ಇಂದಿನ ಆಧುನಿಕ ಜೀವನಶೈಲಿಯಲ್ಲಿ ಸರಿಯಾದ ನಿದ್ರೆಯಿಲ್ಲದಿರುವುದು ಬಹುತೇಕರು ಎದುರಿಸುತ್ತಿರುವ ಅತಿದೊಡ್ಡ ಸಮಸ್ಯೆಯಾಗಿದೆ. ಕೆಲಸದ ಒತ್ತಡ ಅಥವಾ ಸಾಮಾಜಿಕ ಮಾಧ್ಯಮಗಳ (Social Media) ಅತಿಯಾದ ಬಳಕೆಯಿಂದಾಗಿ ರಾತ್ರಿ ತಡವಾಗಿ ಮಲಗಿ, ಬೆಳಿಗ್ಗೆ ಬೇಗನೆ ಎದ್ದೇಳುವ ಅಭ್ಯಾಸವು ಹಲವರಲ್ಲಿ ದೀರ್ಘಕಾಲೀನ ಆರೋಗ್ಯ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ನಿದ್ರೆಯ ಕೊರತೆಯಿಂದಾಗುವ ಪ್ರಮುಖ ಅಡ್ಡಪರಿಣಾಮಗಳು:
1. ದೀರ್ಘಕಾಲೀನ ರೋಗಗಳ ಅಪಾಯ: ಸರಿಯಾದ ನಿದ್ರೆಯಿಲ್ಲದಿದ್ದರೆ ದೇಹದ ನೈಸರ್ಗಿಕ ಲಯ (Circadian Rhythm) ಏರುಪೇರಾಗುತ್ತದೆ. ಇದರಿಂದ ಹೃದಯ ಸಂಬಂಧಿ ಕಾಯಿಲೆಗಳು, ಅಧಿಕ ರಕ್ತದೊತ್ತಡ (BP) ಮತ್ತು ಮಧುಮೇಹದಂತಹ (Diabetes) ಗಂಭೀರ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಹೆಚ್ಚು.
2. ಮಾನಸಿಕ ಒತ್ತಡ ಮತ್ತು ಹಾರ್ಮೋನ್ ವ್ಯತ್ಯಾಸ: ಕಡಿಮೆ ನಿದ್ರೆಯು ದೇಹದಲ್ಲಿ ‘ಕಾರ್ಟಿಸೋಲ್’ (Cortisol) ಎಂಬ ಒತ್ತಡದ ಹಾರ್ಮೋನ್ ಬಿಡುಗಡೆಯನ್ನು ಹೆಚ್ಚಿಸುತ್ತದೆ. ಇದರಿಂದ ಯಾವುದೇ ಕೆಲಸದ ಮೇಲೆ ಗಮನ ಕೇಂದ್ರೀಕರಿಸಲು ಸಾಧ್ಯವಾಗುವುದಿಲ್ಲ ಮತ್ತು ಅತಿಯಾದ ಉದ್ವಿಗ್ನತೆ, ಕಿರಿಕಿರಿ ಉಂಟಾಗುತ್ತದೆ.
3. ನೆನಪಿನ ಶಕ್ತಿ ಕುಂಠಿತ: ನಿದ್ರೆಯ ಅವಧಿಯಲ್ಲಿ ನಮ್ಮ ಮೆದುಳು ಮರುಸಕ್ರಿಯಗೊಳ್ಳುತ್ತದೆ. ನಿದ್ರೆಯಿಲ್ಲದಿದ್ದರೆ ಮೆದುಳಿನ ಕಾರ್ಯಕ್ಷಮತೆ ಕಡಿಮೆಯಾಗಿ ಜ್ಞಾಪಕ ಶಕ್ತಿ ಕ್ಷೀಣಿಸುತ್ತದೆ. ದೀರ್ಘಕಾಲದವರೆಗೆ ನಿದ್ರಾಹೀನತೆಯಿಂದ ಬಳಲುವವರಿಗೆ ಭವಿಷ್ಯದಲ್ಲಿ ‘ಅಲ್ಝೈಮರ್’ (Alzheimer’s) ಬರುವ ಅಪಾಯವಿರುತ್ತದೆ ಎಂದು ಅಧ್ಯಯನಗಳು ತಿಳಿಸಿವೆ.
4. ತ್ವರಿತ ತೂಕ ಏರಿಕೆ: ನಿದ್ರೆಯ ಕೊರತೆಯು ಹಸಿವನ್ನು ಪ್ರಚೋದಿಸುವ ‘ಗ್ರೆಲಿನ್’ ಮಟ್ಟವನ್ನು ಹೆಚ್ಚಿಸುತ್ತದೆ ಮತ್ತು ಹೊಟ್ಟೆ ತುಂಬಿದ ಭಾವನೆ ನೀಡುವ ‘ಲೆಪ್ಟಿನ್’ ಹಾರ್ಮೋನ್ ಕಾರ್ಯಕ್ಕೆ ಅಡ್ಡಿಪಡಿಸುತ್ತದೆ. ಇದರಿಂದ ಅತಿಯಾದ ಹಸಿವು ಉಂಟಾಗಿ ಶೀಘ್ರವಾಗಿ ದೇಹದ ತೂಕ ಹೆಚ್ಚಾಗುತ್ತದೆ (Obesity).
5. ಖಿನ್ನತೆ ಮತ್ತು ಆತಂಕ: ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ (CDC) ವರದಿಯ ಪ್ರಕಾರ, ಮೂವರಲ್ಲಿ ಒಬ್ಬರಿಗೆ ಸರಿಯಾದ ನಿದ್ರೆ ಲಭಿಸುತ್ತಿಲ್ಲ. ಇದು ದೈಹಿಕ ಮತ್ತು ಮಾನಸಿಕ ಸಮಸ್ಯೆಗಳಲ್ಲದೆ ಲೈಂಗಿಕ ಜೀವನದ ಮೇಲೂ ನಕಾರಾತ್ಮಕ ಪರಿಣಾಮ ಬೀರುತ್ತದೆ ಹಾಗೂ ತೀವ್ರ ಖಿನ್ನತೆಗೆ ಕಾರಣವಾಗಬಹುದು.
ತಜ್ಞರ ಸಲಹೆ: ಫೋನ್ ಮತ್ತು ಸ್ಕ್ರೀನ್ ಸಮಯವನ್ನು ಕಡಿಮೆ ಮಾಡುವ ಮೂಲಕ ಗುಣಮಟ್ಟದ ನಿದ್ರೆಗೆ ಆದ್ಯತೆ ನೀಡುವುದು ಇಂದಿನ ತುರ್ತು ಅಗತ್ಯವಾಗಿದೆ.
