ಪ್ಯಾರಿಸ್: ವಿಶ್ವದ ಅತ್ಯಂತ ಬಿಗಿ ಭದ್ರತೆಯ ವಸ್ತುಸಂಗ್ರಹಾಲಯಗಳಲ್ಲಿ ಒಂದಾದ ಪ್ಯಾರಿಸ್ ಲೌವ್ರೆಯಲ್ಲಿ ನೆಪೋಲಿಯನ್ ಸಂಗ್ರಹದಿಂದ ಅಮೂಲ್ಯವಾದ ಆಭರಣಗಳನ್ನು ಕಳ್ಳರು ಕದ್ದಿದ್ದಾರೆ.
ನಾಟಕೀಯ ಹಗಲು ದರೋಡೆಯ ನಂತರ ಪ್ಯಾರಿಸ್‌ನಲ್ಲಿರುವ ಲೌವ್ರೆ ವಸ್ತುಸಂಗ್ರಹಾಲಯವನ್ನು ಭಾನುವಾರ ಮುಚ್ಚಲಾಯಿತು.
ಫ್ರಾನ್ಸ್‌ನ ಸಂಸ್ಕೃತಿ ಸಚಿವೆ ರಚಿಡಾ ದಾಟಿ ಈ ಘಟನೆಯನ್ನು ದೃಢಪಡಿಸಿದರು, ಯಾವುದೇ ಗಾಯಗಳಾಗಿಲ್ಲ ಮತ್ತು ತನಿಖೆಗಳು ನಡೆಯುತ್ತಿವೆ ಎಂದು ಹೇಳಿದ್ದಾರೆ.
ಫ್ರೆಂಚ್ ಮಾಧ್ಯಮ ವರದಿಗಳ ಪ್ರಕಾರ, ಭಾನುವಾರ ಬೆಳಿಗ್ಗೆ ವಸ್ತುಸಂಗ್ರಹಾಲಯವು ಬಾಗಿಲು ತೆರೆದ ಸ್ವಲ್ಪ ಸಮಯದ ನಂತರ ದರೋಡೆ ಸಂಭವಿಸಿದೆ. ಪ್ರಸ್ತುತ ನವೀಕರಣ ಕಾರ್ಯ ನಡೆಯುತ್ತಿರುವ ಸೀನ್ ನದಿಯ ಬದಿಯಿಂದ ಶಂಕಿತರು ಕಟ್ಟಡಕ್ಕೆ ಪ್ರವೇಶ ಪಡೆದಿದ್ದಾರೆ. ಗ್ಯಾಲರಿಗೆ ನೇರವಾಗಿ ಕರೆದೊಯ್ಯುವ ಸರಕು ಲಿಫ್ಟ್ ಬಳಸಿ, ಇಬ್ಬರು ಪುರುಷರು ಕಿಟಕಿಗಳನ್ನು ಒಡೆದು ಒಳಗೆ ಪ್ರವೇಶಿಸಿದ್ದಾರೆ. ಅವರ ಸಹಚರ ಹೊರಗೆ ಇದ್ದ.
ಕಳ್ಳತನವನ್ನು “ಸೂಕ್ಷ್ಮವಾಗಿ ಯೋಜಿಸಲಾಗಿದೆ” ಎಂದು ತನಿಖಾಧಿಕಾರಿ ವಿವರಿಸಿದ್ದಾರೆ, ಕಳ್ಳರು ಚಕ್ರವರ್ತಿ ನೆಪೋಲಿಯನ್ ಮತ್ತು ಸಾಮ್ರಾಜ್ಞಿ ಜೋಸೆಫಿನ್ ಅವರ ಆಭರಣ ಸಂಗ್ರಹದಿಂದ ಒಂಬತ್ತು ತುಣುಕುಗಳನ್ನು ತೆಗೆದುಕೊಂಡು ಪರಾರಿಯಾಗಿದ್ದಾರೆ. ಅದರಲ್ಲಿ ಒಂದು ಹಾರ ಮತ್ತು ಬ್ರೂಚ್ ಸೇರಿವೆ. 1804 ರಲ್ಲಿ ಅವರ ಪಟ್ಟಾಭಿಷೇಕದ ನಂತರ ಒಟ್ಟುಗೂಡಿಸಲಾದ ಈ ಸಂಗ್ರಹವನ್ನು ಫ್ರಾನ್ಸ್‌ನ ಅತ್ಯಂತ ಐತಿಹಾಸಿಕವಾಗಿ ಮೌಲ್ಯಯುತವಾದದ್ದು ಎಂದು ಪರಿಗಣಿಸಲಾಗಿದೆ, ಇದು ನೆಪೋಲಿಯನ್ ಯುಗದಲ್ಲಿ ಯುರೋಪಿಯನ್ ರಾಜಮನೆತನದಿಂದ ವಶಪಡಿಸಿಕೊಂಡ ವಸ್ತುಗಳನ್ನು ಒಳಗೊಂಡಿದೆ.
ವಿಶ್ವದ ಅತ್ಯಂತ ಬಿಗಿ ಭದ್ರತೆಯ ವಸ್ತುಸಂಗ್ರಹಾಲಯಗಳಲ್ಲಿ ಒಂದಕ್ಕೆ ಈ ಗ್ಯಾಂಗ್ ಹೇಗೆ ನುಸುಳುವಲ್ಲಿ ಯಶಸ್ವಿಯಾಯಿತು ಎಂಬುದರ ಕುರಿತು ಪತ್ತೆದಾರರು ತನಿಖೆ ಆರಂಭಿಸಿದ್ದಾರೆ.
