಚಿಕೊಂಡ ಪೋಸ್ಟ್ ಹೊಸ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ. ಗೃಹ ಕಾರ್ಮಿಕರು ಈಗ ಕೇವಲ ಕೆಲಸದವರಾಗಿ ಉಳಿಯದೆ, ಉದ್ಯಮಿಗಳಾಗಿ (Entrepreneurs) ಬದಲಾಗುತ್ತಿದ್ದಾರೆ ಎಂದು ಅವರು ಉಲ್ಲೇಖಿಸಿದ್ದಾರೆ. ಮನೆಕೆಲಸದ ಸೇವೆಗಳನ್ನು ಒದಗಿಸುವ ‘ಸ್ನ್ಯಾಬಿಟ್’ (Snabbit) ನಂತಹ ಪ್ಲಾಟ್ಫಾರ್ಮ್ಗಳಲ್ಲಿ ಕೆಲಸ ಮಾಡುವ ಕ್ಲೀನಿಂಗ್ ಕಾರ್ಮಿಕರು ತಿಂಗಳಿಗೆ ಸುಮಾರು 40,000 ರೂಪಾಯಿಗಳವರೆಗೆ ಸಂಪಾದಿಸುತ್ತಿದ್ದಾರೆ ಎಂದು ಅವರು ಬಹಿರಂಗಪಡಿಸಿದ್ದಾರೆ. ಅಂದರೆ ಇವರ ವಾರ್ಷಿಕ ಆದಾಯ ಸುಮಾರು 4.8 ಲಕ್ಷ ರೂಪಾಯಿಗಳು. ಇದು ಇಂದು ಐಟಿ ಕ್ಷೇತ್ರದಲ್ಲಿ ಸೇರುತ್ತಿರುವ ಅನೇಕ ಫ್ರೆಶರ್ಗಳ ಸಂಬಳಕ್ಕಿಂತ ಹೆಚ್ಚಾಗಿರುವುದು ಗಮನಾರ್ಹ.
ಬಗ್ ಸಾಲ್ವಿಂಗ್ (Bug Solving) ವರ್ಸಸ್ ಬಗ್ ಕ್ಲೀನಿಂಗ್
ಆ ಪೋಸ್ಟ್ನಲ್ಲಿನ ಒಂದು ಕಾಮೆಂಟ್ ವೈರಲ್ ಆಗುತ್ತಿದೆ: “ನಿಜವಾದ ಹಣ ಸಾಫ್ಟ್ವೇರ್ ಬಗ್ಗಳನ್ನು ಸಾಲ್ವ್ ಮಾಡುವುದರಲ್ಲಿ ಇಲ್ಲ, ಮನೆಯೊಳಗಿನ ಬಗ್ಗಳಾದ ಧೂಳು, ಕಸವನ್ನು ಕ್ಲೀನ್ ಮಾಡುವುದರಲ್ಲಿದೆ.” ಪದವೀಧರ ಇಂಜಿನಿಯರ್ಗಳು ಉದ್ಯೋಗಕ್ಕಾಗಿ ಹುಡುಕಾಡುತ್ತಿದ್ದರೆ, ಕೌಶಲ್ಯ ಹೊಂದಿರುವ ಸೇವಾ ವಲಯದ ಕಾರ್ಮಿಕರು ಸ್ಥಿರವಾದ ಮತ್ತು ಗೌರವಾನ್ವಿತ ಆದಾಯವನ್ನು ಪಡೆಯುತ್ತಿದ್ದಾರೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇದಕ್ಕೆ ಉದಾಹರಣೆಯಾಗಿ ಟೀ ಮಾರುತ್ತಾ ಜಗತ್ತಿನಾದ್ಯಂತ ಗುರುತಿಸಿಕೊಂಡ ‘ಡಾಲಿ ಚಾಯ್ವಾಲಾ’ ಅವರನ್ನು ಅವರು ಪ್ರಸ್ತಾಪಿಸಿದ್ದಾರೆ.
ಮೌಲ್ಯ ಸೃಷ್ಟಿಸುವುದೇ ಮುಖ್ಯ
ಪ್ರಸ್ತುತ ಭಾರತದಲ್ಲಿ ‘ಜಾಬ್ ಟೈಟಲ್’ಗಿಂತ ನೀವು ಮಾರುಕಟ್ಟೆಯಲ್ಲಿ ಎಷ್ಟು ‘ಮೌಲ್ಯ’ (Value) ಸೃಷ್ಟಿಸುತ್ತಿದ್ದೀರಿ ಎಂಬುದು ಮುಖ್ಯವಾಗಿದೆ. ಕೇವಲ ಟೆಕ್ ಉದ್ಯೋಗಗಳನ್ನೇ ಶ್ರೇಷ್ಠವಾಗಿ ನೋಡುವ ಕಾಲ ಹೋಗಿದೆ. ಕ್ಲೀನಿಂಗ್ ಸರ್ವೀಸ್, ಫುಡ್ ಸ್ಟಾಲ್, ಟೀ ಬಿಸಿನೆಸ್ನಂತಹ ಸಣ್ಣ ವ್ಯಾಪಾರಗಳು ಕೂಡ ಅದ್ಭುತ ಆದಾಯವನ್ನು ನೀಡುತ್ತಿವೆ. ಸರಿಯಾದ ಕೌಶಲ್ಯವಿದ್ದರೆ ಯಾವುದೇ ಕ್ಷೇತ್ರದಲ್ಲಿ ಮಿಂಚಬಹುದು ಮತ್ತು ಪದವಿಗಳು ಮಾತ್ರ ಸಂಪಾದನೆಗೆ ಅಳತೆಗೋಲಲ್ಲ ಎಂಬುದನ್ನು ಈ ಉದಾಹರಣೆಗಳು ಸ್ಪಷ್ಟಪಡಿಸುತ್ತವೆ.
ನೆಟ್ಟಿಗರ ಪ್ರತಿಕ್ರಿಯೆ
ಈ ಪೋಸ್ಟ್ ಬಗ್ಗೆ ನೆಟಿಜನ್ಗಳು ಭಿನ್ನವಾಗಿ ಸ್ಪಂದಿಸುತ್ತಿದ್ದಾರೆ. “ಕೋಟಿಗಟ್ಟಲೆ ಇಂಜಿನಿಯರ್ಗಳಿದ್ದಾರೆ, ಆದರೆ ಗುಣಮಟ್ಟದ ಸೇವೆ ನೀಡುವ ಗೃಹ ಕಾರ್ಮಿಕರ ಕೊರತೆಯಿದೆ, ಹಾಗಾಗಿ ಡಿಮ್ಯಾಂಡ್ ಹೆಚ್ಚಿದೆ” ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬ ಬಳಕೆದಾರರು ತಮ್ಮ ಮನೆಯ ಅಡುಗೆ ಕೆಲಸದ ಮಹಿಳೆ ನಾಲ್ಕು ಮನೆಗಳಲ್ಲಿ ಕೆಲಸ ಮಾಡುತ್ತಾ ಭಾರಿ ಹಣ ಸಂಪಾದಿಸುತ್ತಿದ್ದಾರೆ ಮತ್ತು ಬಿಹಾರದಲ್ಲಿ ಸ್ವಂತ ಜಮೀನು ಕೂಡ ಖರೀದಿಸಿದ್ದಾರೆ ಎಂದು ಬರೆದುಕೊಂಡಿದ್ದಾರೆ.
